Read bassa UMOZHIGO 28 Bible Online

UMOZHIGO 28 - bassa bible

UMOZHIGO 28

¹Nazhɛ ga Azik suyanɛ Jekob, baa 'walụ bụ, baa tɛtaganɛ bụ unu, bɛɛ hiɛŋ, Ta zana biyikwo na ashashɛ miaụŋ-mo-o me Ekenan ga o.

²Ishijɛ zhe Padan-aram ni ihwɛ Bɛtuɛl butatugwa bụ, maa zanɛ apata biyikwo na ashashɛ miaụŋ-mo-o mu Laban ikwenyi nobu.

³Ga Agwatana na Hwuri Kpaaŋ ubu peni-uwebiye maa meci miaụŋ mu ufwugwo, maa na kaana ufwugwo tugombo duwa, iwɛ maa shɛ bishi be edenji ofwugwo.

⁴Ga ma bu pana-uwebiye nɛ bee peni la Abraham tutu ajalalo bu, iwɛ maa 'yaga cɛnjɛ tu ga abɛ shɛ bụlashɛ na tuba, tu ga Agwatana peni Abraham!

⁵Ga Azik tumwanɛ ga Jekob, baa sanɛ Padan-aram no ofwo Laban, yɛu Bɛtuɛl Bisiria ata, na shɛ ikwenyi Rebeka, bino Jekob keeni Isụ.

⁶Ti ge Isụ kwụbɛ maa ga Azik pwonuo Jekob uwebiye, baa tumwanua bụ sasana maa zha Padan-aram maa zanɛ biyikwo apata. Gana na ti bee peni bu uwebiye baa tɛtaganɛ bu unu bɛɛ hiɛŋ, Bɛ shɛ shɛ ba zana biyikwo na ashashɛ miaụŋ-mo-o me Ekenan ga o.

⁷Baa kwụbɛ kaa maa ge Jekob hwụjɛ-unu bishi keeni bino bwa, baa sanɛ Padan-aram.

⁸Aka na ti ge Isụ kwụbɛ maa eyikwo Ekenan lemicinji shi bishi bwa ga Azik amɛ o.

⁹Ibɛ po ge Isụ sanɛ no ofwo Ishmɛl yɛu Abraham, baa zanɛ yɛu ibwɛ ge Mehalat bụngwụfwụ Nebaiot, bee medenji eyikwo na baa ga 'yagawa.

¹⁰Ge Jekob genji Biɛ-shiba, baa sanɛ geri bu Haran.

¹¹Bee ci ofwo oko, boo zokwu apata nụ ụjita ata, iwɛnɛ tu uwaŋna teni. Bee suji atayɛ na namɛ apata, baa njɛ utudu uhiuhiu, bee weci apata bee leyi malabụ.

¹²Bee wetegeni apata ụwalabụ, baa kwụbɛ te egenegbe oko shɛnjɛ na cɛnjɛ, ihiŋhiŋ ya aba kaa timengeni tụla. Baa kwụbɛ atumwa-azuba ta a patanganɛ na aba oo mungo ee zwe!

¹³Baa kwụbɛ ta AGWANGWAMA shikeni na azuba aba. Bɛɛ hiɛŋ, Gamba N shɛ AGWANGWAMA na shɛ Agwatana Abraham bishi bu keeni Agwatana Azik, N zhɛ ma bụ pana cɛnjɛ tu ga ebu weci na tuba keeni ajalalo bu,

¹⁴Ajalalo bu kaa zhɛ o gombo ufwugwo gana upwupwutu, ɛ zhɛ kaa o mburusonu tu ụzalụ bu uwaŋna-twonuo keeni ụzalụ bu uwaŋna-banụ tụ ụzalụ tuzuba keeni tuta. Tedure na ajalalo bu kaa Ngɛɛ zhɛ ma pana amwamwa atwa cɛnjɛ tu unyizo ga kpaaŋ uwebiye.

¹⁵Hioko, N namɛ na bụ, Ngɛɛ zhɛ ma bu ngbaraka no ofwo elele na ɛbi zhɛ. N zhɛ me bu gwuricinje na cɛnjɛ tu ga, N zha shɛ ma bu ganga uuwa i ci aka na Ngaa njɛ iyi nɛ Ngee bi shileni-unu ibɛ.

¹⁶Nazhɛ ge Jekob zhinjɛ malabụ, bɛɛ hiɛŋ, AGWANGWAMA namɛ epe gom, Gamba kaa m mepi shi o.

¹⁷Baa njɛ inyɛsɛ, bɛɛ hiɛŋ, Epe 'yajɛ igɛhi tebiye! Epe shɛ shɛ ofwo tɛgadaga o, epe shɛ umwono wa Agwatana keeni odubo tutono na azuba.

¹⁸Ge Jekob ishijɛ nu uvwungwa dididi, bee shepi utayɛ ebe bee ge peteni uhiuhiu ubwa, bee shikicinji uŋ bee dudugeni uŋ manɛbɛ na azuba ubwa.

¹⁹Boo po ofwo ata izeci, bɛɛ hiɛŋ, Bɛtɛl,[31] ama ɛ hiɛŋ la izeci ụshɛpwụ ata maa Luz cala.

²⁰Nazhɛ ge Jekob shileni AGWANGWAMA unu, bɛɛ hiɛŋ, Yaa shɛ ɛbi zhɛ ba nama ne mi, maa n ngbaraka na tahaŋnụ tu ga Ngɛɛ zhɛ, ebi m peni kaa iyimɛyɛ tiya keeni tugwuno tu tu'urugono;

²¹maa Me gwure sasana ni ihwɛ bishi mi na amɛ-olom, asha gabụ bi zhɛ ba sha Agwatana mi.

²²Asha utayɛ ga u titeyinje Ngee shikicinji epe, zhɛ wa sha umwono wa Agwatana. Iyi elele nɛ kaa ebi m peni, N zhɛ ma bu pana iyi-u'umpwa ibɛ.