Read bassa UMOZHIGO 27 Bible Online

UMOZHIGO 27 - bassa bible

UMOZHIGO 27

¹Aka na ti ga Azik injɛ, eshe ubwa namɛ ya dumoo, bee eri shi ba kwụba ya uhwaŋna. Baa suyanɛ Isụ yɛu ibwɛ ihiiŋ, bɛɛ hiɛŋ bụ, Ɛ-yɛu mi. Ge Isụ leni, bɛɛ hiɛŋ bụ, Oo.

²Ga Azik hiɛŋ bụ, Hioko, N injɛ, M mepi shi kaa ụjita tu'wo ti mi o.

³Sugo i'wɛŋnɛ bu tijala hwuwayɛ go, ibɛ shɛ a'inla keeni uta bụ, maa zhe na ambɛ, maa n kwunɛnjɛ usunda.

⁴Iwɛ maa n imanganɛ iyimɛyɛ ụlatụ, gana na Omo lubo, maa n shapɛrɛganɛ uŋ maa ma bu pana-uwebiye umɛwɛɛ nazhɛ Mo 'wo.

⁵Ama ge Rebeka kaa shɛlajɛ ti ga Azik ba duma n-ndumwa ni yɛu ibwɛ ge Isụ, aka na ti ge Isụ sanɛ na ambɛ maa kwunɛ usunda.

⁶Ge Rebeka hiɛŋ Jekob, N hwụjɛ ti ge shibi ba duma n-ndumwa na batagwụ bụ ge Isụ, bɛɛ hiɛŋ bụ,

⁷N kwunɛnjɛ usunda maa n imanganɛ iyimɛyɛ ụlatụ, maa Ma ya uŋ, maa Ma bụ pana-uwebiye ne eshe AGWANGWAMA nazhɛ Mo 'wo.

⁸Ɛ-yɛu mi, hwuga-unu na Ngɛɛ zhɛ ma bu pana hwuwayɛ go.

⁹Zhaga no ofwo unyama iyimabiga maa n sugeni oywoywo iyweywe iyebi nɛ nyemenji, iwɛ maa Ma imanganga iŋ maa i shɛ usunda ụlatụ, gana na ge shibi bo lubo duwa.

¹⁰Maa shepi uŋ pi shibi maa ya, iwɛ maa ma bu pana-uwebiye nazhɛ u 'wo.

¹¹Ama ge Jekob hiɛŋ bino bwa, Hioko, batagwụ mi ge Isụ 'yajɛ tihiŋzhe na tu'waba, tu'waba ti mi kaa tu zasa tihiŋzhe o.

¹²Nekeshi bishi mi zhɛ mo n tumongono hwayɛ, bɛɛ zhɛ ma n ta ugbe maa Ma halakaka bụ, Ngɛɛ zhɛ m mama shapɛrɛganɛ unu-tukalana, i zha shɛ ya sha ya uwebiye o.

¹³Bino bwa hiɛŋ bụ, Ɛ-yɛu mi, go unu-tukalana bụ zhajɛ nu uhiuhiu mu, hwuga-unu mu kiri, maa zhe n sugeni iyweywe ɛtɛ.

¹⁴Ba sanɛ ga, bɛɛ imɛ iŋ, bee suje iŋ no ofwo bino bwa, nazhɛ bino imanganjɛ iyimɛyɛ ɛtɛ ụlatụ, gana na bishi bwa bo lubo.

¹⁵Nazhɛ ge Rebeka suji i'wɛŋnɛ tu'urugono ibiye Isụ yɛu ibwɛ ihiiŋ nɛ namɛ no ofwo ubwa nu udulo, bee urigeni Jekob yɛu ibwɛ tidice.

¹⁶Bee suji i'wɛbɛ ebe iyweywe bee peleji ni imbele i'ɛlɛ keeni i'ilu Jekob no ofwo ata namɛ gbele gbele.

¹⁷Bee peni Jekob usunda ata keeni iyimɛyɛ ɛtɛ ụlatụ, nɛ baa imanganjɛ.

¹⁸Ge Jekob teni ga no ofwo bishi bwa, bɛɛ hiɛŋ bụ, Ada. Ga Azik leni, bɛɛ hiɛŋ bụ, Oo, ɛ-yɛu mi gabụ gaaba nuu?

¹⁹Ge Jekob hiɛŋ bishi bwa, Gamba ge Isụ yɛu bụ ihiiŋ. N nduwa gana na ebi ge me mbishi, ishijɛ gɛga maa yɛ usunda tijala ti mi, iwɛ maa m peni ya uwebiye.

²⁰Ama ga Azik hiɛŋ bụ, Ɛ-yɛu mi, gana na obu gwushigwo uŋ hwuwayɛ go kakayɛɛ? Ge Jekob jishijɛ bụ, bɛɛ hiɛŋ, AGWANGWAMA na shɛ Agwatana bụ m peni maa me gwushije uŋ kakayɛ.

²¹Nazhɛ ga Azik hiɛŋ Jekob, Ɛ-yɛu mi, kaanɛ de izhɛ Mo bu tumongono, maa ma mapa, okwo gabụ ge Isụ na ga gom?

²²Ge Jekob keeni ga izhɛ bo gwumwonu no ofwo Azik bishi bwa, bee timengeni bu, bɛɛ hiɛŋ, Rụhwụŋ rụ bụ rɛ shɛ rụhwụŋ ri Jekob, ama imbele i'ɛlɛ bu i shɛ imbele i'ɛlɛ Isụ.

²³Ibɛ po bee peneni shi bu abashɛ, iwɛnɛ ti imbele i'ɛlɛ ibwɛ 'yajɛ tihiŋzhe gana imbele i'ɛlɛ batagwụ bwa ge Isụ, Gabata bee peni bu waa uwebiye.

²⁴Ga Azik heŋteni bu sasana, bɛɛ hiɛŋ, Yɛu mi ge Isụ hŋ abɛ shɛ gom?. Ge Jekob jishijɛ bụ, bɛɛ hiɛŋ, Gamba kaa.

²⁵Nazhɛ ga Azik hiɛŋ bụ, N shapɛrɛganɛ uŋ, iwɛ maa Ma ya usunda tijala ti yɛu mi maa Ma bu pana-uwebiye. Bee shepirigeni bu uŋ ga, baa yɛ, baa shapɛrɛganɛ bu du meni mu tụ'walụ ta afwafwa bee swe.

²⁶Nazhɛ bishi bwa hiɛŋ bụ, Ɛ-yɛu mi, kaanɛ izhɛ maa n ruwanɛ.

²⁷Gana na bee keeni izhɛ baa ruwanɛ bụ, Ga Azik hwụjɛ ụhiụŋ mi i'wɛŋnɛ nɛ bee urigeni, bee peni bu uwebiye bɛɛ hiɛŋ bụ, Kwụba, ụhiụŋ mi yɛu mi mɛ shɛ gana ụhiụŋ mi itimɛ nɛ AGWANGWAMA peni-uwebiye!

²⁸Ga Agwatana ubu ndanɛ maa cime tu na bu 'walana, maa ga cɛnjɛ tụ bụ ti 'yaga ugwungwu, maa ohiu keeni tụ'walụ ta afwafwa na bu balana.

²⁹Ma nda adua maa ga anya edenji na bụ ndana ugondu, maa ga atwamwa, ne edenji no bu kwuzono. Sha agwuma-ihwɛ miaụŋ-mo-bino bu, ga miaụŋ-mo-bino bu mu no bu kwuzono. Go unu-tukalana 'imɛ bụtụ be elele na ubu keleni-unu, ga uwebiye-tupana nama na bụtụ be elele na ubu peni-uwebiye.

³⁰Gu unu na ti ga Azik hwuweni Jekob uwebiye-tupana, aka na ti ge Jekob banɛ, bɛɛ gɛnjɛ Azik bishi bwa, batagwụ bwa ge Isụ teni ti bee jiye tijala tu bwa.

³¹Baa imanganɛ kaa du bishi bwa iyimɛyɛ ụlatụ. Bɛɛ hiɛŋ bishi bwa, Ada, ishijɛ maa yɛ usunda na Ngɛɛ bu kwunɛnjɛ iwɛ maa m peni-uwebiye.

³²Ga Azik heŋteni bu, bɛɛ hiɛŋ, Gabụ gaaba nuu? Ge Isụ jishijɛ bụ, bɛɛ hiɛŋ. Gamba yɛu bụ ihiiŋ ge Isụ.

³³Nazhɛ ga Azik kwuni tɛzhɛgɛda tebiye, bɛɛ hiɛŋ, Asha gaaba bwaa kwunɛ usunda n shapɛrɛganɛ, harɛ Ngaa yɛwa hwɛɛ nazhɛ abu zhajɛɛ? Ngoo pwonuo bu kaa uwebiye, uwebiye ata kaa shɛwa inɛ ibwɛ.

³⁴Aka na ti ge Isụ hwụjɛ n-ndumwa mu na bishi bwa dumanjɛ, bee keri n'ungwa duwa, bɛɛ hiɛŋ bishi bwa, Oo ada, Gamba na, m peni du uwebiye.

³⁵Ga Azik jishijɛ bụ, bɛɛ hiɛŋ, Asha buhongwu bu, ubwa zhogwo epe n helekeci, boo loshigwo kaa uwebiye bu.

³⁶Ge Isụ jishijɛ bụ, bɛɛ hiɛŋ, I teni shi suu cɛŋ tɛ ɛ hiɛŋ izeci ibwɛ ge Jekob? Kpalụ yebi baa n yɛ imwere. Hioko, bu n yɛwa imwere na tu'wụtụ ti mi, bee leshigeneni hwayɛ uwebiye mu. Nazhɛ bɛɛ hiɛŋ, Asha bi intanɛ shɛ ya ree uwebiye okwo ike iwe mi?

³⁷Ga Azik jishijɛ bụ, bɛɛ hiɛŋ, Hioko, N nduwa bụ agwuma-ihwɛ bu, Ngoo pwonuo bu miaụŋ-mo-bino mu bwa maa mu na ndana bu iyi, Ngoo pwonuo bu ohiu keeni meni mu tụ'walụ ta afwafwa. Ɛ-yɛu mi, imbe kwuuŋ Ngee te eri ma bu ndanaa?

³⁸Ge Isụ shepi rụhwụŋ na azuba, bee kwuni u'wo-tutwa gboo, bɛɛ hiɛŋ bishi bwa, Ada, bu zasa ya uwebiye okwo ike gba hŋ? Ada, Gamba na, m peni du uwebiye.

³⁹Nazhɛ ga Azik jishijɛ bụ, bɛɛ hiɛŋ, Hioko, bɛjɛjɛ bu zhɛ ba sha no ofwo na cɛnjɛ tu zasa ugwungwu, cime kaa ti zha shɛ tu na bu 'walana o.

⁴⁰Uraiŋ bụ tiya zhɛ wa sha nu ujasa, ibɛ ɛbi zhɛ bu na mama lashaga, gabụ kaa bi zhɛ ba sha bujama bo buhongwu ata bụ. Ama aka na abu mama 'yajɛ hwuŋ nazhɛ ɛbi zhɛ ba bana na tijama tụ bụ.

⁴¹Ge Isụ bo imo Jekob na aka ata ya, iwɛ uwebiye na bishi bwa peni bu. Ge Isụ mɛmɛ hiɛŋ, Aka na tụ ụkwụla-tuta u tu'wo te bishi mi gwumwonu hwuŋ, nazhɛ Ngɛɛ zhɛ ma kwụna buhongwu mi ge Jekob.

⁴²Ama e mbishi Rebeka n-ndumwa mu na ge Isụ yɛu ibwɛ ihiiŋ dumanjɛ, ibɛ po baa tumwanɛ maa ga a suyanɛ Jekob yɛu ibwɛ imɛwɛɛ, bɛɛ hiɛŋ bụ. Hioko batagwụ bụ ge Isụ momo zhibogo-ohwulu maa bi zhɛ ma bụ kwụna.

⁴³Ibɛ po ɛ-yɛu mi hwuga-unu mu hwuwayɛ go, maa ishijɛ maa gezhiji maa zhe no ofwo ikwenyi mi ga Laban nu Haran.

⁴⁴Gɛga tugwo apata nu bwa fwalaa, uuwa i ci aka na ti isɛbwɛ nɛ batagwụ bụ 'yajɛ na bụ kezhi.

⁴⁵Uuwa i ci aka na ti isɛbwɛ iyi nɛ abɛ njɛ bụ i 'wi bu, nazhɛ Ngɛɛ zhɛ ma tumwanɛ, maa ɛ bi bɛcinjɛ apata. Iwembe po Ngɛɛ zhɛ ma hi vwunga hwɛɛ ba ehie yebi nu uwaŋna ụjita ukoo?

⁴⁶Nazhɛ ge Rebeka hiɛŋ Azik, N zasa unyasa nu uraiŋ mu tiya iwɛ miaụŋ-mo-o ma Ɛhit na ge Isụ zeni o. Yaa shɛ ge Jekob zeneneni yɛu ya Ɛhit na shɛ gana ga, asha imbe kwuuŋ shɛ tɛzhɛmana tu uraiŋ mu tiyaa?