Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約書亞記 16 Bible Online

約書亞記 16 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約書亞記 16

¹約瑟ê kiáⁿ孫liam-khau所得tio̍h ê地，是tùi óa近耶利哥ê約旦河起，tī耶利哥水ê東pêng，tùi耶利哥上去，thàng過山地ê曠野，到Pek-te̍k-lī；

²koh tùi Pek-te̍k-lī到Lō͘-su，連到A-ki人ê境界，到A-tha-lio̍k；

³koh ǹg西落去到Ap-lī-thê人ê境界，到下面ê Pek-hô-lûn ê境界，直到Ki-sek，thàng到海為止。

⁴約瑟ê kiáⁿ Má-ná-se、Í-hoat-liân就得tio̍h這做in ê業。

⁵Í-hoat-liân kiáⁿ孫ê境界，照in ê宗族所得tio̍h ê，記tī下面；in ê業東勢ê界是A-tha-lio̍k-a-ta̍t到頂面ê Pek-hô-lûn；

⁶Hit-ê界ǹg西thàng到北pêng ê Bi̍t-bí-tha，hit-ê界ǹg東se̍h到Tha-la̍p-sī-lô，koh連到Ngá-lô-hap ê東pêng。

⁷Tùi Ngá-lô-hap落去到A-tha-lio̍k，koh到Ná-la̍h，透到耶利哥，thàng到約旦為止。

⁸Hit-ê界tùi Tha-phó͘-a ǹg西，到Ka-ná河，thàng到海為止。這就是Í-hoat-liân人ê支派，照in ê宗族，所得tio̍h ê業。

⁹另外tī Má-ná-se kiáⁿ孫ê業中，有分別ê城；hiah-ê城，kap伊ê鄉社，lóng分hō͘ Í-hoat-liân人。

¹⁰In無趕出tiàm tī Ki-sek ê迦南人；總是迦南人tiàm tī Í-hoat-liân人ê中間，做苦工ê奴僕，到今á日。