Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 撒迦利亞書 6 Bible Online

撒迦利亞書 6 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

撒迦利亞書 6

¹伊kā我講，Beh kā伊起厝tī Sī-ná地；厝若便，就將伊安置tī家己ê所在。

²我koh kia̍h目看；看ah，有四張車tùi兩個山縫出來，hiah-ê山是銅ê山。

³頭一張車掛赤馬；第二張車掛烏馬；

⁴第三張車掛白馬；第四張車掛花斑勇ê馬。

⁵我就應，對kap我講話ê使者講，我ê主ah，chiah-ê是甚麼？

⁶使者應我講，Chiah-ê就是天四面ê風；khiā tī全地ê主ê面前，taⁿ tùi-hia出來。

⁷掛烏馬ê車出去北方；白馬tè伊ê後面；花斑ê馬出去南方。

⁸勇ê馬出來，ài-beh tī全地行來行去；伊講，做lín去，tī全地行來行去；in就tī全地行來行去。

⁹伊叫我，kā我講，看ah，去北方ê已經tī北方安我ê心。

¹⁰耶和華ê話臨到我講，

¹¹你tio̍h tùi hiah-ê受掠ê人ê中間，就是tùi Hek-tāi，tùi To-pí-ngá，tùi Iâ-tāi-ngá領受金銀；koh tī hit日你tio̍h入去Se-hoan-ngá ê kiáⁿ約西亞ê厝，就是in tùi巴比倫倒tńg來所到ê厝；

¹²領受金銀做冕旒，戴tī Iok-sat-tap ê kiáⁿ，祭司頭約書亞，ê頭殼；

¹³對伊講，萬軍ê耶和華án-ni講，看ah，hit-ê稱做樹枝ê人，伊beh對伊ê根頭發起來，也beh起耶和華ê殿；

¹⁴伊beh起耶和華ê殿，伊也beh得tio̍h榮光，坐伊ê寶座來治理，也beh tī伊ê寶座做祭司；tī in兩個ê中間有和平ê計畫。

¹⁵冕旒beh歸tī禧年，To-pí-ngá、Iâ-tāi-ngá，kap Se-hoan-ngá ê kiáⁿ Hiân，hē tī耶和華ê殿做記念。