Read bassa UMOZHIGO 16 Bible Online

UMOZHIGO 16 - bassa bible

UMOZHIGO 16

¹GA Sarai biyikwo Abram kaa metenji shi bu yɛu o. Bi 'yajɛ kaa yɛu-yo-o nɛ namɛ ni i'ɛlɛ ibwɛ, nɛ shɛ Bijipti na ɛɛ hiɛŋ izeci ibwɛ ga Haga.

²Ga Sarai hiɛŋ Abram, Hioko, AGWANGWAMA n kepeni uhwaŋna yɛu tumata, zhaga woto ni yɛu gɛ yo o namɛ ni i'ɛlɛ mi, nekeshi ma 'yaga yɛu tedure nu bwa. Ga Abram hwụjɛ ga unu Sarai.

³Gabata ga Abram jɛjɛ na cɛnjɛ ti Kenan shiywa umpwa, na aba ibɛ nazhɛ ga Sarai shepi Haga Bijipti ata na shɛ yɛu ɛtɛ yo o nɛ namɛ ni i'ɛlɛ ibwɛ, bee peni bwolo bwa ga Abram maa sha biyikwo bwa bu magɛgashɛ.

⁴Ga Abram weci nu bwa, bee le ofubo. Aka na tu baa kwụbɛ maa bi le ofubo, iwɛ agwuma-ihwɛ ibwɛ o o tatụlanụ sụ bụ ya o, baa ngbaracɛ bụ cwɛŋ.

⁵Ga Sarai hiɛŋ Abram, Ga tu'wanga ti mi tu patana nu uhiuhiu bu! M bu peteni yɛu-yo-o nɛ namɛ ni i'ɛlɛ mi na agba bụ, ama aka na tu baa kwụbɛ maa bi le ofubo, iwɛ mi tatụlanụ sụ bu ya o. Ga AGWANGWAMA jɛmɛ ụshɛrɛya na namɛ na ashashɛ bụ ne mi!

⁶Ama ga Abram hiɛŋ Sarai, Hioko yɛu nɛ namɛ ni i'ɛlɛ bụ baa shɛ, nda bụ gana na ụbụ kwụlanɛ. Nazhɛ ga Sarai peni bu ụbaụta, bee gezhiji bee genji bu.

⁷Nazhɛ butumwa ba AGWANGWAMA ba azuba to bu ugbe nu umɛzhinjɛ uko na namɛ nụ ụshɛka, umɛzhinjɛ ata namɛ nu uhwaŋna na zhɛ Shu.

⁸Ibɛ butumwa ata ba azuba hiɛŋ Haga, na shɛ yɛu ɛtɛ yo o nɛ namɛ ni i'ɛlɛ Sarai. Cee abu banɛɛ? Cee ɛbi zhɛɛ? Ga Haga jishijɛ bụ, bɛɛ hiɛŋ, N gezhigeni agwuma-ihwɛ mi o o ga Sarai.

⁹Ibɛ po butumwa ata ba AGWANGWAMA ba azuba hiɛŋ bụ, Zhaga gwulo no ofwo agwuma-ihwɛ ɛtɛ bụ, maa meme shileni bu.

¹⁰Butumwa ata ba azuba hiɛŋ bụ sasana, N zhɛ ma kaana ajalalo bu ugombo duwa maa kede e eri aŋ tɛrɛta o.

¹¹Butumwa ata ba azuba hiɛŋ bụ, Hioko, bi zhɛ ba mata yɛu-ye-eyi, ɛbi zhɛ ba pa iŋ izeci ti ge Ishmɛl,[14] iwɛnɛ ta AGWANGWAMA hwụjɛ ụbaụta bụ.

¹²Ubwa zhɛ ba sụba izhinyɛcɛ ye ehilo, bi zhɛ na sukakana bụtụ be elele, bụtụ be elele du kaa zhɛ na sukakana bụ, bi zhɛ kaa na sukakana miaụŋ-mo-bino bwa kpaaŋ.

¹³Iwɛbɛ po boo po AGWANGWAMA na jɛmɛ iwɛ nu bwa izeci maa, Gabụ bɛ shɛ Agwatana na ba kwụba uhwaŋna. Iwɛnɛ po bi hiɛŋ, N kwụbɛ Agwatana gom Ngaa ta shɛ waa buumwa hŋ na aba na tu Ngaa kwụbɛ bụ?

¹⁴Iwɛbɛ po du oo po umɛzhinjɛ ata izeci maa, Biɛ-lahai-roi[15] u namɛ na ashashɛ Kadɛsh ni Bɛrɛd.

¹⁵Ga Haga metenji Abram yɛu-ye-eyi, Ga Abram po yɛu ɛtɛ ga Haga meci izeci ti ge Ishmɛl.

¹⁶Ga Abram namɛ shiywa dupu-nu-talacɛ-na-shɛba-shi-cihiŋ (86) na aka na ga Haga metenji bu Ishmɛl.