Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 利未記 5 Bible Online

利未記 5 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

利未記 5

¹若有人犯罪，就是聽見chiù -chōa ê聲，也伊本tio̍h做干證，總是所看見，á是所知ê，伊m̄講：伊tio̍h擔當伊ê罪。

²若有人摸tio̍h無清氣ê物，或是無清氣ê獸ê身屍，或是無清氣ê cheng-siⁿ ê身屍，或是無清氣ê蟲thōa ê身屍，伊也m̄知，伊就無清氣，伊就有罪。

³á是伊摸tio̍h別人ê無清氣，無論bak-tio̍h甚麼無清氣來無清氣，總是伊m̄知；到一下知，就有罪。

⁴á是有人隨便chiù -chōa，嘴講beh做pháiⁿ，beh做好，無論人tī甚麼事隨便chiù -chōa，伊也m̄知；到一下知，就tī chiah-ê項ê一項，算做有罪。

⁵伊tī chiah-ê項ê一項有罪，就tio̍h承認伊所犯ê罪。

⁶也tio̍h因為所犯ê罪，帶補過失ê祭，到耶和華ê面前，就是羊群中ê母ê，或是綿羊á，或是山羊做贖罪ê祭；論到伊ê罪，祭司tio̍h án-ni kā伊贖。

⁷伊ê氣力若無夠額thang獻一隻羊á，就tio̍h因為伊所犯ê罪，用兩隻ka-chui，á是兩隻鴿á-kiáⁿ，帶到耶和華ê面前做補過失ê祭；一隻做贖罪祭，一隻做燒祭。

⁸伊tio̍h將chiah-ê帶到祭司hia；祭司就tio̍h事先獻hit隻做贖罪祭ê；tùi頷頸chūn伊ê頭，總是m̄-thang kā伊破開。

⁹伊也tio̍h用chit-ê贖罪祭ê血，hiù tī壇邊；所chhun ê血tio̍h le̍k tī壇腳；這是贖罪祭。

¹⁰伊tio̍h照例獻第二隻做燒祭；論到伊所犯ê罪，祭司tio̍h照án-ni kā伊贖；就beh得tio̍h赦免。

¹¹伊ê氣力若無夠額thang獻兩隻ka-chui，á是兩隻鴿á-kiáⁿ，就tio̍h因為伊所犯ê罪，帶伊ê禮物來，就是幼ê麵粉i-hoat ê十份一，做贖罪祭，m̄-thang落油，也m̄-thang chham乳香；因為是贖罪祭。

¹²伊tio̍h將禮物帶到祭司hia；祭司tio̍h la̍k一la̍k，來做伊ê記念，燒tī壇頂，照獻hō͘耶和華ê火祭；這是贖罪祭。

¹³論到伊tī chit幾項事ê中間，所犯ê一項，祭司tio̍h án-ni kā伊贖，就伊beh得tio̍h赦免；所chhun ê lóng歸hō͘祭司，kap素祭一樣。

¹⁴耶和華吩咐摩西講：

¹⁵人若tī耶和華ê聖物錯誤犯罪，致到有過失，就tio̍h用補過失ê祭來獻hō͘耶和華，照理所估sià-khek-le̍k ê銀，就是照聖所ê sià-khek-le̍k，tùi羊群中用無瑕疵ê綿羊káng，做補過失ê祭；

¹⁶koh伊因為tī聖物ê錯誤tio̍h賠，另外tio̍h加五份ê一份交hō͘祭司；祭司tio̍h用補過失ê祭ê綿羊káng，替伊贖罪，伊就beh得tio̍h赦免。

¹⁷若有人犯罪行耶和華所命令m̄-thang行ê一項事，伊雖然m̄知也是有罪，就tio̍h擔當伊ê罪。

¹⁸伊tio̍h照你所估ê，tùi羊群中牽一隻無瑕疵ê綿羊káng，來交hō͘祭司做補過失ê祭，因為伊錯誤犯tio̍h，伊也m̄知，祭司就beh替伊贖罪，伊就beh得tio̍h赦免。

¹⁹這是補過失ê祭；因為伊tī耶和華ê面前實在有過失。