Read bassa 2 SAMUƐL UYEBI 11 Bible Online

2 SAMUƐL UYEBI 11 - bassa bible

2 SAMUƐL UYEBI 11

¹Na aka bugbama na shɛ aka na shɛgwuma sha zha ujasa, ge Devid tumwanɛ Joab keeni atwa ubwa ugondu medenji atwa Isrɛl hwɛɛ, ee zhe aa lasụ A'amon. Ee leshiji ụshɛpwụ wa aba ụ'wụtụ na ɛɛ hiɛŋ, Raba. Ama ge Devid ni ikɛnyi ibwɛ tuba jɛjɛ nu Jɛrusalɛm.

²Jitoo ko tu uwaŋna nyinganɛ, ge Devid ishijɛ no ogodo ubwa, boo rungo no osokwu ukogo[20] ubwa. Tu baa namɛ apata, baa kwụbɛ te biyikwo bu ko ba dula meni, biyikwo ata kaa pilanụ igbɛtɛtɛ tebiye.

³Ge Devid tumwanɛ butumwa maa e hweyigeni iwɛ biyikwo ata. Ibɛ bụtụ bu ko mbishi bu, bɛɛ hiɛŋ, Ga Bashiba yɛu-yo-o Ɛliam, biyikwo Uria ata shɛ Bihit ta kaa.

⁴Ge Devid tumwanɛ butumwa maa ga suyananɛ bụ biyikwo ata. Aa shapɛrɛganɛ bụ ga biyikwo ata, bee weci nu bwa. Nazhɛ biyikwo ata sanɛ ugwulwo ni ihwɛ ibwɛ (Gunu gatata kaa biyikwo ata ta banɛ ni iyi ciyikwo tu bwa).

⁵Na aba ibɛ biyikwo ata le ofubo, baa tumwanɛ butumwa maa ge mbishi Devid maa ubwa 'yajɛ ofubo.

⁶Ge Devid tumwanɛ utumwa no ofwo Joab, bɛɛ hiɛŋ bụ, N tumwananɛ Uria Bihit ata. Go Joab tumwanɛ ga Uria no ofwo Devid.

⁷Aka na tu go Uria ci pu bwa, ge Devid heŋteni bu, bɛɛ hiɛŋ, Go Joab, na asaza vwɛ tubaa? Gana naa tuba ujasa ata shɛɛ? Go Uria mbishi bu hwɛɛ.[21]

⁸Nazhɛ ge Devid hiɛŋ Uria, Zhaga jiyo ni ihwɛ bu maa to ụhinjanụ[22] dice. Go Uria beni ga nu umwono ata wa agwuma. Agwuma du tumwananɛ bụ upwaŋ uko ni ihwɛ ibwɛ.

⁹Go Uria tuba ji shi ni ihwɛ ibwɛ o, ama bu weci no odubo umwamwa ata wa agwuma ne ehiu miaụŋ-mu-ugondu ma agwuma-ihwɛ ibwɛ kpaaŋ.

¹⁰Aka na te e mbishi Devid maa go Uria ji shi ni ihwɛ ibwɛ o. Agwuma heŋteni Uria, bɛɛ hiɛŋ bụ, Ta abu banɛ na tahaŋnụ tu ga tụ ụdụlụ hŋ ebi ji shi ni ihwɛ bu?

¹¹Go Uria jishijɛ Devid, bɛɛ hiɛŋ, Atwa Isrɛl, na atwa Juda zweni ba nu ujasa, hwɛɛ ti Ikpɛtɛ ya AGWANGWAMA, uberezhe mu go Joab na miaụŋ mu bwa mu ugondu, e tileni ba nu ugba no tupohondo. Ibɛ tuba Ngɛɛ zhɛ mo jiyo ni ihwɛ mi mu na ya, mu na swa, maa mo woto ne biyikwo mi? Ta abu ta namɛ bana aba hwungwa, N zha shɛ kwukwuŋ ma nda iyi gɛnɛ ɛtɛ o.

¹²Ge Devid hiɛŋ Uria, Asha nama tugwo epe hwayɛ ga i ci beyi nazhɛ Ma bu ganga maa hwuri ugwulwo. Go Uria jɛjɛ ga nu Jɛrusalɛm jita ata uuwa iyi heri.

¹³Ge Devid suyanɛ bụ maa ya iyimɛyɛ nu bwa, baa yɛ ga bee swe nu bwa, baa sụrɛ bụ mayaga harɛ maa ngba bụ. Aka na tụ ụrụmɛ shɛ, bee zhe bee weci na adugwa[23] na miaụŋ-mu-ugondu ma agwuma-ihwɛ ibwɛ mu weci. Go Uria ji shi sasana ni ihwɛ ibwɛ maa woto.

¹⁴Ti iyi heri nu uvwungwa, ge Devid 'nyeci utakada bee peni Uria maa pana Joab.

¹⁵Iyi nɛ bee 'nyeci nu utakada ata na, bi hiɛŋ bụ, Shikicingo Uria geri bu umbe, no ofwo na ujasa vwi eshe tebiye, maa hi genji bu apata maa a kwụnɛ bụ.

¹⁶Gabata ga aka na tu go Joab ba lashɛga ụshɛpwụ ata, bee shikicinji Uria no ofwo na bee mepi maa atwa i'ime a na 'yajɛ ikɛnyi namɛ geri ata.

¹⁷Nazhɛ atwa ụshɛpwụ ata banɛ maa a njɛ ujasa no Joab, aa kwụnɛ ejeshi Devid oko, gobwonu du aa kwụnɛ Uria Bihit ata.

¹⁸Nazhɛ go Joab tumwananɛ Devid unabarɛ gana na ti iwɛ ujasa shɛ hwɛɛ.

¹⁹Bee sekekeni butumwa ata, bɛɛ hiɛŋ, Aka na ebi mbishi agwuma unabarɛ gana na tu ujasa shɛ hwɛɛ,

²⁰yaa shɛ baa 'yajɛ isɛbwɛ, bee bi heŋteni, bɛɛ hiɛŋ, Iwembe po ehi hwuri hi gwumwonu nụ ụshɛpwụ ata maa hiɛ njɛ ujasa na abaa? Hi mepi shi suu maa ɛ zhɛ a patangana nụ ụdatụ maa a na hiɛ karɛ a'inla?

²¹Okwo hi teyinji shi ya suu gana na te biyikwo karɛ la bunoswo tu baa patanɛ nụ ụdatụ baa kwụnɛ Abimɛlɛk yɛu Jɛrub-shɛt[24] ni Tɛbɛz. Iwembe po tuba ehi zhe ehi hwuri hi gwumwonu nụ ụdatụụ? Nazhɛ mbiso ya agwuma na aka ata maa, a kwụnɛ du yɛu bu ugondu go Uria Bihit ata.

²²Gabata butumwa ata sanɛ ga bee mbishi Devid utumwa we elele na go Joab ge mbishi bu maa ga duma.

²³Butumwa ata mbishi Devid, bɛɛ hiɛŋ, Atwa ata i'ime tu e tu hwuri ukpahiŋ, a banɛ nụ ụshɛpwụ ata aa ti zhaganɛ no tupohondo maa a tu sukakanɛ. Ama tu unzhi aŋ ee gwuri no odubo ụshɛpwụ ata.

²⁴Ekeri a'inla aba patanganɛ nụ ụdatụ, aa ma tu karɛ a'inla, harɛ aa kwụnɛ miaụŋ mụ bụ mu ugondu mu ko. A kwụnɛ du yɛu bu ugondu go Uria Bihit ata.

²⁵Ge Devid hiɛŋ butumwa ata, Zhaga mbiso Joab maa, Gana utokwobi wa nda ta, na tumama kwụnanụ, kede ohwulu ubu horukono ni iwɛ ɛtɛ o. Mbiso bu maa ga shanɛ ikɛnyi maa a sukakanɛ ụshɛpwụ ata maa e leshiji uŋ.

²⁶Aka na tu ga Bashiba biyikwo Uria hwụjɛ maa a kwụnɛ bwolo bwa, baa twanɛ bwolo bwa u'wo.

²⁷Aka na te e hwuwi ụcɛnjɛ Uria tɛnda, ge Devid tumwanɛ butumwa maa ga shapɛ biyikwo ata ni ihwɛ ibwɛ. Bee zeni bu ya, bee meci yɛu-ye-eyi nu bwa. Ama amɛ AGWANGWAMA lemi shi ni ijɛ ɛtɛ ge Devid njɛ o.