Read bassa UMOZHIGO 23 Bible Online

UMOZHIGO 23 - bassa bible

UMOZHIGO 23

¹Tɛzhɛla ta shiywa shi Sara tu namɛ dipi-yebi-nu-woshi-na-shɛba-shi-cenje (127).

²Ga Sara 'wi ni Hibron, na cɛnjɛ ti Kenan, ga Abraham cwɛ-u'wo, boo to-ụkwụla iwɛ ubwa.

³Ga Abraham ishijɛ no olugwo ru'wo ru Sara, bee zhe baa jɛmɛ n-ndumwa nɛ Ɛhit, bɛɛ hiɛŋ,

⁴N shɛ bụlashɛ keeni bugaiŋ na ashashɛ hiŋ, N sengeni ma cɛnjɛ tu na Ngɛɛ zhɛ mo no biyikwo mi no ofwo hiŋ.

⁵Ɛhit ata jishijɛ Abraham, ɛɛ hiɛŋ.

⁶Iyɛri, shɛlaga, gabụ bɛ shɛ uhiu ụ'wụtụ na ashashɛ tu. Shapɛ ru'wo re biyikwo bu maa ni ru nu u'uye tu unaa na zhɛmɛ tebiye. I zasa bụtụ be elele na ashashɛ tu zhɛ ma bụ lakana u'uye tụpana maa ni ru'wo re biyikwo bu o.

⁷Ga Abraham kwuzeni atwa cɛnjɛ ta ata, aba shɛ Ɛhit.

⁸Nazhɛ bee mbishi aŋ, bɛɛ hiɛŋ, Yaa shɛ yaa hiɛ kwụlanɛ maa mo no ru'wo re biyikwo mi epe, asha shɛlaga ma iwɛ mi, maa hi n lụpajɛ Efron yɛu Zoha.

⁹Maa ma m pana ụpangwụ Makpila ata namɛ nu ukwunanga itimɛ ibwɛ, gana elele tu ulumo ibɛ namɛ, N zhɛ ma tụpa maa ma m pana iwɛ maa ma 'yaga ugba na maa mu no no atwa mi na ashashɛ hiŋ.

¹⁰Ge Efron ta kaa jɛjɛ na ashashɛ Ɛhit ata, gɛ Efron na shɛ Bihit ata jishijɛ Abraham ne eshe Ɛhit ata, ibɛ shɛ atwa elele na teni no odubo uba ụshɛpwụ ubwa, bɛɛ hiɛŋ,

¹¹Awo, iyɛri mi, shɛlaga iwɛ mi, N zhɛ ma bụ pana itimɛ ɛtɛ, tụ ụpangwụ ata namɛ na amɛ ibɛ. Gabụ Ngɛɛ zhɛ ma pana ne eshe atwa ga mi Ngɛɛ zhɛ ma bụ pana, no ru'wo re biyikwo bu.

¹²Ga Abraham kwuzeni atwa cɛnjɛ ta ata tɛ Ɛhit.

¹³Ga Abraham mbishi Efron ne eshe atwa cɛnjɛ ta ata, bɛɛ hiɛŋ, Yaa shɛ yaa bụ kwụlanɛ, asha ma bụ tabwa maa hwụjɛ iwɛ mi, maa leshiji ulumo itimɛ ɛtɛ Ngɛɛ zhɛ ma bụ tụpa, ni i'ɛlɛ mi, nazhɛ Ngɛɛ zhɛ mo no ru'wo re biyikwo mi apata.

¹⁴Ge Efron jishijɛ Abraham, bɛɛ hiɛŋ,

¹⁵Iyɛri mi, shɛlaga n-ndumwa mi mi, ucece itimɛ nɛ ulumo ibɛ shɛ azụrụfa arinya akpakwụ-eyebi gbalụ (400), imbe inɛ ɛtɛ zhɛ ya nda na ashashɛ mi na bụụ? No ru'wo re biyikwo bu apata.

¹⁶Ga Abraham shɛlajɛ n-ndumwa mi Efron, bee menji ulumo ukwuribi we ebe ge Efron jɛmɛ, ne eshe Ɛhit ne bimenji ba azụrụfa arinya akpakwụ-eyebi. Ibɛ shɛ ulumo na ahinya a lashɛga na aka ata.

¹⁷Nazhɛ ga Abraham 'yajɛ ya itimɛ Efron nɛ namɛ nu Makpila, nu uwaŋna-banụ Mamre, ti itimɛ ɛtɛ, tụ ụpangwụ ata namɛ ni ibɛ ti i'wɛ'wɛ ye elele nɛ zweni ni itimɛ ɛtɛ tutu ukwunanga itimɛ ɛtɛ kpaaŋ.

¹⁸E peni Abraham cɛnjɛ ta ata gom ne eshe Ɛhit, te eshe atwa elele na teni no odubo uba ụshɛpwụ ubwa.

¹⁹Nazhɛ ga Abraham ni ya biyikwo bwa ga Sara nụ ụpangwụ ata namɛ ni itimɛ Makpila nu uwaŋna-banụ Mamre, ibɛ shɛ inɛ Hibron na cɛnjɛ ti Kenan.

²⁰Gabata Ɛhit ata peni Abraham itimɛ ɛtɛ, keeni ụpangwụ ata namɛ ni ibɛ umɛwɛɛ maa i shɛ cɛnjɛ tu bwa tu na bɛɛ zhɛ no no atwa ubwa.