Read bassa UMOZHIGO 40 Bible Online

UMOZHIGO 40 - bassa bible

UMOZHIGO 40

¹Na aka oko ti inɛ gɛ henici, ibɛ bipeni ba agwuma Ijpiti meni mu tuswa keeni bɛnjɛ bi iyimɛyɛ pindeni agwuma-ihwɛ aba na shɛ agwuma Ijipti.

²Ibɛ po ga Faro njɛ isɛbwɛ na anjɛ-ugondu ata ubwa eyebi.

³Bee suji aŋ bee zweni nu umwono-tishi no ofwo uhiu wa angbaracɛ, no ofwo na ee kepi du Josɛf.

⁴Nazhɛ uhiu wa angbaracɛ peni aŋ Josɛf maa bu na ngbaraka aŋ, baa 'yaka aŋ. A namɛ na ti'ima ta ata te ilegeji fwalaa.

⁵Ee wetegeni awalabụ hwɛɛ aba ebe yebi na amɛ ụjita uko, ibɛ shɛ bipeni ba agwuma meni mu tuswa keeni bɛnjɛ bi iyimɛyɛ ba agwuma Ijipti, a na namɛ na tukapa nu umwono-tishi. Bụtụ bụtụ wetegeni una ubwa ụwalabụ, ụwalabụ bụtụ bụtụ kaa 'yajɛ ecilo ubwa.

⁶Aka na tu go Josɛf zhajɛ no ofwo aba nu uvwungwa, baa kwụbɛ te shishe sha aba shɛ hashaganụ.

⁷Ibɛ po go Josɛf heŋteni aŋ, bɛɛ hiɛŋ, Iwembe po shishe shi hiŋ shɛ hashaganụ hwayɛ i ci gana gaa?

⁸Ɛɛ jishijɛ Josɛf, ɛɛ hiɛŋ, Tu wetegeni awalabụ, i zasa kaa bụtụ okwo bu ko na eri mo ti mbiso ecilo aba o. Go Josɛf hiɛŋ aŋ, Shɛ Agwatana suu 'yajɛ ecilo awalabụ tụdụma? Ma hi tabwa m mbishi aŋ ma.

⁹Nazhɛ uhiu bipeni ba agwuma meni mu tuswa mbishi Josɛf ụwalabụ ubwa, bɛɛ hiɛŋ bụ, N kwụbɛ ukparɛ ufwafwa na namɛ nu umbe mu, nụ ụwalabụ.

¹⁰Ukparɛ ata ufwafwa 'yajɛ shɛ'walụ shɛ tatụ, waa shɛ maa wa saba, tusaba tu bwa tu banɛ, ofwo ata na te cimbengeni 'weri tụ'walụ ta afwafwa tu na tɛ nɛ.

¹¹Ngaa 'waŋnɛ ya ukwopi Faro nu u'ala mu, Ngee shepi tụ'walụ ta ata ta afwafwa Ngee piri tu nu ukwopi ebe, Ngee utegeni Faro ukwopi ata nu u'ala ubwa.

¹²Nazhɛ go Josɛf hiɛŋ bụ, Ecilo ibɛ nɛ, shɛ'walụ sha ata shɛ tatụ, shɛ shɛ ijitɛ itɛtu.

¹³Na amɛ ijitɛ gɛ itɛtu, ga Faro zhɛ ma bụ bacɛnga nu umwono-tishi, bɛɛ zhɛ mo bu gwuricingo na ajɛjɛ bụ, bi zhɛ kaa ba pana Faro ukwopi nu u'ala ubwa gana ala aba pana bụ meni hiiŋ.

¹⁴Ama ne me teyinje hwuŋ aka na ti yaa bụ zhɛmanɛ, maa hieci inyɛmɛnyɛmɛ mi. Ma bu tabwa maa mbishi Faro iwe mi maa e m becinji du nu umwono ga tishi.

¹⁵Iwɛnɛ po tuzunje ee n zunje gom na cɛnjɛ te Ehibru, te epe sasana N njɛ shɛ iyi elele nɛ lanɛ maa e n shiyeni nu umwono ga tishi o.

¹⁶Aka na tu uhiu bɛnjɛ bi iyimɛyɛ kwụbɛ maa ecilo ụwalabụ ubupeni ba agwuma meni zhɛmɛ, bɛɛ hiɛŋ Josɛf, N wetegeni du ụwalabụ. N-ngwumi ma akara mu tatụ mu patanganɛ nu uhiuhiu mu.

¹⁷Iyimɛyɛ tuswoswoswo nɛ bɛnjɛ bi iyimɛyɛ ndanɛ Faro zweni ni igwumi ɛtɛ patanɛ na azuba, ama shanụnụ sha ya iyimɛyɛ ɛtɛ patanɛ nu uhiuhiu mu.

¹⁸Go Josɛf jishijɛ bụ, bɛɛ hiɛŋ, Ecilo ibɛ nɛ, n-ngwumi ma ata mu tatụ mɛ shɛ ijitɛ itɛtu.

¹⁹Wanabeyiko ga Faro zhɛ ma bu bacɛnga nu umwono-tishi, bi zhɛ mo bu mwo uhiuhiu, nazhɛ bɛɛ zhɛ ba swata ru'wo rụ bụ nụ ụ'wụ'wụ maa shanụnụ shɛ yɛ usunda bụ.

²⁰Nụ ụjita ụtatụ, na shɛ ụjita titeyinje ta tumata tu Faro, baa njɛ iyimɛyɛ unyasa iwɛ anjɛ-ugondu ubwa kpaaŋ. Bɛɛ bɛcinjɛ uhiu bipeni ba agwuma meni keeni bɛnjɛ bi iyimɛyɛ ne eshe anjɛ-ugondu ubwa.

²¹Bee gwuricinji bipeni ba agwuma meni no ohwolu ubwa, bee peni Faro ukwopi ata ni i'ɛlɛ ibwɛ.

²²Ama ga Faro sweci ga uhiu bɛnjɛ bi iyimɛyɛ, gana na tu go Josɛf ge mbishi aŋ ecilo ibɛ gom.

²³Okwo ti yaa shɛ gana ata uhiu bipeni ba agwuma meni nu ukwopi teyinji shi ya iwɛ Josɛf o, ama isɛbwɛ ibwɛ 'wi bu.