Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約翰福音 20 Bible Online

約翰福音 20 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約翰福音 20

¹七日ê頭一日，清早，天iáu-bē光，Boa̍t-tāi-lia̍p ê馬利亞到墓，看見石已經tùi墓徙開。

²就走去就近西門彼得，kap別個學生，就是耶穌所疼hit-ê，kā in講，有人將主移出墓，阮m̄知hē tī tá-lo̍h。

³所以彼得kap hit-ê別個學生出去到墓。

⁴兩人平平走；hit-ê別個學生走做頭，比彼得khah緊，事先到墓；

⁵àⁿ落看墓內，看見幼苧布hē-teh；獨獨無入去。

⁶西門彼得tè後到，入墓；看見幼苧布hē-teh，

⁷koh看見包頭殼ê巾，無kap幼苧布做一位，是另外tī一所在捲teh。

⁸Hit時hit-ê事先到墓ê學生亦入去，看見就信。

⁹因為in iáu-bē明白聖經ê話，講伊的確tio̍h tùi死人中koh活。

¹⁰Tùi án-ni，兩個學生tò去家己ê家。

¹¹獨獨馬利亞khiā tī墓外teh啼哭；哭ê時，àⁿ落看墓內；

¹²看見兩個天使穿白衫，坐tī耶穌ê身屍所bat安置ê所在，一個tī頭，一個tī腳。

¹³In就kā伊講，婦人人ah，啥事哭？應伊講，因為人將我ê主移去，我m̄知hē伊tī甚麼所在。

¹⁴已經講chiah-ê話，就翻身ǹg後面，看見耶穌teh khiā，也m̄知伊是耶穌。

¹⁵耶穌kā伊講，婦人人ah，啥事啼哭？你chhē chī-chūi？馬利亞phah算伊是顧園ê，就kā伊講，頭家ah，你若有扛伊去，請kā我講hē伊tī甚麼所在，我就去收伊。

¹⁶耶穌kā伊講，馬利亞ah。伊就oa̍t-tńg身，用希伯來ê話kā伊講，Lia̍p-pho-nî；意思就是，先生。

¹⁷耶穌kā伊講，莫得摸我；因為我iáu-bē上去見父；你tio̍h去chhē我ê兄弟kā in講，我上去見我ê父，亦是lín ê父；見我ê上帝，亦是lín ê上帝。

¹⁸抹大拉ê馬利亞就去kā學生講，我已經看見主；koh講，主用chiah-ê話kā伊講。

¹⁹Hit日就是七日ê頭一日，已經暗，學生因為驚猶太人，就tī in所tòa ê所在關門；耶穌到，khiā tī中間，kā in講，願lín平安。

²⁰已經講chit-ê話，就用手kap hia̍p下hō͘ in看。學生看見主，就歡喜。

²¹耶穌koh kā in講，願lín平安；我差lín，親像父有差我。

²²已經講chit-ê話，就對in pûn氣講，Lín受聖神；

²³lín赦甚麼人ê罪，就赦去；留甚麼人ê罪，就留teh。

²⁴有多馬稱做Té-thó͘-má ê，是十二學生ê一個，耶穌到ê時，伊無saⁿ-kap tī-teh。

²⁵其餘ê學生就kā伊講，阮chiah-ê已經看見主lah。但是多馬kā in講，我若無看見伊手中釘ê跡，無用我ê指頭á探伊釘ê跡，無用我ê手探伊ê hia̍p下，我決斷m̄信。

²⁶過八日，伊ê學生koh再tī厝內，多馬亦tī-teh。門已經關，耶穌到，khiā tī中央，講，願lín平安。

²⁷就kā多馬講，伸你ê指頭á來看我ê手；伸你ê手探我ê hia̍p下；莫得做m̄信ê，tio̍h做信ê。

²⁸多馬應講，我ê主ah，我ê上帝ah。

²⁹耶穌kā伊講，你因為看見我chiah信；hiah-ê無看見來信ê人，有福氣。

³⁰耶穌tī學生ê面前，koh有行chōe-chōe神蹟，無記tī chit本冊ê；

³¹獨獨記chiah-ê，hō͘ lín信耶穌是基督，是上帝ê Kiáⁿ；信，就tī伊ê名得tio̍h活。