Read bassa UMOZHIGO 49 Bible Online

UMOZHIGO 49 - bassa bible

UMOZHIGO 49

¹Ge Jekob suyanɛ miaụŋ mu bwa me eyi, bɛɛ hiɛŋ aŋ, Sotulonu ma kwororo, iwɛ maa Mo hi mbiso iyi nɛ zhɛ me hi vwutongono geri-be-eshe.

²Oo ahiɛba miaụŋ-me-eyi mi Jekob, zhajɛ ma hi sotulonu maa hi shiri acɛbɛ nu n-ndumwa me bishi hiŋ ge Isrɛl.

³Ɛ-Rubɛn, gabụ bɛ shɛ yɛu mi ihiiŋ, gabụ kaa bɛ shɛ ukpahiŋ mu, keeni tụ'walụ ti hiiŋ tu ukpahiŋ mu. Unyangana bụ keeni ukpahiŋ bụ zhɛ wo gombo wo hwulo aŋ.

⁴Bɛ shɛ gana meni mu uhwulwo mu na ma ugaga tu ma zhagajɛ, ama bu zha shɛ kaa bo hwulo umbe o. Iwɛnɛ ebu munji la ogodo bishi bu, ebi heshigeni aŋ, ogodo mi ebu munji.

⁵Ge Simion ne Livai a shɛ yɛu-bino, no otokwobi aba aa njɛ la tuhwulo ta aba.

⁶N zha shɛ mo tono nu ushaura wa aba u tusweci o, N zha shɛ kaa mo togwu ụjɛrụma mu na tu'ulwa ta aba o. A kwụna atwa ni isɛbwɛ ya aba, nụ ụkwụlana wa aba kaa aa jajaga tikpereci ti ivwunɛ inɛ ye eyi maa kede i zhe tahaŋnụ o.

⁷Go unu-tukalana 'imɛ-isɛbwɛ ɛtɛ ya aba, iwɛnɛ ti yee hwuleji, ti isɛbwɛ ya aba ti'ishijɛ, iwɛnɛ po umungwuta yaa shɛ! N zhɛ mo bogwu aŋ na atwa aba, N zhɛ ma garataga aŋ kaa na cɛnjɛ ti Isrɛl kpaaŋ.

⁸A-Juda, miaụŋ-mo-ono bu mi zhɛ ma bụ dumanga, nu u'ala bụ ɛbi zhɛ ba ima atwa i'ime bu i'ilu. Miaụŋ me bishi bu kaa mi zhɛ mo bu kwuzono.

⁹Go Juda shɛ gana bizeci, na njɛ ụbaụta nazhɛ baa kwụnɛ usunda na tijala tu bwa, nazhɛ bee gwure nụ ụpangwụ ubwa. Boo momo mbo bee weci, gaaba eri ba kara maa ishicinjɛ bụụ?

¹⁰Bukwuto bu tugwama zha shɛ ba ganga Juda o. Ajalalo ubwa kaa zhɛ na ya tugwama aka elele. Edenji zhɛ na tụpa bụ ụdalụ, ɛɛ zhɛ kaa na hwuga-unu ubwa maa o kwuzono bu.

¹¹Bu umpi biywoywo bi izhinyɛci ibwɛ nu ukparɛ, biywoywo bi izhinyɛci ibwɛ umpi nu ukparɛ ufwafwa na zhɛmɛ. Ba nyashɛnga otogwo ubwa keeni idikɛ ibwɛ ne meni mụ tụ'walụ ta afwafwa mu na mi shenjemi gana mehieŋ.

¹²Eshe ubwa zhɛ e shenjomo ne meni mụ tụ'walụ ta afwafwa mu na baa swa, ene ubwa kaa zhɛ a cɛnjɛma no mosubo mi inɛ mu na baa swa.

¹³Gɛ Zɛbulon zhɛ ba gɛga nụ ụpalanụ itekwu. Nụ ụpalanụ ubwa ɛɛ zhɛ nɛ zɛtɛ ihɛŋtu. Tugwungwu tu bwa ti zhɛ te ce Saidụn.

¹⁴Ge Isaka shɛ gana izhinyɛci nɛ 'yajɛ ikɛnyi, bu ubeni na ashashɛ agwụdụ.

¹⁵Bụ kwụbɛ maa ofwo ụhinjanụ pilanụ ibɛ po bee zhire ututu ubwa maa 'waŋna i'wɛŋnɛ. Ibɛ po baa shɛ ya bujama na ba nda ugondu ikɛnyi.

¹⁶Ga Dan ba 'yagaga atwa ubwa, gana na tu baa shɛ ụlamụ wa atwa Isrɛl uko.

¹⁷Ga Dan kaa zhɛ ba sha gana ugbezhi, na namɛ nụ ụzalụ uhwaŋna, na ba lụmanga oshikwuru budakwa, iwɛ maa bụtụ na ba suka bụ leyi mabaaba.

¹⁸Oo AGWANGWAMA, M bu 'yacɛ maa n leshiji.

¹⁹Ashɛrɛ na gembi ufwugwo zhɛ a kala bụkpangwụ maa e kepengeni Gad, ama ubwa kaa zhɛ ba lasụ aŋ hwɛɛ.

²⁰Cɛnjɛ ta Ashɛ ti zhɛ tu na mata iyimɛyɛ ibiye, ubwa zhɛ nɛ bɛcinjɛ iyi nɛ zhɛ na kwulana shɛgwuma.

²¹Ga Naftali shɛ gana unasa bụlụba na ee tufwurinji, ba duma n-ndumwa mu na mu pilanụ.[61]

²²Go Josɛf shɛ gana ukparɛ ufwafwa, a'walụ ukparɛ ufwafwa na shikeni ni ipɛlu u'ibwa meni. Shɛ'walụ shɛ bwa sho mungo nụ ụdatụ.

²³Atwa i'ime ibwɛ kepengeni bu, ee heshigeni bu amɛ tebiye. Ee urigeni bu ni itɛ keeni a'inla aba.

²⁴Okwo ti yaa shɛ gana ata, uta ubwa kaa njɛ shɛ bulama o. Bụtụ ata bu Ukpahiŋ Jekob na Hwuri Kpaaŋ njɛ aragbamụ ubwa maa a 'yaga ikɛnyi (tedure na bi'iywa-ba-agwụdụ na shɛ utayɛ ụ'wụtụ wa atwa Isrɛl).

²⁵Agwatana bishi bu, ubwa mo bu mbiyono, Agwatana na Hwuri Kpaaŋ ubwa ma bu pana-uwebiye ye eshilo na namɛ na azuba. Tu uwebiye meni na mi iri, mu na ma banɛ taa tuta ta cɛnjɛ, tu uwebiye miaụŋ mu ufwugwo tumata.

²⁶Uwebiye bishi bu gembi tebiye yee hwuri uwebiye yo ogwunukwoshi mi tutu ce ukwunanga nshama mu unyizo-nom. Inɛ ɛtɛ ibɛ zhɛ ya patana nu uhiuhiu Josɛf, ibɛ kaa zhɛ ya patana ni itune bụtụ na oo bogwu la na miaụŋ-mo-ono bwa.

²⁷Gɛ Bɛnjamin shɛ gana ugwusu na imunɛ iri tebiye na wa ansatanga iyi, ba kwụna iyi nu uvwungwa baa ya. Nụ ụrụmɛ kaa boo dwotwogonu iyi nɛ ujasa yɛ.

²⁸Atwa ga kpaaŋ aba shɛ alamụ Isrɛl umpwa-na-ba-eyebi, ijɛ gɛtɛtɛ bishi ba aba mbishi aŋ aka na baa pana aŋ uwebiye. Bi peni aŋ uwebiye te teni cɛŋ gana na tu uwebiye bụtụ bụtụ namɛ.

²⁹Nazhɛ bee peni aŋ unu, bɛɛ hiɛŋ, N zhɛ mo 'wo maa mo to atwa mi. N ni ma no ofwo ata ee ni la eshi mi nu ụpangwụ ata namɛ ni itimɛ Efron Bihit ata.

³⁰Nụ ụpangwụ ata namɛ nu Makpila, nụ ụzalụ bu uwaŋna-banụ Mamre, na cɛnjɛ ti Kenan. Ubwa gatata ga Abraham so la hwɛɛ te ehilo ata ni i'ɛlɛ Efron Bihit ata maa a shɛ urubwo ubwa na bɛɛ zhɛ no no atwa ubwa.

³¹Apata ee ni la Abraham ne biyikwo bwa ga Sara. Apata du ee ni la Azik ne biyikwo bwa ge Rebeka. Apata du Ngee ni la Lia.

³²Ga shɛ ni itimɛ ɛtɛ du ehi n ni keeni ụpangwụ ata oo so la ni i'ɛlɛ yɛ Ɛhit.

³³Aka na ti ge Jekob hwuweni miaụŋ mu bwa unu-tupana hwɛɛ, boo mbo ivwunɛ ibwɛ bee petengeni iŋ no ogodo ubwa, baa dwa ihwungwɛ, bee ci atwa ubwa.