Read Baruya Yɨvɨru 8 Bible Online

Yɨvɨru 8 - Baruya bible

Yɨvɨru 8

¹Yɨ, yagaala dazavɨya mɨnyagɨnyaꞌ nemɨ dɨvanɨgoꞌ, saꞌ yɨ daresɨ. Dazai nemɨnyɨne Yɨraꞌde Naanga sarei kɨnɨnnakeine. Yɨ naangeba namwaalyɨsarɨ aangasɨmagɨ Kingɨya Aaya Mudɨꞌnanya Sɨgunyavɨyarevɨ sai mena walamwaalakelyɨ.

²Sai Yɨraꞌde Naangei Gotɨyare anga gɨrɨꞌmaaya nawɨꞌnyavɨ wɨdaayadelyɨ. Yɨ Selɨ anga dazaꞌ yɨleanga nebulyaꞌnanyasɨ. Dazaꞌ aꞌmwe kwai marɨdaakwakaꞌ mɨꞌ. Aawa. Yune Naangei Gotɨyai daakwakesɨ. Yɨ sahɨbanne wɨdaayadelyɨ.

³Sareꞌ darevɨnyɨ. Yɨraꞌde Naanga gazaizai aꞌmweraavɨna Gotɨyarɨ yanga dala pɨnɨnna pɨnɨnna wɨjaayaꞌnejɨ yɨwetawakyanna Gotɨyarɨne tamiravawɨjaayaꞌnejɨ wawɨnyaꞌna dahɨlakɨnɨkelyɨ. Sarevɨdaaꞌnyɨ nabaai nemɨnyɨnei dazai wɨjaayaꞌneꞌ kɨnɨnnakerɨne wawɨnyaꞌ warɨkelyɨ.

⁴Sarevɨdaaꞌnyɨ Kwaaka davakɨ kuna mwaaidori kwajɨ sai yɨraꞌdei mamwaalyɨ kyadɨka! Yɨ Kɨwɨnyavɨ dɨnɨkabaaibɨꞌ pwara Gotɨyarɨ yanga dala pɨnɨnna pɨnɨnna wɨjaayaꞌnera yɨraꞌdɨvɨsara mwaaihasaꞌnanyɨ.

⁵Sahwara Kwaakevakɨya Gotɨyare Anga dazavɨ wawɨnya yɨraꞌdɨvɨsaꞌ lɨmwagaꞌdɨvɨsare. Anga saꞌ anga nawɨꞌnya nebulyaꞌnanya Sɨgunyavɨ mannɨkevɨ keꞌbaꞌnanyaꞌ aꞌmabaalyɨnanyaꞌ warɨkesɨ. Ne Mozɨzai Gotɨyare selɨ angeꞌ marɨdaakwakegaaꞌ Gotɨyai anga savɨna sahwarɨ dɨragɨnna wɨdakebɨsasɨ. Sareꞌ darevɨnyɨ. Sai dara daꞌ “Gɨmɨ mala nayaa jɨwannana! Yɨnɨga nebulyaꞌna avaala dazaꞌ nɨmɨ gɨmɨnyɨ mugunyavɨ givwarɨdaakwebaaibɨꞌ yɨ anga savɨya yuyangɨ sara javɨkarideigɨnyɨra.” Yɨ Sɨgunyavɨ nebulyaꞌnanya dazaꞌ warɨkesɨ.

⁶Nabaai dahaaꞌ saba Kɨraazɨtɨyai Yɨraꞌde Naangere wawɨnyaꞌ mena maarakelyɨ. Yɨ wawɨnya dazaꞌ Yɨraꞌdɨvɨta Naanga pwaraavɨrevɨ nebulyaꞌna wavɨlavɨkesɨ. Yɨ sai Gotɨyarɨjɨ aꞌmweraavɨjɨ marirakuꞌdere yagaala wɨlɨmwagarɨka saꞌ yagaala wɨlɨmwagaraka sɨnnawɨnyavɨ wavɨlavɨkabaaibɨꞌ Yɨraꞌdɨvɨta Naanga pwaraavɨrevɨ nebulyaꞌna wavɨlavɨkesɨ. Nabaai yagaala wɨlɨmwagarɨkebwi Kɨraazɨtɨyarɨne savɨ Gotɨyai yune naanga nebulyaꞌna wɨja yɨ kɨwɨnyavɨ yune naanga nebulyaꞌna wɨjangɨ wavɨlavɨke nawɨꞌnya naanga warɨkesɨ. Yagaala wɨlɨmwagarɨka dazaꞌ yune naanga nebulyaꞌna wɨja dazangɨ Gotɨyai yɨmaꞌnaabakesɨ.

⁷Sareꞌ darevɨnyɨ. Yagaala wɨlɨmwagaraka sɨnnawɨnyaꞌ yɨwetawakya yune maayaꞌ warajɨ kwajɨ yɨ Gotɨyai “Yagaala wɨlɨmwagaraka dazavɨneba dɨviya pɨrɨꞌ wakɨdeinyɨra,” myawɨri kyadɨꞌ.

⁸Sareꞌ darevɨnyɨ. Yɨzɨrelɨyara gamɨre kɨwɨnyavɨ galazekɨvalesaraavɨre yɨwetawakyanna yawɨraka Gotɨyai gamɨre bukuyavɨ daꞌ. Yɨ dara dɨnɨkesɨ.Naangeinyɨ dɨwa “Yɨthaa! Dɨvi yɨrɨkerɨka yɨmaꞌnaabathegaaꞌYɨzɨrelɨyaraavɨre yɨsavaasɨ Juthɨyaraavɨre yɨsavaasɨ saraavɨnaYɨ nɨmɨ yagaala wɨlɨmwagarade mudɨkeꞌ dakɨdeinyɨ.

⁹Mudɨka dazaꞌ sɨnnawɨnyaꞌ dakage saꞌbɨtaꞌ mɨꞌ.Kwɨyakwalaangeraavɨ nɨmɨre asɨlyɨ wibwarɨdaakwiaꞌneinyɨYɨzɨpɨ Kwaakevɨ yagalyaꞌmavesaraavɨ makwawegaaꞌKwɨyakwalaangeraavɨ yagaala saꞌ dake saꞌbɨtaꞌ mɨꞌ.Nɨmɨre yagaala wɨlɨmwagaraka kuna mamɨdɨnyesaꞌnaNɨmɨ sahwaraavɨ wanganake,” Naangeinyɨ dɨweinyɨ.Sarevɨdaaꞌnyɨ yagaala wɨlɨmwagarade mudɨkeꞌ yɨdeinyɨ.

¹⁰“Sareꞌ yɨrɨka sarɨka mena kyojɨYɨzɨrelɨyaraavɨre yɨsavaasɨ mudɨka dazaꞌ yeꞌmwannayɨdeinyɨ.”Naangeinyɨ dɨwa. Yagaala wɨlɨmwagarade saꞌ daresɨ.Kumɨre yawɨsavɨna nɨmɨre kɨwɨnyangɨ wɨlakɨdengɨ.Kumɨre sɨmunyavɨna dazangɨ pɨkarya yɨdavɨdengɨ.Nabaai nɨmɨ kumɨnyɨ Gotɨyainyɨ mwaalɨdeinyɨ.Nabaai kumɨ nɨmɨnyɨ aꞌmwera mwaaibɨꞌdere.

¹¹Sarevɨdaaꞌ nyɨ gazaizai gamɨre angebanyarɨ wɨjɨwaakadei mɨꞌ.Nabaai gazaizai gathaaꞌgahwaarɨ wɨjɨwaakyaꞌneꞌ mwariꞌ.“Naangerɨ nayaa jawɨrangana!” wɨdathei mɨꞌ.Yɨ dazagaaꞌ nɨmɨre aꞌmwe yuyara nayaa nyawɨrangabɨꞌdere.Maalɨkerajɨ aꞌmwe naanga kwarajɨ nyawɨrangadaapiyaꞌnaSara wɨjɨwaakyaꞌne wawɨnya wɨmudaasadera mɨꞌ.

¹²Sahwaraavɨ nɨmɨ kale gaimwanga wideꞌKumɨre yɨwetawakyangɨne tɨvɨkɨta marasɨꞌnɨdeꞌnanyɨ.Yɨ kumɨre kayaaꞌnanyabwina sɨduta ayahi yawɨrɨdeinyɨ mɨꞌ.Sareinyɨ yɨde sareꞌna yuyara nyawɨrangabɨꞌdeinyɨ. Gotɨyare bukuyavɨ sara dɨnɨkesɨ.

¹³Dɨnɨkevɨna “Mudɨkeva!” dakevɨ yɨ sɨnnawɨnyaꞌ aya mena dakɨnɨkesɨ. “Yarai yɨmaannadesɨ,” yawɨrakesɨ. Yɨ yuya aya yɨmaꞌnɨvanɨke yɨ neibɨsangɨ. Sa yune maalɨkegaaꞌna waradengɨ. Yɨ yɨnahu yuya yɨwɨna yadengɨ. Sarebaaibɨꞌ yagaala wɨlɨmwagaraka sɨnnawɨnyaꞌ sara yadesɨ.