Read bassa UMOZHIGO 35 Bible Online

UMOZHIGO 35 - bassa bible

UMOZHIGO 35

¹Agwatana hiɛŋ Jekob, Zhaga mungo ni Bɛtɛl, maa gɛga apata, maa m meni utukwu-ụrụpɛ apata. Gamba n shɛ Agwatana na bu bananɛ la caakwụ, aka na te ebi gezhigeni la batagwụ bụ ge Isụ.

²Ge Jekob hiɛŋ atwa ihwɛ ibwɛ, ta atwa elele na namɛ nu bwa, 'Waŋ ma tuwa ta atwa cɛnjɛ ti nya tu na tu namɛ na ashashɛ hiŋ, maa hi mama njɛ shɛshɛshɛ, maa hi sheyinji i'wɛŋnɛ hiŋ tu'urugono.

³Ti ishɛjɛ ma epe, maa tu munji ma Bɛtɛl, iwɛ maa ma mana Agwatana utukwu-ụrụpɛ apata. Ubwa na m mbiyeni la na aka tiriri ti mi. Baa namɛ kaa ne mi no ofwo elele na Ngee zhe.

⁴Ibɛ po ee peni Jekob tuwa ta atwa cɛnjɛ ti nya tu na aa ga 'yajɛ, ta shɛtakwụ sha shɛcɛbɛ sha aba. Ge Jekob ni shu nu ucilo ukpekpeshi uko na gwumwonu ni Shɛkɛm.

⁵Gana na ti ge Jekob na miaụŋ mu bwa mu kwuni tubana apata. Ibɛ po inyɛsɛ i'wɛtwɛ banɛ no olugwo Agwatana yee ubi ashɛpwụ na rungwutwonu aŋ, ibɛ po ee urigeni shi aŋ ya nu usumwa.

⁶Ge Jekob zhe bee ci Luz (ibɛ shɛ Bɛtɛl), na namɛ na amɛ cɛnjɛ ti Kenan, medenji atwa elele na baa 'yajɛ.

⁷Boo mo apata utukwu-ụrụpɛ. Boo po ofwo ata izeci maa Agwatana Bɛtɛl, iwɛnɛ ti yaa shɛ apata Agwatana mama bacɛnganɛ bụ la, aka na ti bee gezhigeni batagwụ bwa ge Isụ.

⁸Ge Debora, na 'yagajɛ la Rebeka 'wi, ee ni bu nu ucilo ukpekpeshi ata namɛ tuta ti Bɛtɛl. Iwɛbɛ po boo po ofwo ata izeci maa, Ukpekpeshi u'wo-tutwa.

⁹Aka na ge Jekob banɛ nu Padan-aram, Agwatana bananɛ bụ sasana caakwụ, bee peni bu uwebiye.

¹⁰Nazhɛ Agwatana hiɛŋ bụ, Ɛ hiɛŋ la izeci bu ge Jekob, ama a zha shɛ mɛ bi hiɛŋ ya ge Jekob o, ama ɛ zhɛ mɛ bi hiɛŋ ya ge Isrɛl. Gabata ga Agwatana po bu izeci ti ge Isrɛl.

¹¹Ibɛ po Agwatana hiɛŋ bụ, Gamba n shɛ Agwatana na Hwuri Kpaaŋ, na mata miaụŋ maa hi na kaana ufwugwo tugombo. Edenji ofwugwo swoswoswo zhɛ a banɛ no olugwo bu, bi zhɛ kaa ba sha bishi ba shɛgwuma.

¹²Gabụ Ngɛɛ zhɛ ma pana cɛnjɛ ta ata Ngee peni la Abraham keeni Azik. N zhɛ kaa ma pana tụ ajalalo bu a na zhɛ ma bụ 'wa.

¹³Nazhɛ Agwatana munji bee genji bu no olugwo ata baa jɛmɛ n-ndumwa nu bwa.

¹⁴Ibɛ po ge Jekob shikicinji utayɛ titeyinje nu uluji ata Agwatana dumanjɛ n-ndumwa nu bwa, bee dudugeni uŋ meni mu tụ'walụ ta afwafwa keeni manɛbɛ nu uhiuhiu ubwa.

¹⁵Ibɛ po ge Jekob po uluji ata na Agwatana dumanjɛ n-ndumwa nu bwa izeci, maa Bɛtɛl.

¹⁶Nazhɛ ge Jekob na atwa umwamwa ubwa shɛdɛnjɛ tahaŋnụ ta aba, te e beni ni Bɛtɛl, aka na ta ahanga ta vwɛ cwɛŋ ma e ci Efrat, ibɛ tulumongwu ta tumata tu kwuni Rechɛl tɛnda, ta a pana bụ ụbaụta.

¹⁷Aka na tu baa nda ụbaụta no tulumongwu ta ata, nazhɛ biyikwo na bo mbiyono biyikwo tumata hiɛŋ bụ, E-Rechɛl, ta nda inyɛsɛ o, bi zhɛ ba mata yɛu-ye-eyi inyɛ.

¹⁸Ama gana na tu boo gwumwonu ihwungwɛ tudwa, boo po iŋ izeci ti gɛ Bɛnoni,[52] ama bishi bwa po iŋ izeci ti gɛ Bɛnjamin.[53]

¹⁹Aka na ti ge Rechɛl 'wi, ee ni bu nu uhwaŋna ata zhɛ Efrat (ibɛ shɛ Bɛtlɛhɛm.)

²⁰Ge Jekob cimbeni utayɛ nu u'uye ubwa. U te cimbeni ba nu u'uye ata Rechɛl taa hwayɛ.

²¹Ge Isrɛl shɛdɛnjɛ tahaŋnụ tu bwa boo to udulo ubwa na aba ashɛkpa Ede.

²²Aka na ti ge Isrɛl ta jɛjɛ na cɛnjɛ ta ata, ibɛ gɛ Rubɛn weci ne Bilha biyikwo bishi bwa bu magɛgashɛ, ge Isrɛl kaa hwụjɛ iŋ, yaa gwumanɛ bụ tebiye. Miaụŋ-me-eyi mi Jekob kaa mu namɛ umpwa-na-muba-mi-yebi.

²³Miaụŋ-me-eyi mi Lia na: gɛ Rubɛn na ge Jekob meci hiiŋ, ne Simion, ne Livai, na Juda, ne Isaka keeni Zɛbulon.

²⁴Miaụŋ-me-eyi mi Rechɛl na: go Josɛf keeni Bɛnjamin.

²⁵Miaụŋ-me-eyi mi Bilha bujama Rechɛl bo o na: ga Dan keeni Naftali.

²⁶Miaụŋ-me-eyi mi Zilpa bujama Lia bo o na: ga Gad keeni Ashɛ. Mu na ata muba mɛ shɛ miaụŋ-me-eyi mi Jekob mu na ee metenji bu nu Padan-aram.

²⁷Ge Jekob ci ihwɛ bishi bwa ga Azik ni Mamre kwo kaa ni Kiriat-aba (ibɛ shɛ Hɛbron) no ofwo na ga Abraham na Azik jɛjɛ la.

²⁸Shiywa sha Azik shɛ namɛ dipi-tɛtu-nu-talacɛ (180) te e meci bu.

²⁹Ga Azik injɛ tebiye nazhɛ bee 'wi, nazhɛ miaụŋ mu bwa me eyi ge Isụ keeni Jekob mi ni bu.