Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 提摩太前書 5 Bible Online

提摩太前書 5 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

提摩太前書 5

¹莫得責備老人，tio̍h勸伊親像老父；少年人親像兄弟；

²老婦人人親像老母；少年婦人人親像姊妹，tio̍h專務清氣。

³真正守寡ê寡婦tio̍h尊敬伊。

⁴但是守寡婦人人有kiáⁿ á是孫，intioh8事先學有孝tī伊家己ê家，來報答in ê序大人，因為這是得tio̍h接納tī上帝ê面前。

⁵真正做寡婦無依óa ê，只有ǹg望上帝，暝日常常teh求叫祈禱。

⁶但是奢侈ê，雖然活已經死。

⁷Chiah-ê事tio̍h吩咐，hō͘ in無毛病。

⁸人若無顧親人，甚至無顧家己ê家，這就是悖謬道理，比m̄信ê人koh-khah pháiⁿ。

⁹寡婦記tī冊裡ê，的確tio̍h上六十歲，bat做一個丈夫ê婦人人，

¹⁰koh有好所行ê證據，bat養飼kiáⁿ兒，接待人客，洗聖徒ê腳，賑濟受患難ê人，thàn一切ê好所行。

¹¹但是少年ê寡婦tio̍h辭伊；因為in到動起情慾來逆基督ê時，就想beh嫁；

¹²因為in放sak起頭ê信，就受擬斷。

¹³Koh學pîn-tōaⁿ，過厝過宅；m̄-nā pîn-tōaⁿ，也kāu話，ài插事，講所m̄應該講ê。

¹⁴所以我ài少年ê寡婦koh嫁，生kiáⁿ，料理家，無hō͘對敵有機會thang講pháiⁿ話。

¹⁵因為已經有人oa̍t-tńg，去tè撒旦。

¹⁶但是信主ê婦人人，伊ê該親有寡婦，就tio̍h幫贊伊，免致連累教會，hō͘教會thang幫贊hiah-ê真正做寡婦ê。

¹⁷Gâu治理教會ê長老tio̍h加倍尊敬伊，hiah-ê tio̍h磨tī講道理kap教示ê，koh-khah tio̍h án-ni。

¹⁸因為聖經講，磨五穀ê牛，莫得láng伊ê嘴。Koh，做工ê堪得受伊ê工錢。

¹⁹有告長老ê，若m̄是有兩三個做干證，就莫得接納。

²⁰犯罪ê tio̍h當眾人ê面前責備in，hō͘其餘ê也thang驚惶。

²¹我tī上帝kap基督耶穌以及受揀ê天使ê面前，命令你，tio̍h守chiah-ê事，莫得固執所存ê意見，行tāi-chì莫得偏私。

²²莫得趕緊kā人按手，也莫得有份tī別人ê罪；家己tio̍h顧清氣。

²³莫得koh kan-ta lim水；tio̍h用淡薄酒，因為你ê脾胃，kap你ê kāu破病ê緣故。

²⁴有人in ê罪露現，做頭前行到tī審判；有ê in ê罪tè in ê後面。

²⁵親像án-ni好ê所行也有露現ê；hiah-ê m̄是án-ni ê也蓋bōe密。