Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約書亞記 5 Bible Online

約書亞記 5 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約書亞記 5

¹約旦河西勢ê A-mô͘-lī人chiah-ê王，kap óa海ê迦南人chiah-ê王，聽見耶和華tī以色列人ê面前hō͘約旦ê水乾去，thèng候咱過去；in ê心因為以色列人ê緣故就失膽，神不附體。

²Hit時耶和華對約書亞講：你tio̍h chhòng火石刀，第二pái kā以色列人行割禮。

³約書亞就chhòng火石刀，tī除去皮山hia，kā以色列人行割禮。

⁴約書亞kā in行割禮ê緣故，是因為tùi埃及出來ê眾百姓，見能交戰ê ta-po͘丁，出埃及以後tī路裡死tī曠野。

⁵因為出來ê眾百姓lóng受割禮；獨獨出埃及以後tī曠野ê路裡所生ê眾百姓，lóng無受割禮。

⁶以色列人tī曠野行四十年，到眾百姓，就是出埃及ê戰士，一盡消滅；因為in無聽thàn耶和華ê話，耶和華bat對in chiù-chōa，m̄-hō͘ in看見耶和華對in列祖所chiù-chōa beh賞賜咱ê地，就是流奶kap蜜ê地。

⁷In ê kiáⁿ孫，就是伊所興起來續接in ê，lóng無受割禮，因為in tī路裡無kā in行割禮；約書亞chiah kā in行。

⁸百姓lóng受割禮明白，就tiàm tī營內家己ê所在，thèng候好。

⁹耶和華對約書亞講：我今á日將埃及ê凌辱移徙離開lín；tùi án-ni，hit所在名叫Kiat-kah，直到今á日。

¹⁰Hit時以色列人紮營tī Kiat-kah；hit月十四ê-hng，tī耶利哥ê平洋守pôaⁿ過節。

¹¹pôaⁿ過節ê隔日in就食hit所在所出ê，tú-tú hit日食無酵餅kap烘ê五穀；

¹²in食hit所在所出ê，隔日má-ná就停歇；以色列人也無koh有má-ná；hit年in就食迦南地ê土產。

¹³約書亞óa近耶利哥ê時kia̍h目看，看見有一人手拔刀，khiā tī伊ê對面；約書亞近óa伊，問伊講：你是為阮ê，á是為阮ê對敵ah？

¹⁴伊應講，無，我來是做耶和華ê軍長。約書亞就仆tī地裡拜伊，講：我ê主命令奴僕甚麼？

¹⁵耶和華ê軍長對約書亞講：Thǹg你腳裡ê鞋，因為你所khiā ê所在是聖ê；約書亞就照án-ni行。