Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 啟示錄 4 Bible Online

啟示錄 4 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

啟示錄 4

¹Chiah-ê tāi-chì以後我看見，tī天裡有門開，koh有我起頭所聽見ê聲，親像號頭kap我講話ê，講，你上來chia，我beh將後來所的確成ê事指示你。

²我隨時受神ê感動，忽然看見有座位設tī天裡，座位頂有teh坐ê；

³hit-ê teh坐ê，伊ê容貌親像碧玉，kap瑪瑙；伊ê座位周圍有虹，看了親像chhong-hêng玉。

⁴座位ê周圍，有二十四個座位，坐tī hit頂面ê，有二十四個長老，穿白衫，頭殼戴金ê冕旒。

⁵Tùi hit-ê中央ê座位有發出sih-nà，kap聲，kap雷。亦有七支燈火，點tī座位前，就是上帝ê七個神。

⁶座位前有親像玻璃ê海，彷彿親像水晶；座位中kap座位ê周圍，有四個活物，前後有目睭滿滿。

⁷頭一個活物親像獅，第二ê活物親像牛á，第三ê活物有面親像人，第四個活物親像teh飛ê鷹。

⁸四個活物國有六個翼，周圍kap內面遍身有目睭；暝日lóng無歇睏，teh講，聖哉，聖哉，聖哉，主上帝，全能ê，早tī-teh，現在tī-teh，將來亦tī-teh ê。

⁹Ta̍k pái活物將榮光、尊貴、感謝，歸hō͘坐tī座位，活到代代無盡ê，

¹⁰二十四個長老就仆tī hit-ê坐tī座位ê ê面前，敬拜hit-ê活到代代無盡ê；koh將in ê冕旒hiat tī座位前，講，

¹¹阮ê主，阮ê上帝，你堪得受榮光、尊貴、權能；因為你bat創造萬物；萬物tī-teh，萬物受創造，lóng是對你ê旨意。