Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 士師記 4 Bible Online

士師記 4 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

士師記 4

¹Í-hut死了，以色列人koh行耶和華所看做pháiⁿ ê事。

²耶和華賣in tī迦南王Iâ-pin ê手，就是tī Hā-só做王ê；伊ê軍長是Se-se-la̍h，伊khiā起tī外邦人ê Hā-lô-siat。

³Iâ-pin王有鐵車九百張；伊大大欺壓以色列人二十年；以色列人就求叫耶和華。

⁴Hit時有一個女先知名叫Tí-pho-la̍h，是La̍h-pí-to ê bó͘，伊做以色列ê士師。

⁵伊khiā起tī Í-hoat-liân山地，La̍h-má kap Pek-te̍k-lī ê中間，tī Tí-pho-la̍h ê棗樹腳；以色列人lóng上去伊hia，受伊判斷。

⁶伊差人叫A-pí-lô-am ê kiáⁿ Pa-la̍h tùi Ná-hut-tha-lī ê Ki-te-su來，對伊講，耶和華以色列ê上帝kiám-m̄是命令講：你tio̍h去Tha-po̍k山，chhōa Ná-hut-tha-lī kap Se-pò͘-lûn人一萬 kap你去？

⁷我beh hō͘ Iâ-pin ê軍長Se-se-la̍h kap伊ê車，伊ê全軍，到Ki-sūn河你hia；我beh將伊交tī你ê手。

⁸Pa-la̍h kā伊講，你若kap我去，我就beh去；你若m̄ kap我去，我就m̄去。

⁹伊講：我的確beh kap你去；總是你tī所行ê路；bōe得tio̍h榮顯；因為耶和華beh賣Se-se-la̍h tī婦人人ê手。Tí-pho-la̍h就起來，kap Pa-la̍h相kap去Ki-te-su。

¹⁰Pa-la̍h就招集Se-pò͘-lûn人kap Ná-hut-tha-lī人到Ki-te-su；tè伊上去ê有一萬人。Tí-pho-la̍h也kap伊上去。

¹¹Ki-nî人Hi-pek bat離開Ki-nî人，就是摩西ê外戚Hô-pa ê後裔；就搭布棚tī Sat-ná-im ê橡樹邊，就是óa近Ki-te-su ê。

¹²有人kā Se-se-la̍h講：A-pí-lô-am ê kiáⁿ Pa-la̍h已經上去Tha-po̍k山。

¹³Se-se-la̍h就聚集伊lóng總ê車，就是鐵車九百張，kap tè伊ê全軍，tùi外邦ê Hā-lô-siat，到Ki-sūn河。

¹⁴Tí-pho-la̍h對Pa-la̍h講：起來，今á日就是耶和華將Se-se-la̍h交tī你ê手ê日；耶和華kiám無tī你ê頭前行mah？Tùi án-ni， Pa-la̍h tùi Tha-po̍k山落來；tè伊ê有一萬人。

¹⁵耶和華用刀phah亂Se-se-la̍h kap伊所有ê車，伊ê全軍，tī Pa-la̍h ê面前；Se-se-la̍h落車步行逃走。

¹⁶總是Pa-la̍h追jip hiah-ê車kap軍隊，到外邦ê Hā-lô-siat；Se-se-la̍h ê全軍lóng倒tī刀下，無留一個人。

¹⁷只有Se-se-la̍h步行逃走，到Ki-nî人Hi-pek ê bó͘ Ngá-ek ê布棚；因為Hā-só王Iâ-pin kap Ki-nî人Hi-pek ê家和好。

¹⁸Ngá-ek出來迎接Se-se-la̍h，kā伊講，我ê主ah，oat入來，請你oat入我chia，m̄免驚；Se-se-la̍h就oat入伊ê布棚。Ngá-ek就用毯á kā伊kah-teh。

¹⁹Se-se-la̍h kā伊講，我嘴乾，請你用淡薄水hō͘我lim；伊就開貯奶ê皮袋hō͘伊lim；猶原kā伊kah-teh。

²⁰Se-se-la̍h koh kā伊講，你khiā tī布棚門，若有人來問你講，有人tī你chia無？你就kā伊講，無。

²¹Se-se-la̍h厭倦睏落眠；Hi-pek ê bó͘ Ngá-ek the̍h布棚ê燈，手kia̍h槌á，liam-liam-á行到伊hia，用釘對伊ê鬢邊釘入，透過土腳；伊就死。

²²Hit時Pa-la̍h追jip Se-se-la̍h，Ngá-ek出來迎接伊kā伊講，來ah，我用你所chhē ê人hō͘你看；伊就入去，看ah，Se-se-la̍h已經死，倒teh，釘iáu-kú tī伊ê鬢邊。

²³Án-ni hit一日，上帝hō͘迦南王Iâ-pin屈服tī以色列人ê面前。

²⁴Tùi án-ni，以色列人益發有勢力，khah贏迦南王Iâ-pin，到一盡滅迦南王Iâ-pin。