Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 民數記 17 Bible Online

民數記 17 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

民數記 17

¹耶和華吩咐摩西講：

²你kā以色列人講：對in kia̍h柺á，ta̍k支派一支，就是對hiah-ê支派ê首領，共kia̍h十二支；你寫ta̍k人ê名tī伊ê柺á。

³Tī利未hit支柺á tio̍h寫亞倫ê名；因為ta̍k支派ê頭人lóng有一支柺á。

⁴你tio̍h將hiah-ê hē tī會幕內法櫃ê頭前，就是我kap lín相會ê所在。

⁵我所揀hit人，伊ê柺á behpuh芽；án-ni我beh hō͘以色列人哀怨ê話，就是in所哀怨lín ê話，lóng soah，無koh hō͘我聽見。

⁶摩西就kā以色列人講；in ê首領就用柺á交hō͘伊，照in ê支派一個首領一支，共十二支柺á；亞倫ê柺á也tī hiah-ê柺á ê中間。

⁷摩西就將hiah-ê柺á hē tī法櫃ê布棚內，tī耶和華ê面前。

⁸明á日摩西入去法櫃ê布棚；看ah，屬利未ê家，亞倫ê柺á，已經puh芽，生花蕾，開花，結成杏仁。

⁹摩西tùi耶和華ê面前kia̍h hiah-ê柺á出來，到以色列ê眾人hia；in看見ta̍k人kia̍h in ê柺á。

¹⁰耶和華對摩西講：用亞倫ê柺á猶原hē tī法櫃前，留teh，做chiah-ê悖逆ê人ê鑑戒；án-ni你就hō͘ in對我哀怨ê話soah，免得in死無。

¹¹摩西án-ni行，是照耶和華所命令ê來行。

¹²以色列人對摩西講：看ah，阮死lah，阮滅無lah，lóng滅無lah。

¹³見若óa近，就是óa近耶和華ê會幕ê，lóng死；阮beh lóng總死mah？