Read bassa UMOZHIGO 45 Bible Online

UMOZHIGO 45 - bassa bible

UMOZHIGO 45

¹Na aka ata go Josɛf eri shi mama ima ya hwungbɛ ne eshe atwa na shikekeni nu bwa o. Baa uganɛ, bɛɛ hiɛŋ, Ga bụtụ be elele beni nu umwono ga. I zasa ga bụtụ okwo bu ko na namɛ nu bwa nu umwono ata, na aka na ti bee meme mbiseni miaụŋ-mo-ono bwa o.

²Bee tileni nu u'wo gboo. Atwa Ijipti hwụjɛ ụŋ, ee mbishi kaa atwa ihwɛ Faro unabarɛ ibɛ.

³Go Josɛf hiɛŋ miaụŋ-mo-ono bwa, Gamba go Josɛf na. Bishi mi ta namba hŋ? Ama miaụŋ-mo-ono bwa eri shi mɛ jishijɛ bụ o, iwɛnɛ ti yee hwuri dama aŋ na agba ubwa.

⁴Nazhɛ go Josɛf hiɛŋ miaụŋ-mo-ono bwa, Ma hi tabwa, kaanɛ ma izhɛ pi mi. Ee keeni ga izhɛ. Bɛɛ hiɛŋ aŋ, Gamba yɛu-bino hiŋ go Josɛf ata ahiɛ sanjɛ la na cɛnjɛ ti Ijipti na.

⁵Kede shɛmɛ shi hiŋ shɛ hashɛganụ ya o, ta mama 'yaganụ ma kaa du isɛbwɛ ahiɛba hiɛba iwɛnɛ ahiɛ n sanjɛ la epe o. Agwatana bata n tumwanɛ maa me hwure umbe ne hiŋ iwɛ maa Me hi bicingo.

⁶Iwɛnɛ po shiywa shi yebi na ee te kwuni imunɛ-tiya na cɛnjɛ tu ga, yaa ta vwɛ shiywa shɛ ta ta a ta zha shɛ a hwaŋ itimɛ maa e jwe iyimɛyɛ.

⁷Agwatana kaa n tumwanɛ maa me hwure umbe ne hiŋ iwɛ maa Ma hi untangana maa hiɛ vwɛ na cɛnjɛ tu unyizo, maa Ma hi lashɛga tedure nu uhwaŋna ga ụrụhwajɛ.

⁸Shɛ ahiɛba hi n tumwanɛ epe o, ama Agwatana. Ubwa kaa n njɛ maa ma 'yaga ohwolu na hwuri a na elele no ofwo agwuma, maa Ma sha agwangwama ihwɛ ibwɛ hwɛɛ, keeni uhiu cɛnjɛ ti Ijipti kpaaŋ.

⁹Nda ma kakayɛ maa hi zhe pe bishi mi maa hi mbishi bu maa, Yɛu bụ go Josɛf hiɛŋ, Agwatana njɛ bụ uhiu cɛnjɛ ti Ijipti kpaaŋ. Zwe kakayɛ, tɛ njɛ ti'insu o.

¹⁰Gabụ bi zhɛ ba gɛga na cɛnjɛ tu Goshɛn, bi zhɛ mo bu dongonu, tu gabụ, ta miaụŋ mụ bụ, ta ajalụ bụ, ta agwụdụ bụ, ti iyweywe bu, ti inɛ bụ keeni iyi elele nɛ abɛ 'yajɛ hwɛɛ.

¹¹Apata Ngɛɛ zhɛ ma bụ ima u'ala, iwɛnɛ ta shiywa shi imunɛ-tiya shɛ ta vwɛ shɛ ta, iwɛ maa kede tukofwo tụ bụ 'imɛ, ta atwa ihwɛ bụ keeni iyi elele nɛ abɛ 'yajɛ o.

¹²Hiɛ kwụbɛ kaa du hwuwayɛ go ni ikɛnyi hiŋ, to buhongwu mi gɛ Bɛnjamin maa nu unu mu Ama duma n-ndumwa ne hiŋ.

¹³Zhaga mbiso ma bishi mi ụjɛrụma na Ngaa 'yajɛ ni Ijipti kpaaŋ, keeni iyi elele nɛ ahiɛ kwụbɛ. Nda ma kakayɛ maa hi zɛrijɛ bishi mi epe.

¹⁴Nazhɛ bee leyiteni buhongwu bwa gɛ Bɛnjamin ni i'ilu, baa cwɛ-u'wo. Gɛ Bɛnjamin du kaa cwɛ-u'wo ni i'ilu ibwɛ ta a mama imanụ.

¹⁵Nazhɛ baa ruwanɛ atagwụ ubwa hwɛɛ, baa twanɛ aŋ u'wo. Nazhɛ miaụŋ-mo-ono bwa mu dumanjɛ n-ndumwa nu bwa.

¹⁶Aka na atwa ihwɛ Faro hwụjɛ urishi ata, maa bwonu miaụŋ-mo-ono Josɛf mi zhajɛ. Yee lemicinji Faro amɛ ta anjɛ-ugondu ubwa du hwɛɛ.

¹⁷Ibɛ po ga Faro hiɛŋ Josɛf, Hiɛŋ miaụŋ-mo-ono bu, ge petengeni iyimabiga ya aba i'wɛŋnɛ iyimɛyɛ maa e gwuri na cɛnjɛ ti Kenan.

¹⁸Ga a shapɛ bishi hiŋ, ta atwa ihwɛ hiŋ maa hi zhajɛ pi mi. N zhɛ ma hi pana kaa cɛnjɛ tu na tɛ zhɛmɛ ni Ijipti, ahiɛba hi zhɛ hia ya tuwebiye ta cɛnjɛ tu ga.

¹⁹Pana aŋ unu sasana maa ge suji ihɛŋtu cɛnjɛ ti Ijipti nɛ idɛkwɛ yo kokwulo iwɛ miaụŋ ma aba mi tidice dice keeni eyikwo aba, maa a shapɛ bishi ba aba epe.

²⁰Kede a 'wa ya iwɛ iyi ya aba nɛ ɛɛ zhɛ ɛ gɛnjɛ o. Iwɛnɛ po iyi ibiye cɛnjɛ ti Ijipti kpaaŋ zhɛ ya sha inɛ ya aba.

²¹Ibɛ po miaụŋ mi Jekob mɛ njɛ gana ata. Go Josɛf peni aŋ ihɛŋtu cɛnjɛ gana na tu ga Faro peni bu unu, bee peni aŋ iyimɛyɛ maa a na ya nu uhwaŋna.

²²Bee peni bụtụ bụtụ na amɛ aba utogwo u tuhwuŋtono, ama bi peni Bɛnjamin azụrụfa arinya kpakwụ-ni-dipi-yebi (300) keeni otogwo a ta.

²³Baa tumwananɛ bishi bwa nzhinyacɛ umpwa, mu na mu 'waŋnɛ i'wɛŋnɛ nɛ i'wɛŋnɛ ibiye Ijipti zweni, tu nzhinyacɛ mo o umpwa mu na mu 'waŋnɛ iyimɛyɛ inyɛ keeni inɛɛ nɛ bishi bwa zhɛ nɛ yɛ hwuŋ nu uhwaŋna ti bee ci.

²⁴Nazhɛ bee genji miaụŋ-mo-ono bwa ee hwuri. Gana na tɛ ɛ zhɛ, bɛɛ hiɛŋ aŋ, To 'wogo ma hwayɛ nu uhwaŋna o.

²⁵Iwɛ ecilo ata ee beni ga ni Ijipti, ee munji ee ci cɛnjɛ ti Kenan no ofwo bishi ba aba ge Jekob.

²⁶Ee mbishi bu maa go Josɛf ta namba, ubwa du kaa shɛ uhiu cɛnjɛ ti Ijipti kpaaŋ. Ohwulu po bu iyi bwuu bwuu bwuu, iwɛnɛ po bu tɛtanɛ shɛ n-ndumwa ma aba rishe o.

²⁷Ama aka na ee mbishi bu n-ndumwa mu na go Josɛf mbishe aŋ kpaaŋ, baa kwụbɛ du kaa ihɛŋtu cɛnjɛ nɛ go Josɛf tumwanɛ maa a shapɛ bụ, nazhɛ ohwulu bishi ba aba ge Jekob kezhe.

²⁸Ge Jekob hiɛŋ, Inɛ go gwumwa ya, yɛu mi go Josɛf ta namba. N zhɛ ma kwụba bụ nazhɛ mo 'wo.