Read bassa UMOZHIGO 22 Bible Online

UMOZHIGO 22 - bassa bible

UMOZHIGO 22

¹Na aba ijɛ kpaaŋ, nazhɛ Agwatana menji Abraham, bɛɛ hiɛŋ bụ, Abraham! Ga Abraham leni, bɛɛ hiɛb bụ, Oo.

²Agwatana hiɛŋ bụ, Shapa yɛu ɛtɛ bụ mokondo, ga Azik, ata obo lubo, maa zhe na cɛnjɛ tu Moria, ma to ụrụpɛ tuhwoŋzhingo nu bwa ni Ishɛmɛ ike nɛ Ngɛɛ zhɛ mo bu mbisono.

³Ga Abraham gbatụ ti'ishijɛ nu uvwungwa dididi, bee begeji i'wɛ'wɛ iwɛ ụrụpɛ tuhwoŋzhingo, bee umpi izhinyɛci ibwɛ Ifiridi. Bee suji esemberi ubwa eyebi aa 'wa bụ, medenji Azik yɛu ibwɛ, bee zhe no ofwo ata Agwatana go mbiswo bu.

⁴Nụ ụjita ụtatụ, ga Abraham shepi eshe baa kwụbɛ apata taa dụlụ.

⁵Ga Abraham hiɛŋ esemberi ebe ubwa, Nama ma epe ni izhinyɛci gɛ, Gamba ni yɛu gɛ ti zhɛ ta zha peye, tɛ zhibɛ Agwatana nazhɛ te gwure pi hiŋ.

⁶Ga Abraham shepi i'wɛ'wɛ ebe ụrụpɛ tuhwoŋzhingo, bee peteni iŋ Azik yɛu ibwɛ, baa 'waŋnɛ ulwa keeni igwuzhi, aa zhagajɛ ebe yebi.

⁷Ga Azik hiɛŋ bishi bwa ga Abraham, Ada! Ga Abraham jishijɛ bụ, bɛɛ hiɛŋ, Oo, ɛ-yɛu mi, Gamba na! Ga Azik heŋteni bu, bɛɛ hiɛŋ, Hioko, ulwa keeni i'wɛ'wɛ nɛ, ama cee tuba yɛu-ụgwụdụ namɛ iwɛ ụrụpɛ tuhwoŋzhingoo?

⁸Ga Abraham jishijɛ bụ, bɛɛ hiɛŋ, Ɛ-yɛu mi, Agwatana zhɛ mama pana yɛu-ụgwụdụ iwɛ ụrụpɛ tuhwoŋzhingo. Ee hwuri hwɛɛ aba ebe yebi.

⁹Ee zhe ee ci ofwo ata Agwatana ge mbishi bu, ga Abraham mo utukwu-ụrụpɛ apata, bee shemeni i'wɛ'wɛ shiriri, bee umpi yɛu ibwɛ ga Azik, bee wecicinji bu ni i'wɛ'wɛ ebe utukwu-ụrụpɛ.

¹⁰Ga Abraham mbo u'ala ubwa, baa shapɛ igwuzhi maa kwụna yɛu ibwɛ.

¹¹Nazhɛ butumwa ba AGWANGWAMA ba azuba suyanɛ bụ, bɛɛ hiɛŋ, Abraham, Abraham! Ga Abraham leni, bɛɛ hiɛŋ, Oo Gamba na.

¹²Butumwa ata hiɛŋ bụ, Ta mba u'ala bụ maa shɛrɛ yɛu ɛtɛ o, ta nda bụ kaa du iyi elele o, hwuwayɛ go M mepi maa ba sụma Agwatana inyɛsɛ, bi nyashɛ shɛ bụ kaa yɛu bụ mokondo nɛ abi 'yajɛ o.

¹³Ga Abraham shepi eshe baa mbiyanɛ tu udagba uko shikeni na aba ubwa, na kaa mahiuaŋ mu bwa mu kwu ni ikpɛɛnci. Bee zhe baa shapɛ udagba ata, boo to ụrụpɛ nu bwa tụlụkpashɛ ti yɛu ibwɛ.

¹⁴Ga Abraham po apata izeci maa, AGWANGWAMA ubwa ba pana, gana na ta a ta duma ta hwayɛ ɛɛ hiɛŋ, Ni ihiŋhiŋ Ishɛmɛ nɛ AGWANGWAMA a kwụba.

¹⁵Nazhɛ butumwa ata ba AGWANGWAMA ba azuba suyananɛ Abraham na azuba na aka iyebi,

¹⁶bɛɛ hiɛŋ bụ, AGWANGWAMA hiɛŋ, M momo to maa, N zhɛ ma bụ pana uwebiye duwa, iwɛnɛ abɛ njɛ ijɛ abu n nyashɛ shɛ yɛu bụ mokondo.

¹⁷N shiri-unu Ngɛɛ hiɛŋ, N zhɛ ma bụ pana uwebiye, tukaana Ngɛɛ zhɛ mo lono maa ajalalo bu na kaana ufwugwo tugombo gana mkpasu ma azuba keeni gana ahwayɛ itekwu. Ajalalo bu zhɛ na lasatagwụ atwa i'ime ya aba.

¹⁸Tedure na ajalalo bu, Ngɛɛ zhɛ ma pana cɛnjɛ tu unyizo ga kpaaŋ uwebiye, iwɛnɛ ta abụ hwụjɛ-unu mu.

¹⁹Nazhɛ ga Abraham gwure pe esemberi ebe ubwa, ɛɛ ishijɛ, aa zhagajɛ ee hwuri ni Biɛ-shiba, na ga Abraham jɛjɛ.

²⁰Na aba na ti inɛ gɛ henici, ee mbishi Abraham maa, ge Milka du metenji ba buhongwu bu ga Naho miaụŋ.

²¹Go Uz ubwa shɛ yɛu ibwɛ ihiiŋ keeni buhongwu bwa go Buz, nɛ Kɛmuɛl bishi Aram,

²²nɛ Kɛsɛd, na Hazo ne Pildash, ne Jidilaf keeni Bɛtuɛl.

²³Gɛ Bɛtuɛl kaa meci Rebeka. Aba tụndatụ ata kaa ge Milka metenji Naho buhongwu Abraham.

²⁴Biyikwo bwa bu magɛgashɛ na ɛɛ hiɛŋ izeci ibwɛ ge Reuma, meci du Teba, na Gaham, na Tahash keeni Meaka.