Read Baruya Lukɨ 3 Bible Online

Lukɨ 3 - Baruya bible

Lukɨ 3

¹Taaivɨrɨyaazai Sizaai yuyaraavɨ maremwaaidɨꞌnyɨ kwarame potinɨya (14) wavɨlaꞌdaaꞌnyɨyavɨ Anga Juthɨya sɨmagɨ Podɨyaazai Paailatɨ Gaꞌmaanɨya naangei mwaaidɨꞌnyɨ Galɨli saba Erotɨyai maremwaalaka maalɨkei mwaaidɨꞌnyɨ Yɨturɨyanajɨ Tɨrakonaaitazɨnajɨ sabanyaai Erotɨyarɨ gyaꞌmwei Pilipɨ maremwaalaka maalɨkei mwaaidɨꞌnyɨ Aavɨlinɨ saba Laazanɨyaazai maremwaalaka maalɨkei mwaaidɨꞌnyɨ

²nabaai Anaazalyɨ Kaayapaazalyɨ sanyalɨdaai Gotɨyarɨna Mubɨthɨka Yɨraꞌdita Naangeraai mwaaidakɨlyɨ yɨ dazagaaꞌ aꞌmwera mamwaalyɨgasaba Jonɨ Sekaraayare gawaalɨvaangei sahwaryawɨ Gotɨyare yagaalyaꞌ biꞌmaꞌna.

³Sarevɨdaaꞌnyɨ sai Aalya Jothanɨyavɨ yunewɨ yuyaba yamaryada “Gotɨyai aꞌmweihɨre kayaaꞌnanya marasɨꞌnyaꞌna sɨmunya mudɨkebwi yawɨramaaꞌna kyapɨjɨ bavɨtaazɨyaꞌ yɨhideꞌnanyɨ,” sara wɨdamaryakelyɨ.

⁴Sareꞌ kɨgaakuna Aazaayarɨ Gotɨyai kujaaꞌ bukuyavɨ pɨkarya yavɨkarinɨkabaaibɨsasɨ. Dara dɨnɨꞌ“Wawɨmaayaba pware maanguraayaꞌ jaka yɨmanɨꞌ‘Naangerɨne tusaꞌ nayaa yavadaꞌgalakɨna jɨlo!Gamɨre tusangɨ yɨdaꞌna nayaa jamakwilo!

⁵Taawala yuyangɨ yunebanna nayaa marajɨngɨrapɨjɨMugunya naangejɨ maalɨkejɨ sa dɨthavapɨraalayɨlo!Tuta kayaaꞌna naadɨya yɨdaꞌna javadaꞌgalyɨlo!Tutaanya sɨla yaasɨwaꞌna waramarike dɨmarasɨꞌnyɨlo!

⁶Sarevɨ Gotɨyai padaihasamaaryabwina yuyara wangabɨꞌderero.’ ” Sara dɨnɨkesɨ.

⁷Aꞌmwe kwala bwaꞌnaanyara Jonɨmɨre bavɨtaazɨya maaryaꞌnera yɨkabadaapɨjɨ sasarei saraavɨ wɨdɨna “Naawɨnaanyara kave kwaasɨ neyadɨvɨtabaai sarɨmɨ sɨmunya ayabwina kɨnɨnnakeihi bavɨtaazɨya yaasɨwaꞌna maaryaꞌneihi bɨvanɨgasaihi daa! ‘Gotɨyai kayaaꞌnanyanna taanga nyɨhɨzaavadɨka! Yaasɨwaꞌna bavɨtaazɨya maapɨjaihi tewaanna dɨmwaalyideihɨlyɨra,’ kwaasɨ sara aai yɨhɨthɨwaka!

⁸Sarevɨdaaꞌnyɨ taanga naangeꞌna sɨmunya mudɨkebwina nayaa yawɨramaaꞌna jɨla! Sara yapɨjɨ sɨmunya mudɨkebulyɨyaihi yɨsɨla nawɨꞌnyabɨta nayaa sara jideihɨlyɨ. Sarɨmɨ saihi dara madɨbɨnera! ‘Evɨraamɨmɨ gyakwalaangeina mwaaihoꞌna Gotɨyai taanga sa mujaayɨ neyadeꞌnanyɨ.’ Sara myawɨpɨna! Sareꞌ dareꞌnesɨ. Nayaa yɨhɨthɨma! ‘Sɨla daza Evɨraamɨmɨre kaimɨraaya yɨmaꞌnana!’ Gotɨyai sara wɨdazai yɨ sahwai yɨnɨga wiꞌna yannelyɨ. ‘Evɨraamɨmɨ gyakwalaangeinera,’ dɨmanɨgasaꞌ naangeꞌ daaka!

⁹Dahaasagaaꞌ Gotɨyai yɨsarɨ kaavɨlyawɨ dapalyaꞌnei gannya saajɨngei mena lɨmwagɨkelyɨ. Sarevɨdaaꞌnyɨ yɨta gazarazara yɨsɨla tewaanya miꞌnyɨ yajara sare sara dapalojɨ dɨkevɨ marasɨꞌnaderera.”

¹⁰Sai sara wɨdadaaꞌnyɨ yɨ kwala bwaꞌnaanyara yɨdaanganna “Weꞌ! Sarevɨdaaꞌnyɨ nemɨ gara yaadeinaavaka?”

¹¹Sara yɨdaanganna kyeꞌ jaꞌnawɨdɨna “Aꞌmwei baazɨꞌmaꞌnya pɨrɨwaai kɨnɨnnakei aꞌmwe pwarɨ baazɨꞌmaꞌnyaꞌ maayarɨ pɨrɨꞌ wɨjaavana! Aꞌmwei wapaaya kɨnɨnnakei sai kwalyɨ wapaayanna avaaina sana yɨna yana!”

¹²Wɨdɨna kyaꞌ aꞌmwe taakɨzɨya maaꞌdɨvɨta pwarajɨ bavɨtaazɨya maaryaꞌnera gamɨnyɨ wɨdɨna “Nejɨwaakadɨnyaigɨ, nemɨ gara yaadeinaavaka?”

¹³Wɨdɨna kyeꞌ sai wɨdɨna “Gaꞌmaanɨyai yɨhɨthɨvanɨkabaaibɨꞌna taakɨzɨya nɨgwia yɨnɨga wiꞌnanya dɨmaaryideihɨlyɨ. Nɨgwia kwaala pɨnɨjɨ mamwagiꞌnɨpɨnera!”

¹⁴Wɨdɨna kyaꞌ nabaai aawɨlata pwarajɨ sahwarɨ yɨdaanganna “Nabaai nemɨ sahwaina gara yaadeinaavaka?” Sara wɨdɨna kyeꞌ sai wɨdɨna “Sarɨmɨ aꞌmweraavɨ kwaasɨ kotɨyajɨ myadɨvɨꞌ kumɨre nɨgwia mwagiꞌnyaꞌneihi mipɨna! Nɨgwia mwagiꞌnyaꞌneihi aꞌmweraavɨ mala maramamaripɨnera! Sarɨmɨre maremwaaidei nɨgwia yɨhɨzaavanɨka sahɨnɨnna ‘Wikɨra!’ dɨthɨnyɨla! Nɨgwia pɨnɨjɨna mudɨpɨna!”

¹⁵Aꞌmwe yuyaraavɨre sɨmunyavɨ Jonɨmɨna dɨragɨnna dara yawɨꞌna “Bewalaka? Berɨꞌna yadelaka?” Yawɨꞌna yadɨvɨꞌ dara yawɨꞌna “Gotɨyai pwarɨ dahɨlakojɨ maryasaabathei Kɨraazɨtɨyai dɨngaka Jonɨ?”

¹⁶Sara yawɨꞌna yadaapɨjɨ Jonɨ jaꞌnawɨdɨna “Nɨmɨ sainyɨ aangaalyavɨ bavɨtaazɨya yɨhyadɨnyainyɨ. Dɨvi aꞌmwe pwai bathei yɨ gamɨre dɨragɨnyaꞌ nɨmɨre dɨragɨnyavɨ nyavɨlavɨkelyɨ. Gamɨre mamaayainyɨ nɨmɨ nebulyaꞌnanyainyɨ mɨka! Sahwarɨna nɨmɨ wana maalɨkeinyɨra. Wɨgaimwagyaꞌneinyɨ gamɨre kwaariꞌmasɨvɨlyaꞌ galyaaꞌmuneꞌ nɨmɨ aꞌmwe nawɨꞌnyainyɨ mɨꞌ. Sahwai sarɨmɨnyɨ pwaihɨrɨna Kurya Tewaanyarɨ kusawɨ bavɨtaazɨya yɨhyaꞌnei Kurya Tewaanyarɨ wɨlayɨhɨmwaaihadelyɨ. Nabaai pwaihɨrɨ muꞌnyaꞌneihɨrɨ daangevɨ bavɨtaazɨya yɨhyaꞌnei dɨkevɨ wɨlayɨhɨmwaaihadelyɨ.

¹⁷Sai gannya saavolɨya parɨnakeꞌ gannya asɨrɨ lɨmwada witɨya yɨlamarasɨꞌna yɨlamarasɨꞌna kyojɨ yagɨnya kɨlaake kurɨvaarɨya yɨhuta bamakuna kyojɨ witɨzɨla gamɨre witɨzɨlangevɨ marakadelyɨ. Gamɨre mɨnyevɨ witɨya kune kwarojɨ kurɨvaarɨya dɨka migaayaꞌnevɨ mariravadengɨ.”

¹⁸Sarevɨdaaꞌnyɨ Jonɨ sara wɨdɨna yaka nabaai kumɨre sɨmunyarɨ yɨdɨkavɨmwaaihya yaꞌnei yagaala kwalaalya pɨnɨjɨ dɨna yɨna yaꞌ. Nabaai sasare dazabwi aꞌmweraavɨ yagaala tewaanyaꞌ wɨjɨwaakadevulyɨ.

¹⁹Kɨrɨꞌ sai Aꞌmwe Erotɨyarɨ kumɨre maremwaala maalɨkerɨ maanga wɨdɨna. Erotɨyare gyaꞌmwere aꞌmweꞌ Erotɨyaazavɨ kuka maarakeꞌnajɨ nabaai kayaaꞌna yɨwetawakya yuya sara yakeꞌnajɨ maanga wɨdɨna.

²⁰Maanga wɨdɨna kyaꞌ Erotɨyai kayaaꞌna yɨwetawakya yaka yuya daza yɨwetawakya pɨrɨsɨ yeꞌmwanna yakesɨ. Sahwai Jonɨmɨ kalavuzavɨ wɨmwaaihɨna yakelyɨ. Sara yakesɨ. Jonɨ Jizaazarɨ bavɨtaazɨya yakeꞌnesɨ.

²¹Jonɨ tewaanya mwaalakegaaꞌ aꞌmwe yuyaraavɨ bavɨtaazɨya yakegaaꞌ yɨ Jizaazai kwarɨjɨ bavɨtaazɨya kyaꞌ Jizaazai Gotɨyarɨ wɨdadaaꞌnyɨ, yɨthaa, sɨgunyaꞌ mujaangɨna kyaꞌ

²²Kurya Tewaanyai walaabɨna. Kurya Tewaanyai yuta kwaamɨryaibɨsai sahwaryawɨnnei walaabɨna. Miꞌna walaabɨna yaka bwalamwaaina kyaꞌ Sɨgunyavɨdaaꞌnyɨ maanguraaya pɨrɨꞌ jaka yɨnyɨna “Gɨmɨ nɨmɨre Nyɨbwaalɨvaangeigɨnyɨra. Gɨmɨnyɨna tewaanna nyɨvuꞌnadeigɨnyɨ. Kurya tewaanya gukadɨnyaigɨnyɨ.” Jizaazarɨ gyakwalaangeraavɨne yayannesɨ.

²³Jizaazai gamɨre wawɨnya aaya mudɨꞌna yamaata yakegaaꞌ gamɨre kwarame aꞌmwere sɨvɨlatɨraalya pware atɨraalya (30) pɨnɨjɨ mena kwavɨlavaꞌ kɨrɨꞌ aꞌmwera yawɨꞌna “Sai Jozepɨyare gawaalɨkɨra.”Sahwai Yɨlaarelyɨ.

²⁴Sahwai Maatatɨmɨrelyɨ.Sahwai Livaayarelyɨ. Sahwai Melɨkaarelyɨ.Sahwai Janaarelyɨ. Sahwai Jozepɨyarelyɨ.

²⁵Sahwai Matataayazarelyɨ. Sahwai Emozɨmɨrelyɨ.Sahwai Nayaamɨmɨrelyɨ. Sahwai Ezɨlaarelyɨ.Sahwai Nahaarelyɨ.

²⁶Sahwai Mayaatɨmɨrelyɨ.Sahwai Matataayazarelyɨ. Sahwai Semenɨmɨrelyɨ.Sahwai Jozekɨmɨrelyɨ. Sahwai Jotharelyɨ.

²⁷Sahwai Jowaananɨmɨrelyɨ. Sahwai Rezarelyɨ.Sahwai Seravaavelɨmɨrelyɨ. Sahwai Sɨyalɨtiyalɨmɨrelyɨ.Sahwai Neraarelyɨ.

²⁸Sahwai Melɨkaarelyɨ.Sahwai Ethaarelyɨ. Sahwai Kozaamɨmɨrelyɨ.Sahwai Elɨmathaamɨmɨrelyɨ. Sahwai Erɨmɨrelyɨ.

²⁹Sahwai Jozuwaakɨrelyɨ. Sahwai Elɨyazarelyɨ.Sahwai Jorimɨmɨrelyɨ. Sahwai Maatatɨmɨrelyɨ.Sahwai Livaayarelyɨ.

³⁰Sahwai Sɨmɨyonɨmɨrelyɨ.Sahwai Jutharelyɨ. Sahwai Jozepɨyarelyɨ.Sahwai Jonaanɨmɨrelyɨ. Sahwai Elaayakimɨmɨrelyɨ.

³¹Sahwai Melɨyarelyɨ. Sahwai Mennaamɨrelyɨ.Sahwai Matatarelyɨ. Sahwai Netaanɨmɨrelyɨ.Sahwai Devitɨmɨrelyɨ.

³²Sahwai Jeziyarelyɨ.Sahwai Wovetɨmɨrelyɨ. Sahwai Bowaazarelyɨ.Sahwai Saalɨmonɨmɨrelyɨ. Sahwai Naazonɨmɨrelyɨ.

³³Sahwai Aminɨthapɨmɨrelyɨ. Sahwai Athɨminɨmɨrelyɨ.Sahwai Anaarelyɨ. Sahwai Ezɨronɨmɨrelyɨ.Sahwai Perezarelyɨ. Sahwai Jutharelyɨ.

³⁴Sahwai Jaikopɨmɨrelyɨ. Sahwai Aazakɨmɨrelyɨ.Sahwai Evɨraamɨmɨrelyɨ. Sahwai Teraamɨrelyɨ.Sahwai Naaworelyɨ.

³⁵Sahwai Seruhɨmɨrelyɨ.Sahwai Rewɨmɨrelyɨ. Sahwai Pelehɨmɨrelyɨ.Sahwai Evemɨrelyɨ. Sahwai Selaamɨrelyɨ.

³⁶Sahwai Kainaanɨmɨrelyɨ. Sahwai Aapakɨzathɨmɨrelyɨ.Sahwai Samɨmɨrelyɨ. Sahwai Nowaarelyɨ.Sahwai Lamekɨmɨrelyɨ.

³⁷Sahwai Metuzalaamɨrelyɨ.Sahwai Yɨnokɨmɨrelyɨ. Sahwai Jaaretharelyɨ.Sahwai Maalalelɨmɨrelyɨ. Sahwai Kainaanɨmɨrelyɨ.

³⁸Sahwai Yɨnozarelyɨ. Sahwai Satarelyɨ.Sahwai Aataamɨmɨrelyɨ. Sahwai Gotɨyarelyɨ.