Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約書亞記 3 Bible Online

約書亞記 3 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約書亞記 3

¹天光約書亞透早起來，kap以色列眾人lóng離開Si̍p-têng，來到約旦；iáu未過去，就歇tī-hia，thèng候過河。

²過三日，官長遍行營中；

³命令百姓講：Lín看見耶和華lín上帝ê約櫃，koh看見祭司利未人扛伊ê時，tio̍h離開lín ê所在，來tè in ê後面。

⁴總是lín kap約櫃相離，約略tio̍h量兩千肘ê遠；m̄-thang 逼近伊，hō͘ lín知所tio̍h行ê路；因為lín平時m̄-bat行chit條路。

⁵約書亞對百姓講：Lín tio̍h家己聖潔，因為明á日耶和華beh tī lín中間行奇事。

⁶約書亞koh吩咐祭司講：Lín扛約櫃起來，tī百姓ê頭前行；in就扛約櫃起來，行tī百姓ê頭前。

⁷耶和華對約書亞講：Tùi今á日起，我beh hō͘你tī以色列眾人ê目睭前做大，hō͘ in知我kap你tī-teh，親像前kap摩西tī-teh一樣。

⁸你tio̍h吩咐扛約櫃ê祭司講：Lín到約旦水邊ê時，tio̍h停腳tī約旦。

⁹約書亞對以色列人講：Lín近前來，聽耶和華lín上帝ê話。

¹⁰約書亞koh講：Tùi án-ni，lín thang知活ê上帝tī lín中間，beh tī lín ê頭前趕逐迦南人，Hek人、Hi-bī人、Pí-lī-sé人、Kek-ka-sat人、A-mô͘-lī人、Iâ-pò͘-su人。

¹¹看ah，普天下ê主宰ê約櫃beh tī lín ê頭前過去，入約旦。

¹²Lín taⁿ tio̍h tùi以色列支派中揀十二人，每支派一個人；

¹³到扛普天下ê主耶和華ê約櫃ê祭司，in ê腳khiā tī約旦河ê水，約旦河ê水，就是tùi頂面流落來ê水，beh截斷，khiā起來kui堆。

¹⁴百姓離開布棚，beh過約旦ê時，祭司就扛約櫃tī百姓ê頭前。

¹⁵Tī收成ê時，約旦ê水常常pôaⁿ過伊ê岸。扛約櫃ê到約旦，扛約櫃ê祭司，

¹⁶腳一下ùn-tio̍h水，hit-ê tùi頂面流落來ê水，就khiā起來kui堆，相離真遠，tī Sat-la̍h-tàn邊頭ê亞當城；hit-ê流tī A-la̍h-pa海，就是鹽海，hiah-ê水全然截斷；百姓就tī耶利哥ê對面過去。

¹⁷扛耶和華約櫃ê祭司tī約旦ê乾地定定khiā-teh；以色列眾人lóng tùi乾地過去，直到百姓一盡過約旦。