Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 馬太福音 26 Bible Online

馬太福音 26 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

馬太福音 26

¹耶穌講chiah-ê話soah，就kā伊ê學生講，

²Lín知過兩日pôaⁿ過節就到，人子tú-tio̍h解送去釘十字架。

³Hit時hiah-ê祭司頭kap百姓 ê長老聚集tī祭司頭，名該亞法ê院，

⁴saⁿ-kap參詳用詭譎ê計掠耶穌來thâi伊。

⁵總是講，當節期m̄-thang，驚了百姓 ê中間有擾亂。

⁶耶穌tī伯大尼，thái-ko西門ê厝，

⁷有婦人人tòa玉瓶，內面tóe極貴氣ê香油，就近伊，當伊坐桌ê時拚(piàⁿ)tī伊頭殼頂。

⁸學生看見就受氣，講，Án-ni破費有啥路用？

⁹因為chit-ê油能賣得chōe-chōe銀，來hō͘ sòng-hiong人。

¹⁰耶穌知就kā in講，Lín啥事刁難chit-ê婦人人ah？因為伊所行來款待我ê是好事。

¹¹因為常常有sòng-hiong人kap lín tī-teh，若是我無常常kap lín tī-teh。

¹²因為伊倒chit-ê油tī我身軀，就是備辦我埋葬來行ê。

¹³我實在kā lín講，普天下，無論甚麼所在傳chit-ê福音，也beh講起chit-ê婦人人所行，來記念伊。

¹⁴Hit時十二個學生一個，名做加略人猶大，去見hiah-ê祭司頭，

¹⁵講，Lín beh hō͘我jōa chōe，我beh將伊交hō͘ lín？In就kap伊約，hō͘伊銀三十。

¹⁶Tùi hit時伊chhē機會將耶穌交hō͘ in。

¹⁷除酵節ê頭一日，學生就近耶穌講，Ài阮tī甚麼所在kā你備辦食pôaⁿ過節？

¹⁸伊講，Lín入城chhē某人，kā伊講，先生講，我ê時近lah；我kap我ê學生守pôaⁿ過節tī你tau。

¹⁹學生照耶穌所吩咐ê去行：就備辦pôaⁿ過節。

²⁰到日暗耶穌kap十二個學生坐桌。

²¹食ê時，耶穌講，我實在kā lín講，lín中間一人beh賣我。

²²眾人真憂悶，一個一個kā伊講，主ah，總無是我o͘h？

²³伊應講，Kap我伸手tī盤裡ê，hit-ê beh賣我。

²⁴人子tò去照所記載指伊ê話；若是賣人子ê有災禍ah！hit人無出世khah好。

²⁵賣伊ê猶大講，拉比，總無是我o͘h？kā伊講，你已經講lah。

²⁶In teh食ê時，耶穌the̍h餅，祝謝peh破，pun hō͘學生，講，the̍h去食；chit-ê是我ê身軀。

²⁷Koh捧(phâng)杯祝謝hō͘ in，講，Lín lóng tio̍h lim伊；

²⁸chit-ê是我ê血，就是盟約ê血，為tio̍h chōe-chōe人來流出ê，致到罪得tio̍h赦免。

²⁹若是我kā lín講，taⁿ了後我無lim chit-ê葡萄ê汁，thèng候hit日我kap lín lim hit-ê新ê tī我ê父ê國。

³⁰已經吟詩，就出來，去橄欖山。

³¹Hit時耶穌kā in講，今暝lín lóng beh為tio̍h我來受塞礙，因為有記載講，我beh phah牧者，就羊群四散。

³²若是我koh活了後beh事先lín去加利利。

³³彼得應伊講，眾人雖然為tio̍h你來受塞礙，也我永永無受塞礙。

³⁴耶穌kā伊講，我實在kā你講，今暝雞iáu-bē啼，你beh三pái m̄認我。

³⁵彼得kā伊講，我就若tio̍h kap你死，也決斷無m̄認你。眾學生也lóng是án-ni講。

³⁶耶穌kap in到一所在，名客西馬尼，kā伊ê學生講，Lín chiah-ê坐chia，thèng候我去hia祈禱。

³⁷Chiah chhōa彼得kap西庇太兩個kiáⁿ saⁿ-kap去；就憂悶、慘慼。

³⁸kā in講，我ê心真憂悶到beh死，lín tòa chia kap我警醒。

³⁹Lio̍h-lio̍h-á進前，面phak tī地裡，祈禱，講，我ê父ah，若會做得，tio̍h hō͘ chit-ê杯離開我；總是m̄是照我所ài，是照你所ài。

⁴⁰就來學生hia，看見in teh睏，kā彼得講，Án怎樣，lín bōe-ōe kap我警醒半時久ah？

⁴¹Tio̍h警醒，tio̍h祈禱，免得入tī迷惑；心神甘願，若是肉體軟chiáⁿ。

⁴²第二pái koh去祈禱，講，我ê父ah，chit-ê杯若bōe得離開我，的確tio̍h我lim伊，就願你ê旨意得成。

⁴³koh再來看見in又teh睏，因為in ê目睭siap。

⁴⁴離開in koh去，第三pái祈禱，也是講hiah-ê話。

⁴⁵Hit-tia̍p koh就近學生，kā in講，Taⁿ thang睏來安歇lah。時近lah，人子受賣tī罪人ê手。

⁴⁶起來saⁿ-kap行；賣我ê人近lah。

⁴⁷Iáu-teh講ê時，忽然十二個學生ê一個，猶大，來，也有kui陣人kia̍h刀kap槌á，tùi chiah-ê祭司頭kap百姓 ê長老hia saⁿ-kap來。

⁴⁸賣伊ê bat kap in套暗號，講，我kā伊chim ê，hit人就是，lín thang掠伊。

⁴⁹即時就近耶穌，講，拉比，平安；就直直kā伊chim。

⁵⁰耶穌kā伊講，朋友ah，你beh來做ê，就做。Hiah-ê人就進前，起手掠耶穌。

⁵¹忽然有kap耶穌tī-teh ê一人伸手拔刀，thâi祭司頭ê奴僕，削去伊一個耳á。

⁵²耶穌就kā伊講，收你ê刀入原位，因為凡若kia̍h刀ê beh tùi刀死。

⁵³Á是你phah算我bōe-ōe求我ê父，就伊tī chit-tia̍p beh kā我差十二營khah加ê天使mah？

⁵⁴若án-ni，就聖經所講chit-ê tāi-chì的確有ê，怎樣會應驗ah？

⁵⁵Hit時耶穌kā in hiah-ê人講，Lín kia̍h刀kap槌á出來掠我，親像beh掠賊mah？我日日坐tī殿內教示人，也lín無掠我。

⁵⁶總是chit-ê事lóng成，是beh應驗先知所記載ê。」Hit時學生lóng離開伊走。

⁵⁷掠耶穌ê帶伊到祭司頭該亞法ê所在，tī hia hiah-ê經學士kap長老已經聚集。

⁵⁸彼得遠遠tè伊到祭司頭ê院，入內面kap hiah-ê差役saⁿ-kap坐，beh看hit-ê結局。

⁵⁹Chiah-ê祭司頭kap全公會chhē lām-sám ê干證攻擊耶穌，ài hō͘伊死。

⁶⁰雖然chōe-chōe lām-sám干證ê來，也無得tio̍h。後來有兩個到，講，

⁶¹Chit人bat講，我會毀壞上帝ê殿，三日就起伊。

⁶²祭司頭起來kā伊講，你lóng無應mah？Chiah-ê人所干證你ê是甚麼？

⁶³若是耶穌靜靜。祭司頭kā伊講，當chit-ê真活上帝，我命令你chiù-chōa來kā阮講，你果然是上帝ê Kiáⁿ，基督，á m̄是。

⁶⁴耶穌kā伊講，你已經講lah；若是我kā lín講，Tùi chit-tia̍p了後lín beh看見人子坐tī有權能ê ê大pêng，坐天 ê雲來。

⁶⁵Tùi án-ni祭司頭拆裂家己ê衫，講，伊講出僭權褻瀆ê話；咱iáu-kú欠甚麼干證ah？Taⁿ lín已經聽見伊ê僭權褻瀆lah。

⁶⁶Lín phah算怎樣？應講，伊該死。

⁶⁷就phùi-nōa tī伊ê面，用拳頭母cheng伊；也有5用手siàn伊，

⁶⁸講，基督ah，你是先知，tio̍h kā阮講，phah你ê是chī-chūi。

⁶⁹彼得坐tī外院；有一個女婢近óa伊講，你也bat kap加利利人耶穌做陣。

⁷⁰彼得當眾人ê面前m̄認講，我m̄知你teh講甚麼。

⁷¹出去到院門，koh一個女婢看見伊，kā tī hia ê人講，Chit-ê也bat kap拿撒勒人耶穌做陣。

⁷²彼得koh m̄認，續chiù-chōa講，我m̄-bat hit-ê人。

⁷³有hiah久，邊á teh khiā ê人近óa kā彼得講，你實在也是in ê黨，因為對你ê腔口露出。

⁷⁴伊chiah咒罵，koh chiù-chōa，講，我m̄-bat hit-ê人。雞就啼。

⁷⁵彼得就記得耶穌ê話講，雞iáu-bē啼，你beh三pái m̄認我。就出去外面，大啼哭。