Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 路加福音 9 Bible Online

路加福音 9 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

路加福音 9

¹耶穌叫十二個學生lóng來，hō͘ in有能力權柄，能制壓lóng總ê鬼，醫好病症。

²就差in去傳上帝ê國，醫好破病人。

³Koh對in講，莫得帶路費，莫得柺á，莫得tah-liân，莫得乾糧，莫得銀，也莫得兩領衫。

⁴見所入ê厝，tio̍h tòa tī hia，也tio̍h tùi hia起身。

⁵凡若m̄接納lín ê，出in ê城ê時，tio̍h拌去lín腳裡ê土粉，來干證in。

⁶學生就出去，遍行hiah-ê鄉社傳福音，ta̍k所在醫病。

⁷分封ê人君希律聽見一切ê事，就不止躊躇，因為有人講，約翰tùi死人中koh活；

⁸有ê講，以利亞出現；也有ê講，古早ê先知一人koh活。

⁹若是希律講，約翰我已經kā伊thâi頭；taⁿ我聽見伊chit號事，這是甚麼人？就chhē機會ài看見伊

¹⁰使徒tò來，將in所行ê排列hō͘耶穌聽。耶穌就chhōa in退開到一個城，名Pek-sài-tāi。

¹¹但是眾人知就tè伊；伊接納in，對in講論上帝ê國；凡若欠用醫病，就kā伊醫。

¹²日beh落，十二個學生來kā伊講，請四散眾人，hō͘ in去四圍ê鄉社kap山場投歇，設法食；因為咱chia是曠野ê所在。

¹³耶穌對in講，Lín Hō͘ in食。In講，阮若無去替chiah-ê眾人買食，就不過有五個餅，兩尾魚nā-tiāⁿ。

¹⁴因為hiah-ê人約略有五千。耶穌tùi學生講，Hō͘眾人坐kui列，每列五十人。

¹⁵學生照án-ni行，hō͘眾人lóng坐。

¹⁶耶穌the̍h五個餅兩尾魚，ǹg天祝謝來peh伊，hō͘學生排tī眾人ê面前。

¹⁷Lóng食到飽；拾所chhun ê屑á十二筐。

¹⁸耶穌家己teh祈禱，學生kap伊tī hia；伊就問in講，眾人講我是chī-chūi？

¹⁹應講，是行洗禮ê約翰；也有人講，是以利亞；koh有人講，是古早ê先知一人koh活。

²⁰伊kā in講，若是lín講我是chī-chūi？彼得應講，是上帝ê基督。

²¹伊就禁戒in莫得將這kā人講；

²²續講，人子的確tio̍h受有chōe-chōe艱苦，hō͘ chiah-ê長老、祭司頭、經學士所棄sak，koh受害死，第三日koh活。

²³Koh對眾人講，若有人ài tè我，就tio̍h看無家己，日日giâ伊ê十字架來tè我。

²⁴因為見若ài救伊ê性命ê beh失落伊；總是見若為tio̍h我來失落伊ê性命ê teh-beh救伊。

²⁵因為人若得tio̍h全世界來失落家己，損壞家己，有甚麼利益ah？

²⁶見若掠我kap我ê話做見笑ê，人子用家己kap父kap聖天使ê榮光來ê時，也beh掠hit人做見笑。

²⁷我真實kā lín講，Khiā tī chia ê，有人iáu-bē死，beh看見上帝ê國。

²⁸講chiah-ê話了後差不多八日，耶穌帶彼得、約翰、雅各saⁿ-kap上山祈禱。

²⁹祈禱ê時伊ê面貌有koh-iūⁿ，伊ê衫白，koh光nà-nà。

³⁰忽然有兩人kap伊講話，就是摩西、以利亞。

³¹In tī榮光出現，談論伊ê過世，就是伊tī耶路撒冷所beh歷過ê。

³²彼得kap同tī-teh ê人厭倦眠去；到in精神，就看見耶穌ê榮光，以及kap伊khiā-teh hit兩人。

³³當hit兩人離別伊ê時，彼得tùi耶穌講，先生，咱tī chia真好；阮來搭三間寮á，一間hō͘你，一間hō͘摩西，一間hō͘以利亞；是m̄知伊所講ê。

³⁴講chiah-ê話ê時，有雲罩in；in入tī雲內就驚。

³⁵有聲tùi雲裡出，講，chit-ê是我ê Kiáⁿ，我所揀ê；lín tio̍h聽伊

³⁶Hit-ê聲已經出，就看見耶穌家己tī-teh。學生靜靜；hit時無將所看見ê Kā人講。

³⁷隔日in落山ê時，有kui陣人來接伊

³⁸從中有一人大聲叫講，先生ah，求你看我ê Kiáⁿ，伊是我孤生ê。

³⁹有神掠伊，就liâm-piⁿ喉叫，hō͘伊thiu-chhoah到流nōa，koh重重傷伊；離開伊實在oh。

⁴⁰我bat求你ê學生趕伊，也in bōe能。

⁴¹耶穌應講，Hàiⁿ ah，m̄信koh悖逆ê世代ah，我kap lín tòa，吞忍lín，beh到jōa久ah？Tio̍h chhōa你ê Kiáⁿ來chia。

⁴²來ê時鬼siakhou7伊倒，hō͘伊大thiu-chhoah。耶穌就責備邪神，醫好hit-ê gín-ná，交hō͘伊ê老父。

⁴³眾人lóng gông-ngia̍h上帝ê大威嚴。_x0009_眾人奇怪伊所做lóng總ê事，hit時耶穌tùi伊ê學生講，

⁴⁴Chiah-ê話lín tio̍h聽去落耳；因為人子beh tú-tio̍h解送tī人ê手。

⁴⁵學生bōe曉悟chit-ê話，是對in隱密，hō͘ in bōe明白；in也m̄敢用chit-ê話問伊。

⁴⁶學生中生起辯論，看chī-chūi beh做大。

⁴⁷但是耶穌看出in心內所辯論，就牽一個gín-ná hō͘伊khiā tī身邊，

⁴⁸chiah kā in講，見若為tio̍h我ê名接納chit-ê gín-ná ê就是接納我；見若接納我ê是接納差我ê；因為lín眾人ê中間第一微細ê，伊是做大ê。

⁴⁹約翰應講，先生，阮bat看見一人用你ê名趕鬼；阮就禁止伊，因為伊無kap阮tè你。

⁵⁰耶穌對伊講，莫得禁止伊，因為見若無攻擊lín ê就是為lín。

⁵¹耶穌受chih接上天ê日期beh到，就決意ǹg耶路撒冷來行，差使者做頭去；

⁵²in去入撒馬利亞人一個鄉社，beh kā伊備辦。

⁵³但是in m̄接納伊，因為伊ǹg耶路撒冷teh行。

⁵⁴伊ê學生雅各約翰看見án-ni，就講，主ah，你ài阮叫火tùi天落來滅in mah？

⁵⁵耶穌oa̍t-tńg身責備in。

⁵⁶大家就去別個鄉社。

⁵⁷In行路ê時有人tùi耶穌講，你無論tá-lo̍h去，我beh tè你。

⁵⁸耶穌kā伊講，狐狸有孔，天中ê飛鳥有巢；獨獨人子無khòa頭殼ê所在。

⁵⁹Koh對一人講，Tè我。Hit人講，主ah，hō͘我tò去，先埋葬我ê老父。

⁶⁰耶穌kā伊講，chhut-chāi死人埋葬in ê死人；但是你tio̍h去傳報上帝ê國。

⁶¹Koh一人講，主ah，我beh tè你；總是准我先去kap家內ê人相辭。

⁶²耶穌對伊講，見若手hōaⁿ犁尾來看後面ê，無合tī上帝ê國。