Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 雅歌 4 Bible Online

雅歌 4 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

雅歌 4

¹我所疼ê，看ah，你真súi，看ah，你真súi，Tī phè ê內面你ê目睭親像鴿；你ê頭毛親像山羊kui陣；倒tī Ki-lia̍t ê山邊。

²你ê嘴齒親像tú-á煎毛ê一群羊，洗清氣上來，Ta̍k隻有雙生kiáⁿ，無一隻失落伊ê kiáⁿ。

³你ê嘴唇親像朱紅線，你ê嘴也生做好，你ê鬢邊tī phè內，親像一塊石榴。

⁴你ê頷頸親像大衛ê台，起做軍藏局；壁頂吊一千個屏牌，lóng是勇士ê藤牌。

⁵你ê兩個奶，親像一對鹿á，食草tī百合花中，就是鹿母雙生ê。

⁶到日涼冷，影伸長ê時，我beh去沒藥山，kap乳香ê山頭。

⁷我所疼ê，你完全súi，你無一點á瑕疵。

⁸我ê新娘，你tio̍h tùi黎巴嫩kap我來，tùi黎巴嫩kap我來，Tùi A-má-ná ê頂面，tùi Sī-nî-jíⁿ kap Hek-bûn ê頂面；tùi獅ê穴，tùi豹ê山看落去。

⁹我ê小妹ah，我ê新娘ah，你奪我ê心，你用目睭一下看，用你ê頷頸ê一條金鍊á，奪我ê心。

¹⁰我ê小妹，我ê新娘，你ê愛情怎樣hiah美妙。你ê愛情怎樣比酒khah好；你ê膏油ê芳味怎樣比一切ê香料khah贏。

¹¹我ê新娘ah，你ê嘴唇親像蜜房teh滴，你ê舌下有蜜有奶；你ê衣服ê芳味親像黎巴嫩ê芳味。

¹²我ê小妹，我ê新娘，就是關鎖ê園；蓋密ê井，封密ê水泉。

¹³你所出是石榴ê園，有siōng好ê果子，指甲花kap ná-ta̍t ê樹。

¹⁴有ná-ta̍t kap番紅花，菖蒲kap肉桂，以及chiah-ê乳香、沒藥、沉香，kap一切上等ê香料。

¹⁵你是園中ê水泉，活水ê井，Tùi黎巴嫩流落來ê溪水。

¹⁶北風ah，tio̍h起來，南風ah，tio̍h來，吹來我ê園，hō͘伊ê芳味發出；願我所戀愛ê入伊ê園內，食伊好ê果子。