Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 啟示錄 19 Bible Online

啟示錄 19 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

啟示錄 19

¹Chiah-ê tāi-chì了後，我聽見tī天裡有親像kui大陣人ê大聲講，A-lī-lū-iâ；拯救、榮光、權能lóng是咱ê上帝ê；

²是伊ê審判真實koh公義；因為伊bat審判hit-ê大淫婦，就是用伊ê淫亂敗壞地上ê；koh tùi伊討流伊ê奴僕ê血ê罪，來伸in ê冤。

³In koh再講，A-lī-lū-iâ。燒伊ê煙chhèng上高，到代代無盡。

⁴Hit二十四個長老kap四個活物，仆落敬拜坐tī座位ê上帝講，À-bēng，A-lī-lū-iâ。

⁵有聲tùi座位出來講，凡若lín做咱ê上帝ê奴僕，來敬畏伊ê，無論大細lóng tio̍h o-ló伊。

⁶我聽見有親像kui大陣人ê聲，親像chōe-chōe條水ê聲，親像雷大tân ê聲，講，A-lī-lū-iâ；因為主，咱ê上帝全能ê，做王lah。

⁷咱tio̍h歡歡喜喜，將榮光歸hō͘伊；因為羊羔婚姻ê期已經到，伊ê新娘已經家己備辦好lah。

⁸就有hō͘伊穿光明清氣ê 幼葛布；因為幼葛布是聖徒所行ê義。

⁹Koh kā我講，你tio̍h寫伊，見若受召來赴羊羔ê婚筵ê，有福氣。Koh kā我講，chiah-ê是上帝真實ê話。

¹⁰我就仆tī伊ê腳前beh拜伊。伊kā我講，千萬m̄-thang；我kap你以及你ê兄弟有耶穌ê干證ê，平平是做奴僕；你tio̍h拜上帝；因為耶穌ê干證就是先知ê神。

¹¹我koh看見天開，就看見有一隻白馬，騎伊ê稱做忠信真實；伊ê審判kap交戰無m̄公義。

¹²伊ê目睭是火燄；頭殼頂戴 chōe-chōe王帽；koh有名寫teh，除去伊本身以外無人會bat。

¹³伊穿hiù血ê衫；伊ê名稱做上帝ê道。

¹⁴Tī天裡ê軍兵騎白馬來tè伊，lóng穿幼葛，白koh清氣。

¹⁵Koh有利劍tùi伊ê嘴出，thang用伊來phah列邦；伊也beh用鐵柺治理in；伊也beh踏全能ê上帝大受氣ê酒窟。

¹⁶Tī伊ê衫kap腳腿有寫一個名講，萬王ê王，萬主ê主。

¹⁷我koh看見一個天使khiā tī日頭ê中央，大聲喉叫，kā天中lóng總ê飛鳥講，

¹⁸來聚集赴上帝ê大筵席，thang來食chiah-ê王ê肉，千總ê肉，勇士ê肉，馬kap騎馬ê人ê肉，凡若自由ê，做奴僕ê，序細序大ê肉。

¹⁹我koh看見獸kap地上chiah-ê王kap in ê軍兵lóng聚集，beh kap騎馬ê以及伊ê軍兵交戰。

²⁰獸就受掠，hit-ê假ê先知也kap伊同受掠，就是前bat tī獸 ê面前行神蹟，來迷惑hiah-ê受tio̍h獸ê記號，以及拜獸ê像ê，chit兩個活活hiat tī琉磺teh燒ê火湖。

²¹其餘ê hō͘ hit-ê騎馬ê嘴內所出ê劍thâi死in。眾鳥lóng食in ê肉到飽。