Read bassa UMOZHIGO 12 Bible Online

UMOZHIGO 12 - bassa bible

UMOZHIGO 12

¹Na aka ga ibɛ AGWANGWAMA mbishi Abram, bɛɛ hiɛŋ, Bana na cɛnjɛ tụ bụ, maa genji udenji bu, tu ummamma bishi bu, maa zhe na cɛnjɛ tu na Ngɛɛ zhɛ mo bu mbisono.

²N zhɛ kaa ma kaana udenji bu ufwugwo duwa, Ngɛɛ zhɛ ma bu pana uwebiye, maa izeci bu beni urishi duwa. Bi zhɛ kaa ba sha bụtụ na ee peni-uwebiye.

³Atwa na ma bu pana-uwebiye, N zhɛ ma pana aŋ uwebiye, atwa na kaa ma bụ kalana-unu, N zhɛ ma kalana aŋ unu. Tedure na bụ ɛɛ zhɛ a pana edenji cɛnjɛ tu unyizo ga kpaaŋ uwebiye.

⁴Ga Abram beni ga, gana na ta AGWANGWAMA mbishi bu, ga Lụt du 'wa bụ. Ga Abram namɛ shiywa dupu-nu-woshi-na-shɛba-shɛ-ta (75) te e meci bu, na aka na ti bee beni nu Haran.

⁵Ga Abram shepi Sarai biyikwo bwa, na Lụt yɛu buhongwu bwa ti i'wɛŋnɛ ya aba elele nɛ a ga mwatatanjɛ, ta atwa elele na a ga 'yajɛ nu Haran. Ee kwuni tahaŋnụ ta aba maa e zhe na cɛnjɛ ti Kenan. Aka na te e ci cɛnjɛ ti Kenan,

⁶ga Abram duleji cɛnjɛ ta ata hwɛɛ, bee zhe tutu ụ'wụ'wụ ukpekpeshi na shikeni nu Morɛ, na shɛ ofwo tijilo ni Shɛkɛm. Ekenan aba jɛjɛ na cɛnjɛ ta ata na aka ata.

⁷Nazhɛ AGWANGWAMA bananɛ Abram caakwụ, bɛɛ hiɛŋ bụ, Ajalalo bu Ngɛɛ zhɛ ma pana cɛnjɛ tu ga. Ibɛ po ga Abram meni AGWANGWAMA na bananɛ bụ caakwụ utukwu-ụrụpɛ apata.

⁸Bee beni apata, bee zhe tuta ti Ishɛmɛ nɛ namɛ geri bu uwaŋna-banụ bụ ụshɛpwụ ata ɛɛ hiɛŋ, Bɛtɛl, boo mbo udulo bwa tugwuno, bee genji Bɛtɛl zalụ bu uwaŋna-twonuo, Ai tuba namɛ zalụ bu uwaŋna-banụ. Bee meni AGWANGWAMA utukwu-ụrụpɛ apata, baa zhɛbɛ AGWANGWAMA.

⁹Ga Abram to tuhwulo tu tahaŋnụ tu bwa, bee zhe zalụ bu tuta tu upada cɛnjɛ ti Kenan.

¹⁰Imunɛ ike i'wɛtwɛ layɛ na cɛnjɛ ta ata ti Kenan. Ibɛ po ga Abram zhe Ijipti maa nama tugwo apata, iwɛnɛ ta atwa cɛnjɛ ta ata baa ga namɛ a ya-imunɛ tebiye.

¹¹Aka na tu boo gwumwonu Ijipti tutono, bɛɛ hiɛŋ Sarai biyikwo bwa, M mepi maa bɛ shɛ biyikwo na pilanụ igbɛtɛtɛ.

¹²Aka na te Ijipti ụbụ kwụbɛ hwayɛ, ɛ zhɛ hiɛŋ, Biyikwo bwa na, nazhɛ ɛ zhɛ ma n kwụna, ama a zhɛ tuba ma bụ ganga maa nama.

¹³Ma bụ tabwa maa jɛmɛ hwayɛ maa bụngwụfwụ mi abɛ shɛ, iwɛ maa i n zhɛmanɛ iwɛ bụ, keeni iwɛ maa uraiŋ mu ubu namana.

¹⁴Aka na tu ga Abram teni Ijipti, Ejipti kwụbɛ maa biyikwo ata pilanụ tebiye.

¹⁵Aka na ta atwa shihwolu a na namɛ ni i'ɛlɛ Faro kwụbɛ bụ, aa shɛtangana bụ iwɛ Faro. Ee shepi biyikwo ata ee tecinji bu nu umwono Faro.

¹⁶Ibɛ po agwuma njɛ Abram tebiye iwɛ ubwa, (bee peni Abram agwụdụ, ni inɛ, nu nzhinyacɛ me eyi, ni iyweywe, na ajama eyi, na ajama o o), nu nzhinyacɛ mo o keeni nrohondo.

¹⁷Ama AGWANGWAMA peni Faro ụbaụta ne tishikpe tụ 'wụtụ keeni atwa ihwɛ ibwɛ iwɛ Sarai biyikwo Abram.

¹⁸Ga Faro suyanɛ Abram, bɛɛ hiɛŋ bụ, Imbe nɛ kwuuŋ abɛ n njɛɛ? Iwɛmbe po ebi m mbishi shi maa biyikwo bu baa shɛɛ?

¹⁹Iwɛmbe po ɛbi hiɛŋ maa, Bụngwụfwụ bụ baa shɛɛ? Ibɛ po Ngee shepi bu maa ma zana bụ. Hwuwayɛ go, biyikwo bu na, shapa bụ maa hwuri.

²⁰Ga Faro tɛtaganɛ atwa ubwa unu iwɛ ubwa, bee she bu medenji biyikwo bwa keeni iyi nɛ a 'yajɛ kpaaŋ.