Read bassa UMOZHIGO 7 Bible Online

UMOZHIGO 7 - bassa bible

UMOZHIGO 7

¹Nazhɛ AGWANGWAMA hiɛŋ Noa, Zhaga tono nụ ụhaŋtụ, ta atwa ihwɛ bu kpaaŋ, iwɛnɛ tu Ngaa kwụbɛ maa gabụ kiri bɛ shɛ bụtụ bi tiririri ne eshe mi, na ashashɛ atwa elele na namɛ nu unyizo ga hwɛɛ.

²Sugo isundɛ nɛ namɛ shɛshɛshɛ icenje cenje, gɛ isundɛ nɛ zasa shɛshɛshɛ i shɛ iyebi yebi. Ga i shɛ butubwenyi ne biyikwo.

³Sugonono du udenji ụnụnụ we elele, ecenje cenje butubwenyi ne biyikwo. Nda gana ata iwɛ maa ga udenji usunda we elele keeni ụnụnụ we elele nama maa a na matanana nu unyizo.

⁴Iwɛnɛ po jita cenje hwayɛ Ngɛɛ zhɛ ma tumwanɛ eshilo na zhɛ o ngbo na cɛnjɛ tu unyizo tutu i ci ijitɛ buhanda, tu uwaŋna tụ ụjita maa mi iricinji iyi elele nɛ Ngaa njɛ ya hwungwa.

⁵Ga Noa kaa njɛ ga iyi elele nɛ AGWANGWAMA peni bu unu ibɛ.

⁶Ga Noa namɛ shiywa akpakwụ-atatụ (600) na aka na te meni mu zhagajɛ na cɛnjɛ tu unyizo.

⁷Ga Noa na miaụŋ mu bwa me eyi, ne biyikwo bwa keeni atashɛ ubwa teni nụ ụhaŋtụ nu bwa, maa e benengeni tɛzhagajɛ te meni ma ata.

⁸Ti isundɛ nɛ namɛ shɛshɛshɛ, keeni isundɛ nɛ zasa shɛshɛshɛ, ta shanụnụ keeni iyi elele nɛ yo hombilo na cɛnjɛ.

⁹E teni nụ ụhaŋtụ na Noa, iyebi yebi, butubwenyi ne biyikwo, gana na ta Agwatana peni bu unu.

¹⁰Ti ijitɛ ɛtɛ icenje ulwa, nazhɛ meni mu zhagajɛ mee ubi cɛnjɛ tu unyizo.

¹¹Aka na ga Noa ulwa shiywa akpakwụ-atatụ ni ipiɛnɛ iyebi, ni ijitɛ umpwa-ni-bɛ-cenje nu upiana ata. Nụ ụjita ata gbaa ibɛ ɛmɛzhinjɛ na ileji kpaaŋ kapashangwụ, a'ibwa azuba kapashangwụ du.

¹²Nazhɛ eshilo ngbi na cɛnjɛ tu unyizo iwɛŋnɛ buhanda keeni ijitɛ buhanda.

¹³Nụ ụjita ata gbaa ga Noa na miaụŋ mu bwa, gɛ Shɛm, na Ham, nɛ Jafɛt, ne biyikwo Noa keeni atashɛ ubwa atatụ teni nu ụhaŋtụ ata.

¹⁴Aba medenji udenji usunda we elele, keeni udenji iyimabiga ye elele kpaaŋ, medenji udenji iyi elele nɛ yo hombilo na cɛnjɛ tu unyizo, medenji edenji shanụnụ she elele swoswoswo.

¹⁵Iyi elele nɛ ya hwungwa teni nụ ụhaŋtụ ata na Noa iyebi yebi, ti inɛ ye eyi, ti inɛ yo o.

¹⁶Iyi nɛ teni na amɛ ụhaŋtụ ata i shɛ bwolo ne biyikwo gana na ta Agwatana peni Noa unu, nazhɛ AGWANGWAMA kepi odubo ụhaŋtụ.

¹⁷Meni ma ata mụ ụranjɛ tizhagajɛ tutu ijitɛ buhanda, meni kaa ma kaana gu ugombo duwa, maa 'waŋnɛ ụhaŋtụ ata na azuba.

¹⁸Meni ma ata kaa ma kaana gu ugombo duwa duwa, ibɛ po ụhaŋtụ patanɛ na azuba muba woo rungo.

¹⁹Meni ma ata mi keeni ugombo duwa, maa yɛ tilegbe tu na ti zeteji kpaaŋ.

²⁰Meni ma ta mi shɛŋ maa yɛ ihiŋhiŋ tilegbe, i ci gana ụnjɛswa bụtụ ụtatụ na ashashɛ.

²¹Ibɛ po iyi-uumwa ye elele nɛ go rungo nu unyizo 'wi, ta shanụnụ she elele, ti iyimabiga ye elele, ti isundɛ ehilo ye elele, ti iyi elele nɛ yo hombilo na cɛnjɛ tu unyizo kpaaŋ keeni atwa elele.

²²Iyi elele nɛ ya hwungwa na cɛnjɛ tu unyizo 'wi kpaaŋ.

²³AGWANGWAMA iricinji iyi-uumwa ye elele nɛ ga namɛ la na cɛnjɛ tu unyizo hwɛɛ, ta butugwumwa, tu usunda ehilo, tụ ụnụnụ. Ga Noa kiri vwɛ medenji iyi nɛ ga namɛ nu bwa nụ ụhaŋtụ ata.

²⁴Meni ma ata kaa mụ hwụŋ shɛ tutu i ci ijitɛ dipi-tɛtu (150).