Read bassa UMOZHIGO 31 Bible Online

UMOZHIGO 31 - bassa bible

UMOZHIGO 31

¹Ge Jekob hwụjɛ n-ndumwa mu na miaụŋ-me-eyi mu Laban ma duma nu uhiuhiu ubwa, mɛɛ hiɛŋ, Ge Jekob suji iyi elele nɛ bishi tu 'yajɛ. Ni iyi nɛ bishi tu 'yajɛ kaa baa shɛ bɛzhɛgba.

²Ge Jekob kwụbɛ maa eshe Laban zhɛshɛ ya nu bwa gana na ta a ga shɛ la cala o.

³Nazhɛ AGWANGWAMA hiɛŋ Jekob, Gwulo na cɛnjɛ te eshi bu no ofwo atwa bụ, N zhɛ kaa ma nama na bụ.

⁴Iwɛbɛ po ge Jekob tumwanɛ butumwa maa ga suyanɛ Rechɛl, ne Lia, maa a zhajɛ ne ehilo na agwụdụ ubwa namɛ.

⁵Bɛɛ hiɛŋ aŋ, N kwụbɛ maa eshe bishi hiŋ zhɛshɛ ya ne mi gana na aa ga shɛ la cala o. Ama kaa Agwatana bishi mi namɛ ne mi.

⁶Hi mepi maa N ndanɛ bishi hiŋ ugondu ni ikɛnyi nɛ Ngaa 'yajɛ kpaaŋ.

⁷Ama kaa bishi hiŋ n yɛ imwere waa, bee sheyinji titeni ti mi kpalụ umpwa, ama Agwatana leneni shi bu kaa maa ma n nda iyi iwɛ ye elele o.

⁸Yaa shɛ ga Laban hiɛŋ, A na tubana ti tiwere were, aba zhɛ a sha titeni ti mi, asha unyama wa agwụdụ ata kpaaŋ zhɛ wa mata a na tubana ti tiwere were. Yaa shɛ bɛɛ hiɛŋ kaa a na ti'nyeci ti ti'nyɛ 'nyɛ 'nyɛ aba zhɛ a sha titeni ti mi. Asha agwụdụ ata kpaaŋ zhɛ a mata a na ti'nyeci ti ti'nyɛ 'nyɛ 'nyɛ.

⁹Gana Agwatana suji iyimabiga bishi hiŋ bee n untegeni ta.

¹⁰Aka na ta aka ci maa iyimabiga meci, ti Ngee shepi eshe Ngaa kwụbɛ nụ ụwalabụ na Ngee wetegeni, te epi na 'yajɛ ti'nyeci ti tiwere were, na tubana keeni a na ti'nyeci ti ti'nyɛ 'nyɛ 'nyɛ o mungo agwụdụ.

¹¹Nazhɛ butumwa ba Agwatana ba azuba m mbishi bɛɛ hiɛŋ, E-Jekob. Ngɛɛ hiɛŋ bụ Oo!

¹²Bɛɛ hiɛŋ, Shapa eshe bu maa kwụbɛ epi na o mungo unyama wa agwụdụ, kpaaŋ aba 'yajɛ ti'nyeci ti tiwere were, na tubana keeni a na ti'nyeci ti ti'nyɛ 'nyɛ 'nyɛ. N kwụbɛ iyi elele nɛ ga Laban ma bu nda kpaaŋ.

¹³Gamba N shɛ Agwatana na ubu bananɛ la ni Bɛtɛl, no ofwo ata ebu dudugeni la utayɛ ata ebi shikicinji manɛbɛ, no ofwo ata ebu n shileni-unu. Ishijɛ hwuwayɛ go maa beni na cɛnjɛ tu ga, maa gwuri na cɛnjɛ tu na ee bi meci la.

¹⁴Nazhɛ ge Rechɛl keeni Lia jishijɛ bụ, ɛɛ hiɛŋ, Urobwo we elele, kwo kaa iyi-yo-ogwu ye elele i ta vwɛ suu iwe tu ni ihwɛ bishi tu?

¹⁵Bu ta tɛ rɛcɛ shɛ suu gana agaiŋ? Bu tu songwo, baa yɛwa kaa ukwuribi na aa cɛpɛ bụ iwɛ tu.

¹⁶I'wɛŋnɛ nɛ kaa Agwatana leshiji bishi tu kpaaŋ i shɛ ya inee tu na miaụŋ mu tu. Hwuwayɛ go, asha nda iyi elele nɛ Agwatana bi mbishi.

¹⁷Ge Jekob ishijɛ ga, bee petengeni miaụŋ mu bwa me eyi keeni eyikwo ubwa na aba nruhondo.

¹⁸Bee suji iyimabiga ibwɛ kpaaŋ keeni i'wɛŋnɛ ibwɛ nɛ baa ga 'yajɛ nu Padan-aram. Ibɛ shɛ iyimabiga nɛ bee ge leshiji maa zha no ofwo bishi bwa ga Azik na cɛnjɛ ti Kenan.

¹⁹Ga Laban sanɛ maa hwaga tihiŋzhe ta agwụdụ ubwa, ge Rechɛl zunji ntatanuwaŋ me bishi bwa.

²⁰Ge Jekob inanjɛ Laban Bisiria ata, bi mbishi shi bu maa N zhɛ mo hwulo ujiyo.

²¹Bɛɛ ishijɛ bee suji iyi elele nɛ baa 'yajɛ, bee keshi Urefu Yufretis, baa ngbaracɛ geri ba cɛnjɛ ti Ishɛmɛ Giliad.

²²Aka na ti yee ci jitɛ itɛtu, nazhɛ ee mbishi Laban maa ge Jekob gozhigwo boo hwulwo ujiyo.

²³Bee suji atwa na baa 'yajɛ, bee urigeni Jekob jitɛ icenje, bee jiteni bu na cɛnjɛ ti Ishɛmɛ Giliad.

²⁴Ama Agwatana zhaganɛ Laban Bisiria ata nụ ụwalabụ nụ ụjita, Bɛɛ hiɛŋ bụ, Nda pece maa kede mbishi Jekob n-ndumwa me elele o; okwo mu na mi biye kwo kaa mu na mụ wɛ o.

²⁵Ga Laban jiteni Jekob, aka ata ge Jekob kaa towo uda ubwa na cɛnjɛ ti Ishɛmɛ Giliad.

²⁶Ga Laban hiɛŋ Jekob, Imbe nɛ abɛ njɛɛ? Abɛ n yɛ imwere, ebu suje miaụŋ mi mi mo o gana atwa na ujasa yɛ.

²⁷Iwembe po ebi gezhije tusweci tusweci, abɛ n yɛ kaa imwere, ebi m mbishi shi, iwɛ maa me bi she nu unyasa, na azunga, no shikoko keeni ugwoje ti'nyamaa?

²⁸Iwembe po ebi n leneni shi maa ma nda ajalụ mi keeni miaụŋ mi mi ongboo? Ụlagwụ abɛ njɛ bana.

²⁹N nga 'yajɛ ukpahiŋ maa Ma bụ nda iyi iwɛ, ama Agwatana shibi jɛmɛ n-ndumwa ne mi hwayɛ ga nụ ụjita, bɛɛ hiɛŋ, Kede Mo bu mbiso n-ndumwa mi biye kwo kaa mu na mụ wɛ o.

³⁰Gabụ na kaa bu hwulwo ya hwuwayɛ go, iwɛnɛ ti ihwɛ bishi bu ma bu dwa eshe tebiye. Ama iwembe po tuba ebu zunje ntatanuwaŋ mi mii?

³¹Ge Jekob jishijɛ Laban, bɛɛ hiɛŋ, N njɛ inyɛsɛ, iwɛnɛ Ngee heŋshi maa bi zhɛ ba lashɛga hwayɛ miaụŋ mụ bụ mo o ni i'ɛlɛ mi ni iji.

³²Bụtụ be elele na obu to hwayɛ ntatanuwaŋ mụ bụ ugbe no ofwo ubwa, asha bụtụ ata zha shɛ bo bino. Yalagaga maa vwɛ iyi elele nɛ i shɛ inɛɛ bu nɛ Ngaa shapɛ maa suji iŋ ne eshe miaụŋ-mo-bino bu. Ge Jekob kaa mepi shi maa ge Rechɛl ubwa zunje mu o.

³³Ga Laban teni na amɛ udulo Jekob, bee teni nu una Lia keeni una wa ajama ata o o eyebi, bee dwelekeci mu. Baa banɛ nu udulo Lia, bee teni una Rechɛl, ama bi te shi mu kaa ugbe o.

³⁴Ge Rechɛl kaa suji ntatanuwaŋ ma ata bee peteni mu tuta tu ufuridi irihende, baa jɛjɛtanɛ mụ. Ga Laban kaa hikekeni ofwo elele nu udulo ata, ama bu kwụbɛ shɛ mụ o.

³⁵Ge Rechɛl hiɛŋ bishi bwa, Ada, ta nda isɛbwɛ iwɛnɛ ti Ngee eri shi mɛ ishijɛ ne eshe bu o; N njɛ shɛ iyi o. Gabata ga Laban dwelekeci ntatanuwaŋ ma ata, ama bi te shi mu kaa ugbe o.

³⁶Nazhɛ ge Jekob njɛ isɛbwɛ, baa sukakanɛ Laban nu uwuru, bɛɛ hiɛŋ bụ, Imbe shɛ tipindo ti mii? Imbe shɛ iwɛwɛ nɛ Ngaa bɛ njɛ upo ebu n urigeni tutu epee?

³⁷Okwo te ebi timengengeni i'wɛŋnɛ mi kpaaŋ, imbe shɛ i'wɛŋnɛ ihwɛ bu nɛ obu to ugbee? Vwɛ iŋ ne eshe miaụŋ-mo-bino bu keeni miaụŋ-mo-bino mi maa a jɛmɛ ụshɛrɛya mu na bu maa e mepi bụtụ na n-ndumwa mɛ zhɛmɛ.

³⁸Shiywa shɛ ga woshi Ngaa namɛ na bụ, ta agwụdụ bụ, ti iyweywe bu yo o beseji shi o, N yɛ shɛ kaa unyama wa adagba bụ o.

³⁹Okwo inɛ ye elele nɛ usunda ehilo kwụnɛ, N shepi shi iŋ no ofwo bu o, Gamba ni ikɛnyi mi ma tụpa iŋ, okwo inɛɛ nɛ ee zunji nu uwaŋna kwo kaa nụ ụjita, ni i'ɛlɛ mi aba dwalakaka iŋ hwɛɛ.

⁴⁰Gana Ngaa namɛ na, oholobwo ma n kwụna na aka bu uwaŋna, mpiala ma n kwụna na aka bụ ụjita. N weci shi okwo malabụ o.

⁴¹Shiywa shɛ ga woshi Ngaa namɛ ni ihwɛ bu, M bu ndanɛ ugondu shiywa umpwa-na-shɛba-shi-neshi iwɛ maa Ma zana miaụŋ mụ bụ mi yebi. Shiywa shi cihiŋ Ngaa bɛjɛ iyimabiga bụ, ebi sheyingenji kaa titeni ti mi kpalụ umpwa.

⁴²Yaa shɛ shɛ iwɛnɛ Agwatana eshi mi, na shɛ Agwatana Abraham keeni Azik namɛ ne mi, bi gɛ zhɛ bu mo n jicingo ni i'ɛlɛ yo ohondo gom. Agwatana kaa kwụbɛ ụbaụta mu keeni ugondu na Ngaa njɛ, ibɛ po baa bu tɛtaganɛ-unu hwayɛ ga nụ ụjita.

⁴³Nazhɛ ga Laban jishijɛ Jekob, bɛɛ hiɛŋ, Miaụŋ mu ga mo o mɛ shɛ miaụŋ mi mi, miaụŋ mu ga ma aba mu tuwee wee kaa mɛ shɛ miaụŋ mi mi. Unyama wa agwụdụ ga kpaaŋ ụ shɛ agwụdụ mi; iyi elele nɛ kaa abu kwụbɛ epe, i shɛ inee mi. Ama imbe kwuuŋ Ngee te eri ma nda maa ma untangana miaụŋ mu ga mi mi mo o hwayɛ ga, kwo kaa miaụŋ ma aba mu tuwee wee mu na ee mecii?

⁴⁴Zhajɛ, maa tu twa-unu atuba na bụ hwuwayɛ go. Mizha tu suteni epe atayɛ maa a shɛ useyida unu mu tutwa na bụ.

⁴⁵Ge Jekob shepi ga utayɛ, bee shikicinji uŋ wam maa ụ shɛ useyida wa aba.

⁴⁶Ge Jekob hiɛn miaụŋ-mo-bino bwa, Zanjɛ ma atayɛ, hi suteni aŋ epe. Ee suje ga atayɛ, aa njɛ utukwu, nazhɛ aa yɛ iyimɛyɛ no ofwo utukwu ata.

⁴⁷Ga Laban po uŋ izeci, bɛɛ hiɛŋ, Jiga-sahaduta.[44] Ama ge Jekob tuba po uŋ izeci, bɛɛ hiɛŋ, Galid.[45]

⁴⁸Ga Laban hiɛŋ, Utukwu ga ubwa shɛ useyida na namɛ na ashashɛ bụ ne mi hwayɛ ga. Iwɛbɛ po boo po uŋ izeci, bɛɛ hiɛŋ, Galid.

⁴⁹Ga Laban peeneni ofwo ata izeci, bɛɛ hiɛŋ, Mizpa,[46] iwɛnɛ ti bɛ hiɛŋ, Ge eshe AGWANGWAMA ngbaraka ashashɛ bụ ne mi, na aka na otu momo gongonu.

⁵⁰Yaa shɛ kaa aba nda miaụŋ mi mi mo o tawɛ tawɛ, kwo kaa yaa shɛ abu zanɛ eyikwo anya maa keeni miaụŋ mi mi, okwo ti yaa zasa bụtụ be elele namɛ na ashashɛ tu, teyinje tuba maa Agwatana ubwa shɛ useyida na namɛ na ashashɛ bụ ne mi.

⁵¹Ga Laban hiaaŋnanɛ Jekob, Kwụba utukwu ga utayɛ Ngee shikicinji na ashashɛ bụ ne mi.

⁵²Atayɛ ga oo to utukwu epe a shɛ useyida, iwɛ maa N shɛ shɛ mɛ kɛshicɛ utukwu ga wa atayɛ maa ma zhajɛ pụ bụ maa Ma bụ nda iyi nɛ zhɛ ma bu gwumana o, gabụ du kaa bɛ shɛ shɛ bɛ kɛshicɛ utukwu ga wa atayɛ maa zhajɛ pi mi maa n njɛ iyi nɛ zhɛ ma n gwumana o.

⁵³Ga Agwatana Abraham, na Agwatana Naho, na shɛ Agwatana bishi ba aba jɛmɛ ụshɛrɛya na namɛ na ashashɛ tu. Gabata ge Jekob to igɛhi bishi bwa ga Azik.

⁵⁴Ge Jekob kwụnɛ iyimabiga, boo to ụrụpɛ ni Ishɛmɛ ɛtɛ, baa suyanɛ miaụŋ-mo-bino bwa, aa yɛ iyimɛyɛ. Aka na te e hwuwi iyimɛyɛ tiya, aa namɛ apata uuwa gi iyi yo holo.

⁵⁵Ga Laban gbatụ ti'ishijɛ nu uvwungwa dididi ti iyi heri, baa ruwanɛ ajalụ ubwa keeni miaụŋ mu bwa mo o, bee peni aŋ uwebiye. Nazhɛ bee beni apata bee ji ni ihwɛ ibwɛ.