Read bassa UMOZHIGO 47 Bible Online

UMOZHIGO 47 - bassa bible

UMOZHIGO 47

¹Go Josɛf teri atagwụ ubwa a ta baa sanɛ, bee mbiseni Faro, bɛɛ hiɛŋ bụ, Bishi mi na miaụŋ-mo-ono mi, medenji unyama wa agwụdụ aba, ti inɛ ya aba keeni iyi elele nɛ aa 'yajɛ na cɛnjɛ ti Kenan a zhajɛ, aa namba na cɛnjɛ tu Goshɛn.

²Nazhɛ bee mbiseni Faro atagwụ ubwa.

³Ga Faro heŋteni atagwụ ubwa, bɛɛ hiɛŋ aŋ, Imbe shɛ ugondu hiiŋ? Ɛɛ jishijɛ Faro, ɛɛ hiɛ, Miaụŋ mu ga bụ mu ugondu mɛ shɛ abɛjɛ iyimabiga gana eshi aba.

⁴Ɛɛ hiɛŋ sasana Faro, Ti zhajɛ maa ta gɛga na cɛnjɛ tu ga. Iwɛnɛ po ambɛ tiya zasaba iwɛ agwụdụ miaụŋ-mu-ugondu ga bụ o, iwɛnɛ ti imunɛ-tiya hwulej na cɛnjɛ ti Kenan. Ta bu tabwa hwuwayɛ go maa iti leneni maa ta gɛga na cɛnjɛ tu Goshɛn.

⁵Nazhɛ ga Faro hiɛŋ Josɛf, Bishi bu na miaụŋ-mo-ono bu zhajɛ pụ bụ.

⁶Cɛnjɛ ti Ijipti ta ti bi tileneni. Gɛgɛcɛnga bishi bu na miaụŋ-mo-ono bu na cɛnjɛ tu na ti ngezeni hwɛɛ nu Goshɛn. Yaa shɛ kaa ebi mepi atwa na vwengenji na ashashɛ aba, tulono aŋ maa a shɛ angbaracɛ iyi mi mabiga.

⁷Nazhɛ go Josɛf zeriji bishi bwa ge Jekob bee tecinji bu, bee mbiseni Faro, ge Jekob peni Faro uwebiye.

⁸Ga Faro heŋteni Jekob bɛɛ hiɛŋ, Shiywa shɛ mba abu namɛ te e bi mecii?

⁹Ge Jekob jishijɛ Faro, bɛɛ hiɛŋ, Shiywa shɛ na Ngaa namwawaŋ shɛ namɛ dipi-yebi-nu-talacɛ gba (130), shɛ ta twa sụ ufwugwo, Ngaa na ya kaa uraiŋ ụwɛ. Shɛ ta kpayawụ sụ kaa na shiywa shɛ na eshi mi namɛ la nu unyizo ga o.

¹⁰Ge Jekob peni Faro uwebiye, nazhɛ baa banɛ na agba ubwa.

¹¹Nazhɛ go Josɛf gɛgɛcɛnjɛ bishi bwa keeni miaụŋ-mo-ono bwa na cɛnjɛ tu na bee peni aŋ maa a 'yaga ni Ijipti. Ibɛ shɛ ofwo na cɛnjɛ ti ngezeni nụ ụzhɛ, to gwumwonu nụ ụshɛpwụ ata ɛɛ hiɛŋ Ramesis, nu gana na tu ga Faro peni bu unu.

¹²Go Josɛf ba pana bishi keeni miaụŋ-mo-ono bwa iyimɛyɛ, ta atwa ihwɛ bishi bwa, nu gana na tu ufwugwo wa amwamwa aba namɛ hwɛɛ.

¹³I zasa ofwo elele na iyimɛyɛ namɛ ya na cɛnjɛ ta ata kpaaŋ o, iwɛbɛ po imunɛ-tiya hwuleji. Ugiriri keri atwa cɛnjɛ ti Ijipti keeni cɛnjɛ ti Kenan, iwɛ imunɛ nɛ namɛ apata.

¹⁴Go Josɛf sotulonu ukwuribi na aa 'yajɛ na cɛnjɛ ti Ijipti keeni cɛnjɛ ti Kenan kpaaŋ, iwɛ iyimɛyɛ nɛ oo so. Bee suji ukwuribi ata nu umwono Faro.

¹⁵Aka na oo so iyimɛyɛ nu ukwuribi na namɛ na cɛnjɛ ti Ejipti keeni cɛnjɛ ti Kenan hwɛɛ, ibɛ po Ijipti kpaaŋ zhajɛ pu Josɛf, ɛɛ hiɛŋ bụ, Iti peni iyimɛyɛ. Iwembe po ɛbi zhɛ bu ma tu ngbaraka maa to 'woo? Iwɛnɛ po ukwuribi tu kaa hwuwowu hwɛɛ.

¹⁶Go Josɛf jishijɛ aŋ, bɛɛ hiɛŋ, Yaa shɛ ukwuribi hiŋ hwuwowu hwɛɛ, asha suje ma iyimabiga hiŋ maa ma hi pana iyimɛyɛ tụlụkpashɛ ti iyimabiga hiŋ.

¹⁷Ee suje ga iyimabiga ya aba no ofwo Josɛf, go Josɛf peni aŋ iyimɛyɛ tụlụkpashɛ ti idɛkwɛ ya aba, na agwụdụ aba, ni iyweywe ya aba, ni inɛ ya aba keeni nzhinyacɛ ma aba. Bi peni aŋ iyimɛyɛ tụlụkpashɛ ti iyimabiga ya aba kpaaŋ nu uywa ata.

¹⁸Aka na tu uywa ata kwunanjɛ, aa zhajɛ pu bwa nu uywa na 'wa una ata, ɛɛ hiɛŋ bụ, Iyɛri tu, ti zha shɛ ta bụ swakana o. Ukwuribi tu hwuwowu kpaaŋ ni iyi tusa, bu loshigwo la kaa iyimabiga tu kpaaŋ. I zasa kaa iyi elele ta tu vwanɛ maa ta bu pana ya o, asha semi tukwugwu tu tu keeni cɛnjɛ tu tu.

¹⁹Iwembe po ɛbi zhɛ bu ma tu ngbaraka maa to 'wo ne eshe bu, ta atuba, ta cɛnjɛ tu tuu? Utu so ta cɛnjɛ tu tu iwɛ iyimɛyɛ, ti zhɛ ta sha ajama Faro ta cɛnjɛ tu tu, maa iti peni izɛgwu maa ta bila ne shihilo shi tu, maa kede cɛnjɛ tɛ shɛ osombo.

²⁰Ibɛ po go Josɛf senji Faro cɛnjɛ ti Ijipti kpaaŋ. Iwɛnɛ po Ejipti senji shihilo sha aba kpaaŋ iwɛ imunɛ nɛ ya kwụna aŋ. Ibɛ po cɛnjɛ tɛ shɛ ya ma tu Faro.

²¹Go Josɛf suji atwa ata baa njɛ aŋ ajama, te kwuni nu ukwunanga Ijipti zalụ uko i ci ukwunanga zalụ uyebi.

²²Cɛnjɛ to onongbo kiri bee se shi. Iwɛnɛ po onongbo 'yajɛ urobwo wa aba na ga Faro peni aŋ, ibɛ po a ya iyi nu urobwo wa aba na ga Faro peni aŋ. Iwɛbɛ po ee senji shi cɛnjɛ ta aba.

²³Nazhɛ go Josɛf hiɛŋ atwa ata, Hioko ma, N hi sowo ta cɛnjɛ ti hiŋ hwayɛ ga iwɛ Faro. Hwuwayɛ go izɛgwu nɛ iwɛ maa hiɛ bɛrɛ ne shihilo shi hiŋ.

²⁴Aka na aka iyimɛyɛ tugwubo ci hwuŋ, hi zhɛ hia pana Faro iyi itana. Inɛ ɛtɛ vwɛ ya, i shɛ inee hiŋ, iwɛ izɛgwu ye ehilo hiŋ, ti iwɛ iyimɛyɛ ikɛnyi hiŋ, ti iwɛ nhwaŋ mi hiŋ hwɛɛ, ti iwɛ atwa hiŋ na ta gwumwatagwụ.

²⁵Ɛɛ jishijɛ bụ, ɛɛ hiɛŋ, Iyɛri, tɛ njɛ ugwoje bu te ebi ti bicinji. Bɛ tɛ zhɛmanɛ, ti zhɛ ta sha ajama Faro.

²⁶Gabata go Josɛf shiri undwa ata na cɛnjɛ ti Ijipti, maa ga Faro, ubwa shɛ bu na 'yaga iyi itana ye elele. Undwa ata te shikeni ba tutu ta hwayɛ, asha cɛnjɛ to onongbo kiri tɛ shɛ shɛ ma tu Faro.

²⁷Gabata E'isrɛl jɛjɛ ni Ijipti na amɛ cɛnjɛ tu Goshɛn, a shɛ azhɛgba na tuba. Aa mata miaụŋ, aa kaana ufwugwo tugombo duwa.

²⁸Ge Jekob namɛ na cɛnjɛ ti Ijipti shiywa umpwa-na-shɛba-shi-cenje. Shiywa shi Jekob hwɛɛ shɛ namɛ dipi-yebi-na-buhanda-na-shɛba-shi-cenje te e meci bu (147).

²⁹Aka na ta aka gwumwonu maa ge Isrɛl 'wi, baa suyanɛ yɛu ibwɛ go Josɛf, bɛɛ hiɛŋ bụ, Yaa shɛ ɛbi zhɛ bu ma n ndana uwebiye tebiye, asha shiyono u'ala bụ tuta ti i'unte mi hwuwayɛ go maa n shileni-unu u tɛkana. Ma bu tabwa, maa kede n ni, ni Ijipti ga o.

³⁰Ama yaa shɛ Ngee 'wi gana eshi mi, m becinji ni Ijipti maa n ni no ofwo na ee ni aŋ la. Go Josɛf jishijɛ bụ, bɛɛ hiɛŋ, N zhɛ ma nda gana na ɛbi hiɛŋ.

³¹Ge Jekob hiɛŋ bụ, N shileni-unu maa bi zhɛ ba nda gana ata, bee shileni bu ga unu. Nazhɛ ge Isrɛl to bizhiri ni ihiŋhiŋ ogodo ubwa.