Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 啟示錄 12 Bible Online

啟示錄 12 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

啟示錄 12

¹Koh有大兆頭出現tī天裡，一個婦人人身軀穿日頭，伊ê腳下有月，頭殼戴十二粒星ê冕旒；

²亦有懷孕；因為beh生kiáⁿ ê艱苦、痛疼，就喉叫。

³Koh有別個兆頭出現tī天裡；有大尾赤色ê龍，七個頭，十支角，頭殼戴七頂王帽。

⁴伊ê尾拖天頂ê星三份ê一份，墜落地。龍khiā tī beh生kiáⁿ ê婦人人ê面前，thèng候伊生了，就beh吞伊ê kiáⁿ。

⁵婦人人生ta-po͘-kiáⁿ，就是beh用鐵柺治理萬邦ê。伊ê kiáⁿ受帶到tī上帝以及伊ê座位。

⁶婦人人就走去曠野，tī hia有上帝所備辦ê所在，hō͘伊tī hia得tio̍h養飼一千兩百六十日。

⁷Tī天裡就有交戰，Bí-ka-lek8chhoa7伊ê差使去kap龍交戰；龍亦chhōa伊ê差使去交戰，

⁸bōe-ōe贏，tī天裡in就無koh有所在。

⁹Hit尾大龍就受hiat落，就是老蛇，稱做魔鬼，亦稱做撒旦，迷惑普天下ê，伊受hiat落tī地裡，伊ê差使亦kap伊受hiat落。

¹⁰我就聽見tī天裡有大聲，講，咱ê上帝ê拯救kap權能kap國，以及伊ê基督ê權，taⁿ lóng到lah；因為抗告咱ê兄弟ê，就是暝日tī咱ê上帝ê面前抗告in ê，taⁿ已經受hiat落lah。

¹¹In因為羊羔ê血，kap in所干證ê道理，來khah贏伊；雖然到死，亦無疼惜in ê性命。

¹²所以chiah-ê天kap khiā起tī hit中間ê，lín tio̍h歡喜；但是地kap海有災禍，因為魔鬼已經落到lín hia，有大受氣，因為知伊ê時無jōa久。

¹³龍看見本身受hiat tī地裡，就khún-tio̍k hit-ê生ta-po͘-kiáⁿ ê婦人人。

¹⁴就有大鷹ê兩支翼hō͘婦人人，hō͘伊飛去曠野，到伊ê所在，離開蛇ê面前；tī hia得tio̍h養飼，一期候，koh兩期候，koh半期候。

¹⁵蛇tī婦人人ê後面，tùi伊ê嘴吐出水親像河，beh kā伊流去。

¹⁶地幫贊婦人人；就開嘴吞龍所吐出ê河水。

¹⁷龍受氣婦人人，就去kap婦人人其餘ê後裔交戰，就是守上帝ê誡，有耶穌ê干證ê；