Read bassa UMOZHIGO 26 Bible Online

UMOZHIGO 26 - bassa bible

UMOZHIGO 26

¹Na aka ga imunɛ layananɛ na cɛnjɛ ta ata, imunɛ ɛtɛ namɛ swooŋ ni inɛɛ nɛ layɛ la na aka Abraham. Ga Azik zhe Gira pa Abimɛlɛk agwuma Afilistia.

²Nazhɛ AGWANGWAMA mama bacɛnganɛ bụ, bɛɛ hiɛŋ bụ, To zwo ni Ijipti o, gɛga na cɛnjɛ tu ga no ofwo na Ngɛɛ zhɛ mɛ bi hiɛŋ maa gɛga.

³Zokwu na cɛnjɛ tu ga, nazhɛ Ngɛɛ zhɛ ma nama na bụ, Ngɛɛ zhɛ ma bu pana-uwebiye. Gabụ na ajalalo bu Ngɛɛ zhɛ ma pana cɛnjɛ tu ga kpaaŋ. N zhɛ ma ụrɛcɛnga kaa unu na Ngee shileni la bishi bu ga Abraham.

⁴N zhɛ mo lononono maa ajalalo bu gembi ufwugwo gana mkpasu ma azuba. N zhɛ kaa ma pana ajalalo bu cɛnjɛ tu ga kpaaŋ, edenji elele na namɛ na cɛnjɛ tu unyizo ga kpaaŋ zhɛ a kwụba uwebiye tedure na ajalalo bu.

⁵Iwɛnɛ ti ga Abraham hwụjɛ la unu mu, baa untanganɛ kaa n-ndumwa mi mi, no shikpogo shi mi keeni andwa elele na Ngee peni bu kpaaŋ.

⁶Ga Azik jɛjɛ ga ni Gira.

⁷Aka na ta atwa ụshɛpwụ ata heŋteni bu iwɛ biyikwo bwa, bɛɛ hiɛŋ aŋ, Bụngwụfwụ mi baa shɛ, bɛ njɛ inyɛsɛ maa duma maa biyikwo bwa ta. Bi hiɛŋ, iwɛ aka na atwa ụshɛpwụ ata zhɛ ma n kwụna, a shapa Rebeka, iwɛnɛ ti ge Rebeka pilanụ igbɛtɛtɛ.

⁸Ama aka na ti bee ilegeji apata, ga Abimɛlɛk agwuma Afilistia shepi eshe na agbahwụ, baa kwụbɛ ti ga Azik ba nda iyɛrɛ ne biyikwo bwa ge Rebeka.

⁹Ga Abimɛlɛk suyanɛ Azik, bɛɛ hiɛŋ bụ, Biyikwo bu baa shɛ gom, iwembe po ɛbi hiɛŋ maa bụngwụfwụ bụ baa shɛɛ? Ga Azik hiɛŋ bụ, Iwɛnɛ ti Ngee heŋshi maa yaa shɛ Ngɛɛ hiɛŋ biyikwo mi baa shɛ, ɛ zhɛ ma n kwụna iwɛ ubwa.

¹⁰Ga Abimɛlɛk hiɛŋ bụ, Imbe nɛ abɛ tɛ njɛɛ? I ga vwɛ cwɛŋ maa bụtụ bu ko na ashashɛ atwa ga, woto ne biyikwo bu, gabụ kaa bi gɛ zhɛ bu ma tu patana tụwụma ti ibɛ.

¹¹Ga Abimɛlɛk tɛtaganɛ atwa ubwa unu kpaaŋ, bɛɛ hiɛŋ, Bụtụ be elele na timengeni bụtụ ga kwo kaa biyikwo bwa, i shɛ tilɛɛ maa ga kwụnɛ bụtụ ata.

¹²Ga Azik bɛrɛ iyimɛyɛ na cɛnjɛ ta ata, iyi nɛ bee jwe nu uywa ata, hwuri gana na tu baa ga bɛrɛ iŋ karɛ dipi yebi. Iwɛnɛ ta AGWANGWAMA peni bu uwebiye.

¹³Iyi kaa ya zhɛmana bu, baa kaana bɛzhɛgba tisha ga tɛkaana uuwa baa shɛ bɛzhɛgba bụ 'wụtụ 'wụtụ.

¹⁴Iyi ibwɛ mabiga i shɛ agwụdụ ni inɛ, i gembi kaa ufwugwo, ta miaụŋ-mu-ugondu bwa kaa mi gembi ufwugwo duwa. Ibɛ po Afilistia kwuni isɛbwɛngwɛ tɛnda nu bwa.

¹⁵Ibɛ po du kaa Afilistia suji ahwayɛ aa sụpacanjɛ a'ibwa meni elele na miaụŋ-mu-ugondu me bishi bwa ga Abraham hinenji la na aka na baa ta namɛ.

¹⁶Ga Abimɛlɛk hiɛŋ Azik, Bana ya na cɛnjɛ tu tu, iwɛnɛ ebi tu hwuri ya ni ikɛnyi ti'yaga duwa.

¹⁷Ibɛ po ga Azik beni apata bee hwuri, boo to udulo ubwa nu ulomu Gira, na baa ga gɛgawa la aka oko.

¹⁸Ga Azik bukereci a'ibwa ata ee hini la na aka bishi bwa, a gata Afilistia sụpacanjɛ la na aba tu'wo ta Abraham, bee pegeni aŋ nzeci ma ata bishi bwa po aŋ la kpaaŋ.

¹⁹Miaụŋ-mu-ugondu Azik mi hini kaa u'ibwa nu ulomu ata, aa kwụbɛ meni ti mɛ cwɛ na cɛnjɛ.

²⁰Ibɛ po a'iywa iyimabiga atwa Gira sukakanɛ a'iywa iyimabiga Azik nu uwuru, ɛɛ hiɛŋ, Atuba ti hini meni mu ga. Ibɛ po boo po u'ibwa ata izeci maa, Uwuru, iwɛnɛ ta a sukakanɛ bụ apata nu uwuru.

²¹Nazhɛ miaụŋ-mu-ugondu Azik mi hineneni u'ibwa meni unya, ee 'wegeneni iwɛ una ata, ibɛ boo po una ata izeci maa i'ime.

²²Baa ishɛjɛ apata, bee hineneni u'ibwa meni unya, e 'weji shi ya iwɛ una ata o, ibɛ boo po una ata izeci maa, Tumama 'yaga, iwɛnɛ po bi hiɛŋ, AGWANGWAMA ti peni tumama 'yaga maa ta nama na cɛnjɛ tu ga.

²³Ga Azik beni apata bee zhe Biɛ-shiba.

²⁴Nazhɛ AGWANGWAMA mama bacɛnganɛ bụ nụ ụjita ata gbaa, bɛɛ hiɛŋ, Gamba n shɛ Agwatana bishi bu ga Abraham, ta nda inyɛsɛ o. N namɛ na bụ, N zhɛ kaa ma bụ pana-uwebiye, Ngɛɛ zhɛ kaa ma kaana ajalalo bu ufwugwo, iwɛ unu na Ngee shileni la yɛu mi ugondu ga Abraham.

²⁵Ga Azik mo utukwu-ụrụpɛ apata, baa zhɛbɛ AGWANGWAMA, boo to du udulo ubwa apata. Nazhɛ miaụŋ mu bwa mu ugondu mi hineneni u'ibwa.

²⁶Ga Abimɛlɛk na Ahuzat biyejilo bwa bu ko keeni Fikol na shɛ uhiu we ejeshi ubwa banɛ ni Gira, ɛɛ zhɛ maa a kwụbɛ Azik.

²⁷Ga Azik hiɛŋ bụ, Iwembe po ahiɛ zhajɛ pi mi gana na ehi n to ni i'ime, ehi n unzhe no olugwo hiiŋ?

²⁸Ɛɛ jishijɛ bụ, ɛɛ hiɛŋ, Tụ kwụbɛ caakwụ maa AGWANGWAMA namɛ na bụ, ɛti hiɛŋ, Ti zhɛ ta twa-unu na bụ ta 'yajɛ ikɛnyi.

²⁹Maa bi zha shɛ bu ma tu nda umungwuta gana na eti bi timengeni shi, atụ bụ njɛ shɛ kaa iyi iwɛ ye elele o, semi uwebiye kiri, eti bu leneni kaa sasana maa hwuri na amɛ-olom. Hwuwayɛ go AGWANGWAMA na kaa ubu peni-uwebiye.

³⁰Ga Azik njɛ iyimɛyɛ baa 'imɛ aŋ ugaiŋ, aa yɛ iyimɛyɛ, ee swe meni.

³¹Nazhɛ aa gbatụ ti'ishijɛ nu uvwungwa dididi, ti iyi heri aa twa-unu. Ga Azik she aŋ, ee beni no olugwo ubwa na amɛ-olom.

³²Gunu ụjita ata gbaa miaụŋ-mu-ugondu Azik mi zhajɛ, mee mbishi bu iwɛ u'ibwa meni uko na ee hini, ɛɛ hiɛŋ bụ, Tu kwụbwa ya meni.

³³Boo po uŋ izeci maa, Unu-tutwa, iwɛbɛ po ɛɛ hiɛŋ izeci ụshɛpwụ ata Biɛ-shiba tutu taa hwayɛ.

³⁴Aka na ge Isụ zhɛrɛ shiywa buhanda te e meci bu, bee zeni eyikwo eyebi, a na shɛ miaụŋ mɛ Ɛhit. Ɛ hiɛŋ izeci bu na bu ko go Judit yɛu Beri, ɛɛ hiɛŋ bu na bi yebi ga Basɛmat yɛu Ilon.

³⁵Eyikwo ata kaa heshigeni Azik keeni Rebeka amɛ.