Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 哥林多前書 7 Bible Online

哥林多前書 7 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

哥林多前書 7

¹論到lín所寫ê事：我講，Ta-po͘人無親近婦人人是好。

²總是為tio̍h淫亂ê緣故，ta̍k人tio̍h有家己ê bó͘，婦人人也ta̍k-ê tio̍h有家己ê丈夫。

³丈夫對婦人人tio̍h照所合宜ê款待伊；婦人人對丈夫也tio̍h án-ni。

⁴婦人人無權thang主意家己ê身軀，是丈夫主意；丈夫也無權thang主意家己ê身軀，是婦人人主意。

⁵莫得相虧負；獨獨若大家同心，就暫時相離，thang專務祈禱，後來猶原saⁿ-kap tôa，免得撒旦乘lín ê情慾bōe禁得，來試lín。

⁶我講án-ni，是允准，m̄是命令。

⁷我ái人lóng親像我。獨獨ta̍k人對上帝為家己ê恩賜；有ê chit款，有ê hit款。

⁸我對未嫁娶ê kap守寡人講，In若長長親像我是好。

⁹設使家己bōe禁得，就tio̍h嫁娶；因為嫁娶是khah好tī慾火teh to̍h。

¹⁰我命令已經嫁娶ê，其實m̄是我，是主命令。婦人人莫得離開丈夫，

¹¹(但是已經離開，就tio̍h長長無嫁，或是kap丈夫koh和) ；丈夫也m̄-thang放sak婦人人。

¹²Tùi其餘ê我講，m̄是主講：若兄弟有婦人人無信主，也婦人人歡喜saⁿ-kap tòa，就莫得放sak伊。

¹³婦人人有丈夫無信主，丈夫歡喜saⁿ-kap tòa，也莫得放sak伊ê丈夫。

¹⁴因為無信主ê丈夫tùi婦人人得tio̍h聖；無信主ê婦人人tùi丈夫得tio̍h聖；若m̄是án-ni，lín ê kiáⁿ兒無清氣，總是taⁿ in是聖。

¹⁵m̄信ê若離開，就kù-chāi伊離開；兄弟姊妹tī chiah-ê事無受拘束；獨獨上帝召咱是ài得和平。

¹⁶婦人人ah，你thái-thó知能救丈夫á bōe？丈夫ah，你 thái-thó知能救婦人人á bōe？

¹⁷獨獨照主所賞賜ta̍k人ê，照上帝所召ta̍k人ê，tio̍h án-ni行。Tī ta̍k-ê教會我所吩咐也是án-ni。

¹⁸有人已經受割禮來得tio̍h 召mah？就莫得廢無割禮。有人未受割禮來得tio̍h召mah？就莫得受割禮。

¹⁹受割禮bōe算得賬，無受割禮也bōe算得賬；獨獨是守上帝ê誡nā-tiāⁿ。

²⁰Ta̍k人tī甚麼等第受召，tio̍h猶原tiàm-tī hit-ê 等第。

²¹你做奴才來受召mah？M̄-thang因為án-ni來掛慮。總是若會得自由，是khah好。

²²因為做奴才，tī主得tio̍h召ê，是hō͘主所tháu放；án-ni做自由，來得tio̍h召ê，是做基督ê奴僕。

²³Lín是用價錢所買ê，m̄-thang成做人ê奴才。

²⁴兄弟ah，ta̍k人tī甚麼地步受召，伊tio̍h tī上帝ê面前長長tòa tī hit-ê地步。

²⁵論到未嫁娶ê，我無有主ê命令；總是我已經得tio̍h主ê憐憫來做盡忠，就將家己ê意見kā lín講。

²⁶因為看現今ê艱難，照我phah算，人若照伊平常ê款是好。

²⁷你有婦人人mah？莫得求tháu-放。你無婦人人mah？莫得求beh娶。

²⁸總是你若娶，m̄是犯罪；在室女若嫁，也m̄是犯罪。總是in hit號人beh tī肉體tú-tio̍h患難；我是teh顧lín。

²⁹兄弟ah，我koh講，時日促短lah，所以tùi taⁿ以後，有bó͘ ê tio̍h親像無bó͘，

³⁰啼哭ê親像無啼哭，歡喜ê親像無歡喜，買ê親像無所得tio̍h，用世間ê物ê親像無lām-sám用，

³¹因為chit世間ê款teh過去lah。

³²我ài得lín無所掛慮。無bó͘ ê掛慮主ê事，怎樣會hō͘主歡喜；

³³但是有bó͘ ê掛慮世間ê事，怎樣會hō͘ bó͘歡喜。

³⁴婦人人kap在室女也有分別；無丈夫ê掛慮主ê事，beh hō͘伊ê身軀kap神魂lóng聖。但是有丈夫ê掛慮世間ê事，怎樣會hō͘丈夫歡喜。

³⁵我講chiah-ê是為tio̍h lín家己ê利益，m̄是beh籠絡lín，就是beh hō͘ lín行合適ê事，勤勤服事主，無所攪擾。

³⁶但是有人phah算款待伊ê cha-bó͘-kiáⁿ有m̄合適，設使年歲過時，也事情不得已tio̍h án-ni，就thang照意思去行；伊無犯罪；tio̍h hō͘ in合婚。

³⁷若有人堅心，無有不得已ê事，koh有權thang行家己ê意思，也伊家己ê心已經決定beh留伊ê cha-bó͘-kiáⁿ，án-ni行是好。

³⁸親像án-ni，hō͘家己ê cha-bó͘-kiáⁿ出嫁ê是好，無hō͘伊出嫁ê koh-khah好。

³⁹丈夫tī-teh ê時，婦人人受把縛；丈夫若死，婦人人得tio̍h自由，嫁伊所愛ê，獨獨tio̍h嫁屬主ê，chiah thang。

⁴⁰總是照我phah算，無嫁khah有福氣；koh我想我也有上帝ê神。