Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約翰福音 19 Bible Online

約翰福音 19 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約翰福音 19

¹Tùi án-ni，彼拉多用鞭phah耶穌。

²兵丁用刺á編做冕旒，戴tī伊ê頭殼，koh用紫色ê袍kā伊穿；

³就近伊，講，猶太人ê王，平安ah。就siàn伊。

⁴彼拉多koh出去外面kā in講，你看，我chhōa伊出來hō͘ lín，hō͘ lín知我查了看伊無罪。

⁵耶穌戴刺á ê冕旒，穿紫色ê袍，出來外面；彼拉多koh kā in講，你看，chit-ê人！

⁶Chiah-ê祭司頭kap差役看見伊，就大聲喉叫講，釘伊十字架，釘伊十字架。彼拉多kā in講，Lín家己掠去釘；因為我看伊無罪。

⁷猶太人應伊講，阮有律法，也照chit-ê律法伊應該死，因為伊掠本身做上帝ê Kiáⁿ。

⁸彼拉多聽見chit-ê話，就益發驚；

⁹koh入公堂，kā耶穌講，你tùi tá-lo̍h來？但是耶穌無應伊。

¹⁰彼拉多就kā伊講，你m̄ kap我講mah？Kiám m̄知我有權thang放你，亦有權thang釘你tī十字架mah？

¹¹耶穌應伊講，若m̄是tùi頂面hō͘你，就你無權thang辦我；所以將我交hō͘你ê人，伊ê罪koh-khah重。

¹²Tùi án-ni，彼拉多ài beh放伊；猶太人大聲喉叫，講，你若放chit-ê人，就m̄是該撒ê朋友；因為凡若掠家己做王ê，是背叛該撒。

¹³彼拉多聽見chiah-ê話，就chhōa耶穌出來；也家己坐tī公座，tī一個名叫鋪石ê所在，希伯來ê話叫做Lek-pa-tāi。

¹⁴Hit日就是備辦pôaⁿ過節ê日；約略日中晝。就kā猶太人講，你看，lín ê王！

¹⁵In大聲喉叫，講，除去，除去，釘伊tī十字架。彼拉多kā in講，我將lín ê王釘十字架mah？Chiah-ê祭司頭應講，該撒以外，阮無王。

¹⁶Tùi án-ni，就將耶穌交hō͘ in去釘十字架。

¹⁷In就收伊；耶穌家己giâ伊ê十字架出去，到一個名叫頭殼碗ê所在，希伯來ê話叫做各各他；

¹⁸tī hia釘伊十字架，koh有兩人kap伊同釘，一pêng一個，耶穌tī中央。

¹⁹彼拉多亦寫斬條，hē tī十字架，寫講，猶太人ê王，拿撒勒人耶穌。

²⁰猶太人chōe-chōe讀chit-ê斬條；因為耶穌受釘ê所在近城；koh所寫ê，是用希伯來、羅馬、希利尼ê文字。

²¹所以猶太人chiah-ê祭司頭kā彼拉多講，莫得寫，猶太人ê王；tio̍h寫，伊家己講，我是猶太人ê王。

²²彼拉多應講，我所寫ê，已經寫了lah。

²³兵丁已經釘耶穌tī十字架，就the̍h伊ê衫，分做四份，ta̍k ê兵得tio̍h一份；koh the̍h伊ê內衫；chit領內衫無kap-chōa，是頂下透織ê。

²⁴所以saⁿ-kap講，莫得拆裂，tio̍h來liam-khau，看chī-chūi得tio̍h；這是beh應驗聖經所講，_x0009_In saⁿ-kap分我ê衫，_x0009_Liam-khau我ê衣服。

²⁵兵丁果然做chiah-ê事。Khiā tī耶穌十字架邊，有伊ê老母，kap伊ê老母ê姊妹，Kek-liû-pa ê bó͘馬利亞，kap Boa̍t-tāi-lia̍p ê馬利亞。

²⁶耶穌看見老母kap所疼ê學生khiā tī邊頭，就tùi老母講，老母ah，看，你ê kiáⁿ！

²⁷Koh 對學生講，看，你ê老母！Tùi hit時，hit-ê學生chih接伊到家己ê家。

²⁸Chit-ê tāi-chì以後，耶穌知眾項事已經明白，因為beh hō͘聖經ê話應驗，就講，我嘴乾。

²⁹Tī hia有一個器具tóe醋滿滿；in就the̍h海絨浸醋，hâ牛膝草，thuh到伊ê嘴。

³⁰耶穌已經受醋；就講，事明白lah；就àⁿ頭氣斷。

³¹Hit時是備辦節ê日，猶太人ài免得tī安歇日留身屍tī十字架，因為chit-ê安歇日是大ê日；所以求彼拉多kah人kòng折in ê腳骨，來收in。

³²兵丁到，kòng折頭一個ê腳骨，以及hit-ê kap伊同釘ê ê腳骨；

³³到tī耶穌，看見伊已經死就無kòng折伊ê腳骨；

³⁴獨獨有一個兵，用鎗鑿伊ê hia̍p下，血kap水liâm-piⁿ流出。

³⁵看見ê人做干證，伊ê干證是真；家己知所講是實，hō͘ lín亦會信。

³⁶因為chiah-ê tāi-chì成，是beh應驗聖經所講，伊ê骨無一支beh受phah碎。

³⁷Koh聖經有一句講，人beh看in所鑿ê。

³⁸Chiah-ê tāi-chì以後，有A-lī-má-thài ê約瑟，是耶穌ê學生，獨獨驚猶太人，chiah暗靜做學生，伊來求彼拉多，准伊去收耶穌ê身屍；彼拉多允准。就來，收伊ê身屍去。

³⁹Koh有尼哥底某，起頭bat暝時就近耶穌ê，亦來，帶沒藥chhiau沉香，約略一百斤。

⁴⁰In就收耶穌ê身屍，用幼苧布kap香料包伊，照猶太人埋葬ê例。

⁴¹釘十字架ê所在有園；園內有新ê墓，lóng bē bat有人葬 ê。

⁴²Hit日是猶太人備辦節ê日，koh因為hit-ê墓近，所以安置耶穌tī hia。