Read bassa UMOZHIGO 29 Bible Online

UMOZHIGO 29 - bassa bible

UMOZHIGO 29

¹Nazhɛ ge Jekob to tuhwulo tu tahaŋnụ tu bwa, bee ci cɛnjɛ ta atwa uwaŋna-banụ.

²Gana na tu baa mbiyanɛ baa kwụbɛ u'ibwa meni uko na namɛ ni itimɛ ike, baa kwụbɛ tu unyama wa agwụdụ weteji to dongonu uŋ orubwo atatụ, iwɛnɛ po nu u'ibwa ata ɛɛ piɛ agwụdụ ata meni. Utayɛ na kaa ubi nu unu u'ibwa ata gembi duwa.

³Aka na tu unyama wa agwụdụ ata ụlwatagwụ apata kpaaŋ, nazhɛ a'iywa-agwụdụ zhɛ o ushigo utayɛ nu unu u'ibwa ata, nazhɛ ɛɛ zhɛ ɛ piɛ agwụdụ meni, nazhɛ o gwuricingo sasana utayɛ ata nu unu u'ibwa ata.

⁴Ge Jekob heŋteni a'iywa-agwụdụ ata, bɛɛ hiɛŋ, Eyejilo mi, cee ahiɛ banɛɛ? Ɛɛ jishijɛ bụ, ɛɛ hiɛŋ, Tu banɛ nu Haran.

⁵Bee heŋteni aŋ, bɛɛ hiɛŋ, Hi mepi suu bụtụ ata ɛɛ hiɛŋ ga Laban yɛu Naho? Ɛɛ jishijɛ bu, ɛɛ hiɛŋ, Iiŋ ti mepi bu.

⁶Bee heŋteni aŋ, bɛɛ hiɛŋ, Bu namba lapiya kaa? Ɛɛ jishijɛ bụ, ɛɛ hiɛŋ, bu namba lapiya, kwụba, ge Rechɛl yɛu ibwɛ yo o ta ye ci na agwụdụ!

⁷Bɛɛ hiɛŋ aŋ, Hioko ma, uwaŋna te gembi, shɛ aka na maa o sotulonu iyimabiga urubwo uko na o, pana ma agwụdụ meni, maa hi suji aŋ na tiyaga.

⁸Ama ɛ jishijɛ bụ, ɛɛ hiɛŋ, Ti te eri shi o, semi aka na unyama wa agwụdụ sotulonu hwayɛ kpaaŋ, ee ushiji utayɛ nu u'ibwa, nazhɛ ɛti zhɛ ta pana agwụdụ meni.

⁹Aka na ti ge Jekob ta duma n-ndumwa na aba, ti ge Rechɛl pushe na agwụdụ bishi bwa, iwɛnɛ po ubwa ba ngbaraka aŋ.

¹⁰Aka na ti ge Jekob kwụbɛ Rechɛl yɛu Laban na shɛ ikwenyi bino bwa, bee munji bee ushiji utayɛ ata nu unu u'ibwa, bee peni agwụdụ Laban ikwenyi bino bwa meni.

¹¹Nazhɛ ge Jekob ruwanɛ Rechɛl, bee shepi rụhwụŋ na azuba baa cwɛ-u'wo iwɛ unyasa ụ'wụtụ na baa 'yajɛ.

¹²Ge Jekob mbishi Rechɛl maa ubwa 'yajɛ ụmatụ ne bishi bwa, maa ubwa kaa shɛ yɛu Rebeka, ge Rechɛl gezhiji bee mbishe bishi bwa.

¹³Aka na tu ga Laban hwụjɛ unabarɛ Jekob yɛu bụngwụfwụ bwa, bee gezhiji maa twa nu bwa, baa ruwanɛ bụ, bee kwutenji unu ubwa nu una ubwa, bɛɛ zɛrijɛ bu ni ihwɛ ibwɛ. Ge Jekob mbishi Laban iyi elele kpaaŋ.

¹⁴Ga Laban hiɛŋ bụ, Tu'waba ti mi abɛ shɛ gom! Ge Jekob jɛjɛ nu bwa upiana uko.

¹⁵Ga Laban hiɛŋ Jekob, Iwɛnɛ abɛ 'yajɛ ụmatụ ne mi hŋ ɛbi zhɛ bu ma ndana ugondu arahaŋ? M mbishi gana na aba jala maa mu na bu tụpa.

¹⁶Ga Laban kaa 'yajɛ miaụŋ-mo-o mi yebi. Ɛ hiɛŋ izeci inɛ i'wɛtwɛ ge Lia, ɛɛ hiɛŋ izeci inɛ tidice ge Rechɛl.

¹⁷Eshe Lia gwuriseni suu, ama ge Rechɛl pilanụ tebiye.

¹⁸Ge Jekob lubi Rechɛl, bɛɛ hiɛŋ Laban, N zhɛ ma bu ndana ugondu shiywa shi cenje iwɛ ma ma zana yɛu bụ tidice ge Rechɛl.

¹⁹Ga Laban hiɛŋ bụ, I zhɛmɛ maa Ma bu pana bụ uhwuri maa ma pana bụ binya bụtụ, gɛga pi mi.

²⁰Ibɛ po ge Jekob njɛ ugondu shiywa shi cenje iwɛ Rechɛl, i shanɛ bu du gana maa ijitɛ ɛtɛ twa sụ ufwugwo, iwɛnɛ tu boo lubo bu.

²¹Nazhɛ ge Jekob hiɛŋ Laban, M peni ya biyikwo mi maa Ma zana bụ, iwɛnɛ tu Ngoo hwuwo ugondu mu.

²²Ga Laban sotulonu etwenyi ụshɛpwụ ata kpaaŋ, baa njɛ iyimɛyɛ unyasa.

²³Ama tụ ụrụmɛ shɛ, bee shepi yɛu ibwɛ ge Lia no ofwo Jekob, shɛ ge Rechɛl ya o, ge Jekob weci nu bwa.

²⁴(Ga Laban shepi Zilpa bujama bwa bo o, bee peni yɛu ibwɛ ge Lia maa bu no mbiyono bu.)

²⁵Ti iyi heri nu uvwungwa, yaa shɛ ya ge Lia. Ge Jekob hiɛŋ Laban, Imbe nɛ abɛ n njɛɛ? Shɛ iwɛ Rechɛl suu Ngaa bu ndanɛ ugondu? Iwembe po ebi n helekecii?

²⁶Ga Laban jishijɛ bụ, bɛɛ hiɛŋ, Tɛ njɛ shɛ gana ata na cɛnjɛ tu tu o, maa peni buhongwu bụtụ tụmbụla hiiŋ na batagwụ bwa o.

²⁷Asha ụrɛcɛnga ulade uko na bu na ata, nazhɛ ta bụ pana Rechɛl maa n ndanɛ ugondu shiywa shi cenje shi nya.

²⁸Ge Jekob njɛ ga gana ata, baa ụrɛcɛnjɛ ulade uko na bu na ata, nazhɛ ga Laban peni bu yɛu ibwɛ ge Rechɛl maa zana sasana.

²⁹(Ga Laban shepi Bilha bujama bwa, bee peni yɛu ibwɛ ge Rechɛl maa bu no mbiyono bu.)

³⁰Gabata ge Jekob weci du ne Rechɛl, bu lubi tuba Rechɛl bee hwuri Lia. Ibɛ po baa ndanɛ Laban ugondu shiywa shi cenje shi nya.

³¹Aka na ta AGWANGWAMA kwụbɛ maa o imo Lia, bee kepishinji igwune ibwɛ i tumata maa mata miaụŋ, ama ge Rechɛl tuba shɛ bu'ulo.

³²Ge Lia le ofubo, bee meci yɛu-ye-eyi, boo po iŋ izeci ti gɛ Rubɛn,[32] bi hiɛŋ, AGWANGWAMA kwụbɛ ụbaụta mu, bwolo mi kaa zhɛ mo n lubo ya hwuwayɛ gom.

³³Bee le ofubo sasana, bee meci yɛu-ye-eyi, bɛɛ hiɛŋ, iwɛnɛ AGWANGWAMA hwụjɛ maa o mo n imo, ibɛ po bee m peni yɛu gɛ ye eyi sasana, boo po iŋ izeci ti ge Simion.[33]

³⁴Bee le ofubo sasana, bee meci yɛu-ye-eyi, bɛɛ hiɛŋ, Bwolo mi zhɛ bo togwu ne mi na aka ga, iwɛnɛ ti Ngee metenji bu miaụŋ-me-eyi mu tatụ, iwɛbɛ po boo po iŋ izeci ti ge Livai.[34]

³⁵Bee le ofubo sasana, bee meci yɛu-ye-eyi, bɛɛ hiɛŋ, N zhɛ ma shɛtana AGWANGWAMA na aka ga, iwɛbɛ po boo po iŋ izeci ti go Juda,[35] nazhɛ bee genji ya tumata.