Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約珥書 1 Bible Online

約珥書 1 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約珥書 1

¹耶和華ê話臨到Pí-thó͘-jíⁿ ê kiáⁿ約珥ê。

²老大人ah，lín tio̍h聽chit-ê，chit所在khiā起ê百姓ah，lín tio̍h俯耳孔，當lín ê日á是lín ê列祖ê日，bat有chit-ê事mah？

³Lín tio̍h將chit-ê事傳hō͘ lín ê kiáⁿ，kiáⁿ傳hō͘孫，孫傳hō͘後代。

⁴草蜢食chhun-ê，第二種 ê草蜢來食伊；第二種食chhun-ê，第三種ê草蜢來食伊；第三種食chhun-ê，第四種ê草蜢來食伊。

⁵酒醉ê人ah，lín tio̍h醒來啼哭；好酒ê人ah，tio̍h為tio̍h甜酒來啼哭；因為無酒thang koh到你ê嘴lah。

⁶因為有一族上來我ê地，強猛koh bōe算得；伊ê齒親像獅ê齒，伊ê牙親像母ê獅ê牙；

⁷伊毀壞我ê葡萄樹，剝(pak)我ê無花果樹，hō͘伊光liu-liu，來棄sak伊；伊ê枝變做白。

⁸你tio̍h啼哭，親像在室女腰hâ麻布，為tio̍h少年ê時ê丈夫啼哭。

⁹素祭kap奠酒，lóng無thang到耶和華ê殿；服事耶和華ê祭司lóng悲哀。

¹⁰田拋荒，地悲哀；因為五穀毀壞，新酒乾去，油也欠缺。

¹¹作田人ah，lín tio̍h見笑，修理葡萄園ê ah，lín tio̍h哀叫，為tio̍h小麥kap大麥ê緣故；因為田園ê收成lóng無去。

¹²葡萄樹乾去，無花果樹枯焦，石榴、棗樹、蘋果，連田野一切ê樹木，也lóng枯焦；人間ê快樂lóng消無。

¹³祭司ah，lín tio̍h hâ麻布啼哭；tī祭壇服事ê ah，lín tio̍h哀叫；做我ê上帝差用ê人ah，lín tio̍h來，穿麻布過暝；因為素祭kap奠酒，lóng無thang獻tī lín ê上帝ê殿。

¹⁴Lín tio̍h設一個禁食ê聖日，召集嚴肅會，招集老大，kap國內一切khiā起ê百姓，到耶和華lín上帝ê殿，哀求耶和華。

¹⁵慘ah，hit日，因為耶和華ê日近lah，親像毀滅beh tùi全能ê來。

¹⁶食物kiám m̄是對咱ê目前斷絕mah？歡喜快樂kiám m̄是對咱ê上帝ê殿停止mah？

¹⁷種子爛tī土內；粟倉荒廢；粟siāⁿ倒壞；因為五穀乾la去。

¹⁸Cheng-siⁿ 哀哮到怎樣！牛群紛亂，因為無草；羊群也困苦。

¹⁹耶和華ah，我求叫你；因為火燒滅曠野ê草場，火燄燒盡田野ê樹木。

²⁰田野ê走獸ǹg你teh喘；因為溪水乾去，火也燒滅曠野ê草場。