Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 哥林多後書 9 Bible Online

哥林多後書 9 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

哥林多後書 9

¹論到服事聖徒ê事，我寫phoe hō͘ lín算是加工。

²因為我知lín ê熱心，chiah將chit-ê tùi馬其頓人為tio̍h lín誇口，講，A-kai-a tùi舊年已經便；koh lín ê熱心有感激chōe-chōe人。

³總是我差chiah-ê兄弟，hō͘ lín先備辦，照我所講；

⁴免得阮tī chit-ê事所為tio̍h lín誇口ê歸tī空空；驚了有馬其頓人kap我來，看見lín未有便，阮就為tio̍h深信lín致到見笑；lín ê，我免講。

⁵所以我想的確tio̍h勸chiah-ê兄弟量早去lín hia，來事先khêng lín前所允ê恩惠；thang顯明lín ê備辦便是tùi恩惠，m̄是tùi勉強。

⁶但是我講，少種ê，少收；chōe種ê，chōe收。

⁷Ta̍k人照伊心內所有定tio̍h ê，莫得煩惱，莫得勉強；因為歡喜the̍h出ê，上帝疼伊。

⁸Koh上帝會hō͘ ta̍k項ê恩典充滿到tī lín，hō͘ lín凡事常常充足，thang行ta̍k項ê好事有夠滿滿；

⁹照所記載講，_x0009_伊有大捨施，伊有賑濟sòng-hiong人，_x0009_伊ê義永永tī-teh。

¹⁰Koh賞賜種子hō͘掖ê，也賞賜米糧hō͘人食ê上帝，伊beh賞賜lín thang掖ê種子chōe-chōe，也beh加添lín行義ê果子，

¹¹hō͘ lín凡事充足，到有ta̍k樣ê好心，chit-ê好心就是託重阮來致到人感謝上帝ê。

¹²因為chit-ê服事ê工m̄是補足聖徒ê欠缺nā-tiāⁿ，koh續能hō͘ chōe-chōe人感謝上帝。

¹³In tùi chit-ê工ê經驗來歸榮光上帝，是因為lín承認基督ê福音來順服，koh因為lín好心款待in kap眾人；

¹⁴koh in為tio̍h上帝所賞賜lín極大ê恩，替lín祈禱，來戀慕lín。

¹⁵感謝上帝為tio̍h伊講bōe盡ê恩賜。