Read bassa UMOZHIGO 43 Bible Online

UMOZHIGO 43 - bassa bible

UMOZHIGO 43

¹Imunɛ nɛ atwa cɛnjɛ ti Kenan a ya kaa hwuleji.

²Aka na ta atwa ihwɛ Jekob hwuwi iyimɛyɛ nɛ ɛɛ sɛ la ni Ijipti tiya, bishi ba aba hiɛŋ aŋ, Zhaga ma sasana hi ti sɛnjɛ iyimɛyɛ dice.

³Ama go Juda hiɛŋ bụ, Bụtụ ata iti tɛtaganɛ-unu tebiye, bɛɛ hiɛŋ, Hi zha shɛ hia kwụba hwuŋ ya eshe mi o, semi go buhongwu ata hiŋ zhagajɛ ne hiŋ.

⁴Yaa shɛ ebi ge leni maa buhongwu tu zhagaga no tu, ti zhɛ to zwo maa tɛ bi sɛnjɛ iyimɛyɛ.

⁵Ama yaa shɛ abu lacɛ maa ba zha, asha ti zha shɛ to zwo. Iwɛnɛ po bụtụ ata iti hiɛŋ, Yaa shɛ buhongwu ata hiŋ zhagajɛ shɛ ne hiŋ, hi zha shɛ hia kwụba hwuŋ ya eshe mi o.

⁶Ge Jekob hiɛŋ aŋ, Iwembe kwuŋ po ahiɛ ma nda iwɛ i ci gana gaa? Ehi mbishi bụtụ ata maa hi ta 'yajɛ ba buhongwu bi nyaa?

⁷Ɛɛ jishijɛ bụ, ɛɛ hiɛŋ, Bụtụ ata utu unseni iwe tu, ti iwɛ miaụŋ-mo-ono tu cɛrɛ cɛrɛ, bɛɛ hiɛŋ, Bishi hiŋ ta namba hŋ? Hi ta 'yajɛ yɛu-bino inyɛ suu? Iyi nɛ eti mbishi bu i shɛ ajɛshɛgwa i'unsengene gɛ. Gaaba ge mepi maa bi zhɛ bɛ hiɛŋ, Shapɛ ma buhongwu ata hiiŋ?

⁸Nazhɛ go Juda hiɛŋ bishi bwa, Lono ma yɛu gɛ zhagaga ne mi, maa tɛ ishijɛ to hwulo, iwɛ maa ta ya uraiŋ maa kede to 'wo, ta atuba, tu gabụ keeni miaụŋ mu tu mi tidice dice o.

⁹N zhɛ ma sha bile-bi-i'ɛlɛ ibwɛ, ni i'ɛlɛ mi ɛbi zhɛ ba dwalakaka bụ. Yaa shɛ Ngee bu gwuricingeni shi bu maa mo shikicingo bu nu umbe bu lapiya, asha Gamba n zhɛ ma 'waŋna tijama tụ bụ tutu unyizo-nom.

¹⁰Yaa shɛ ati ga njɛ shɛ ti'insu, aga sha tu gwulwo okwo kpalụ yebi.

¹¹Nazhɛ bishi ba aba hiɛŋ aŋ, Yaa shɛ tilɛɛ maa i shɛ gana ata, asha 'waŋna ma upwaŋ tụ'walụ ti biye tɛ cɛnjɛ tu ga na alapa hiŋ, maa hi peni ugwomina ata, 'waŋna ma tụ'walụ tụ ụ'wụ'wụ na aa nda manɛbɛ mu unibi dice, ti iswɛ dice, no tu ko ti iturɛre muru keeni izɛgwu ụ'wụ'wụ na aa ya, nɛ ɛɛ hiɛŋ almond.

¹²'Waŋna ma ukwuribi unya, 'waŋna ma du ukwuribi ata ee hi gwuricingeni la na azhɛka hiŋ, nekeshi utegidi aa njɛ la feye.

¹³Shapa ma du buhongwu hiŋ ma hi sanɛ ko. Zhaga ma sasana no ofwo bụtụ ata.

¹⁴Ga Agwatana na Hwuri Kpaaŋ njɛ maa bụtụ ata hieci inyɛmɛnyɛmɛ hiŋ, iwɛ maa me hi gwuricingeni yɛu-bino hiŋ keeni Bɛnjamin. Yaa shɛ Ngaa vwụnjɛ miaụŋ, ga ma vwunga.

¹⁵Etwenyi ata suji ga apwaŋ ata, ee suji du ukwuribi unya aa 'waŋnɛ keeni Bɛnjamin, ɛɛ ishijɛ aa sanɛ ee zwi ni Ijipti, ee zhe ee shikeni na agba Josɛf.

¹⁶Aka na go Josɛf kwụbɛ Bɛnjamin na amɛ aba, bɛɛ hiɛŋ uhiu ihwɛ ibwɛ, Tecinje etwenyi ata nu umwono. Kwụna hwayɛ usunda maa imanganjɛ, etwenyi ga zhɛ a ya iyimɛyɛ ne mi nu uwaŋna go.

¹⁷Ibɛ uhiu ihwɛ ibwɛ njɛ ga gana na go Josɛf hiɛŋ bụ, bee tecinji aŋ nu umwono Josɛf.

¹⁸Ama atwa ata a nda inyɛsɛ iwɛnɛ ee tecinji aŋ nu umwono Josɛf. Ɛɛ hiɛŋ, Iwɛ ukwuribi ala ee ti gwuricingeni na azhɛka tu na aka ala ihiiŋ feye upo ee ti tecinje na amɛ umwono ga caakwụ, iwɛ maa dwalakaka ohwolu maa ma tu sukakana maa mo tu ubo, maa ma tu nda ajama, maa sugo nzhinyacɛ mu tu.

¹⁹Ibɛ po ee munji no ofwo uhiu ihwɛ Josɛf, aa jɛmɛ n-ndumwa nu bwa no odubo umwono ata, ɛɛ hiɛŋ bụ.

²⁰Iyɛri, tu zwe la na aka ihiiŋ otu so iyimɛyɛ.

²¹Aka na eti ci ofwo tuzokwu eti kepeshenji azhɛka tu, atụ kwụbɛ ukwuribi bụtụ bụtụ tu nu unu ụzhɛka ubwa, ukwuribi ata kaa ta ulwa, tu 'waŋnɛ uŋ sasana.

²²Tu 'waŋnɛ du ukwuribi unya maa ta sa iyimɛyɛ sasana. Ti mepi shi kaa bụtụ na zweni ukwuribi tu na amɛ azhɛka tu o.

²³Bɛɛ jishijɛ aŋ, bɛɛ hiɛŋ, Ga amɛ hiŋ gwuriseni, ta nda ma inyɛsɛ o, Agwatana hiŋ na shɛ Agwatana bishi hiŋ, ubwa caakwụ ihi zweneni ukwuribi ata na azhɛka hiŋ, shibwonu N loshigwo la ukwuribi hiŋ. Nazhɛ baa bacɛnganɛ aŋ Simion.

²⁴Aka na bụtụ ata tecinje aŋ nu umwono Josɛf, bee peni aŋ meni ee fwoci shivwɛvwɛjɛ sha aba. Bee peni du nzhinyacɛ ma aba iyimɛyɛ.

²⁵Aa imanjɛ upwaŋ we ebe aa ga 'waŋnɛ maa e peni Josɛf ti bee gwure nu uwaŋna. Iwɛnɛ po a hwugwa maa apata ɛɛ zhɛ a ya iyimɛyɛ nu bwa.

²⁶Aka na go Josɛf jiye ni ihwɛ, ee tecinje upwaŋ ebe aa ga 'waŋnɛ nu umwono, ee kwuzeni bu.

²⁷Bee heŋteni aŋ iwɛ ulapiya wa aba, bɛɛ hiɛŋ, Bishi hiŋ, iyɛri ɛtɛ ahiɛ jɛmɛ la iwɛ ubwa, bu ta namba lapiya kaa? Bu ta ya ba uraiŋ hŋ?

²⁸Ɛɛ jishijɛ bụ, ɛɛ hiɛŋ, Bujama ata bụ na shɛ bishi tu, bu namba lapiya, bu ta ya ba du uraiŋ. Ee kwuzenji aa 'walụ bụ.

²⁹Nazhɛ go Josɛf shepi eshe baa kwụbɛ buhongwu bwa gɛ Bɛnjamin, na aa banɛ amɛ oko nu bwa, bɛɛ hiɛŋ aŋ, Buhongwu ga hiŋ bu umɛwɛɛ ehi m mbishi la iwɛ ubwa na hŋ? Ɛ-yɛu mi, ga Agwatana bi peni-uwebiye!

³⁰Nazhɛ go Josɛf njɛ izɛlɛgwu kakayɛ bee zhe taa na amɛ umwono ubwa bɛɛ cwɛ-u'wo apata, iwɛnɛ po inyɛmɛnyɛmɛ buhongwu bwa shɛ bụ.

³¹Baa fwacɛ eshe ubwa, nazhɛ baa banɛ, baa mama njɛ hwungbɛ uuwa bɛɛ hiɛŋ, Salaga ma iyimɛyɛ.

³²Ee shi inɛ Josɛf swooŋ, ee shi inɛ atagwụ Josɛf swooŋ, ee shi inɛ ye Ejipti a na a ya iyimɛyɛ no Josɛf swooŋ. Iwɛnɛ po Ejipti yɛ shɛ iyimɛyɛ ne Ehibru o, iwɛnɛ ti yaa shanɛ Ejipti iyi-tupwaŋ.

³³Aa gɛgajɛ ya nu umbe Josɛf na tumama 'wanụ te kwune na bụtụ bụ 'wụtụ i ci bụtụ bu umɛwɛɛ, ibɛ po etwenyi ata mama mbiyanganụ, ya dama aŋ.

³⁴Ee peshinji iyimɛyɛ nu ugbogolo iyimɛyɛ Josɛf, ee peni aŋ. Ama iyimɛyɛ Bɛnjamin gembi yee hwuri inɛ bụtụ be elele i ci kpalụ ta. Gabata aa yɛ iyimɛyɛ, ee swe iyi tuswa, aa njɛ unyasa nu bwa.