Read bassa 2 SAMUƐL UYEBI 13 Bible Online

2 SAMUƐL UYEBI 13 - bassa bible

2 SAMUƐL UYEBI 13

¹Ga Absalom yɛu-ye-eyi Devid 'yajɛ bụngwụfwụ bu ko na pilanụ, ɛɛ hiɛŋ ga Tama. Ge Devid 'yagananɛ yɛu-ye-eyi inyɛ nɛ ɛɛ hiɛŋ ga Amnon. Ga Amnon kaa bo lubo yɛu ɛtɛ yo o ga Tama tebiye.

²Tukwulana tu na iwɛ yɛu ɛtɛ yo o kwụlanɛ Amnon tu hwuleji, ibɛ po baa mama njɛ ugwumashɛ iwɛ bụngwụfwụ ata bwa ga Tama. Ga Amnon kaa eri shi ba nda bụ iyi elele iwɛnɛ tu baa ta shɛ usapa.

³Ga Amnon kaa 'yajɛ biyejilo bu ko na 'yajɛ ti'inta tụ wɛ tebiye. Ɛ hiɛŋ izeci ibwɛ go Jonadab, bɛ shɛ yɛu buhongwu Devid ge Shimea.

⁴Go Jonadab hiɛŋ Amnon, Imbe kwuŋ ma bu nda, yaa shɛ maa ba 'nya ebu lwegeji iyi-heri ta abɛ shɛ kaa yɛu ya Agwumaa? Bi eri shi bu mo mbiso ree? Ga Amnon jishijɛ bụ, bɛɛ hiɛŋ, Iwɛ Tama ga shɛ bụngwụfwụ bi yɛu-bino mi ga Absalom n kwụlanɛ tebiye.

⁵Go Jonadab hiɛŋ bụ, Zhaga woto no ogodo, na nda gana maa ba gwuma. Aka na ge shibi zhajɛ maa ma bu kwụba, hiɛŋ bụ, Sukwu, hiɛŋ bụngwụfwụ mi ga Tama ga zhajɛ maa ma m panɛ iyimɛyɛ. Ma jala maa ga nda iyimɛyɛ ɛtɛ epe ne eshe mi maa Ma ngbaraka bụ tu baa nda iŋ, maa du ma m pananjɛ iŋ hwayɛ ni ikɛnyi ibwɛ.

⁶Ga Amnon njɛ ga gana bụtụ na ba gwuma, bee zhe bee weci no ogodo ubwa. Aka na ta agwuma Devid zhe maa kwụba bụ, ga Amnon hiɛŋ bụ, Sukwu, hiɛŋ bụngwụfwụ mi ga Tama ga zhajɛ maa ma n ndana akara oko ambana epe maa ma ngbaraka bụ tu baa nda aŋ, maa ma m pananjɛ aŋ du ni ikɛnyi ibwɛ.

⁷Ge Devid tumwanɛ ga bụtụ na beni nu umwamwa ubwa u tugwama, maa e mbishe Tama maa, Zhaga nu umwono ikwenyi bu ga Amnon maa ndanɛ bụ iyimɛyɛ.

⁸Ga Tama zhe ga nu umwono ikwenyi ɛtɛ ibwɛ ga Amnon, tu ubwa weci ga no ogodo ubwa. Ga Tama seri ga mihiuŋ baa fwɛŋ, bee hinjilenji mu baa njɛ ga akara ata ne eshe ubwa.

⁹Ga Tama zweneni bu akara ata nụ ụpalụ uko maa ya, ama bu lacɛ aŋ tiya. Bɛ hiɛŋ Tama, Bacɛnga atwa elele epe, ibɛ po atwa elele beni ga ee genji aŋ.

¹⁰Ga Amnon hiɛŋ Tama, Shapɛ akara ata epe nu umwono ga Ngee weci, maa na ma pananjɛ aŋ ni i'ɛlɛ bụ. Ga Tama shepi ga akara ata baa ga njɛ, bee zhe nu umwono buweci Amnon ikwenyi ibwɛ.

¹¹Aka na ti bee shepirigeni bu aŋ maa ya, ga Amnon hiakwutanɛ bụ, bɛɛ hiɛŋ bụ, A-bụngwụfwụ mi, hwure tu woto.

¹²Ga Tama hiɛŋ bụ, E-kwenyi mi, ta ma nda ni iji o. Tupwaŋ tu gana ga tu ta njɛ shɛ la na cɛnjɛ ti Isrɛl kwukwuŋ o.

¹³Cee Ngɛɛ zhɛ mo shiyono uhiuhiu mu nụ ụpụrụsa gana gaa? Okwo gabụ, bi zhɛ du ba sha gana shɛlagwụ shɛ ga shi tugbom ni Isrɛl. Sukwu, lụpa agwuma, bi zha shɛ ma bu lakana maa n zeni o.

¹⁴Ama ga Amnon shɛlajɛ shɛ n-ndumwa mu Tama o, ukpahiŋ Amnon kaa uhwuri una yɛu ɛtɛ yo o. Baa njɛ bụ ni iji, bee weci nu bwa.

¹⁵Nazhɛ ga Amnon to Tama ni i'ime tebiye. I'ime nɛ boo to bu uhwuri ya tulubo tu na bee ge lubi bu la. Bɛɛ hiɛŋ Tama, Ishijɛ beni epe.

¹⁶Ga Tama jishijɛ bụ, bɛɛ hiɛŋ, Awo! E-kwenyi mi, ebi m becinji hwayɛ, asha inɛ ɛtɛ ibɛ wumanjɛ uhwuri inɛ gɛ abụ ga ma nduwa. Ama ga Amnon leni shi n-ndumwa mu na yɛu ɛtɛ yo o jɛmɛ o.

¹⁷Ga Amnon suyanɛ yɛu ike nɛ yaa ndana bụ ugondu, bɛɛ hiɛŋ bụ, Bacɛnga yɛu gɛ yo o epe no olugwo mi maa kepi odubo!

¹⁸Ibɛ yɛu ɛtɛ ibwɛ ugondu becinji bu ga nazhɛ bee kepi odubo. Ga Tama kaa hwuŋteni idikɛ ɛtɛ 'yajɛ i'ɛlɛ, yee zwe kaa tutu ɛvwɛvwɛjɛ ubwa. Ibɛ shɛ idikɛ nɛ miaụŋ-mo-o ma tugwama mu na mu ta shɛ asapa mo hwuŋtono na aka ata.

¹⁹Ga Tama dụrɛ uhiuhiu ubwa ma'alụ, bee dwetweji idikɛ ebe tuwururu bee ge urigeni, iwɛnɛ ta amɛ ubwa hashɛganụ, bee peteni i'ɛlɛ ibwɛ nu uhiuhiu baa twa-u'wo gboo ti bɛɛ zhɛ.

²⁰Ibɛ po ikwenyi ibwɛ ga Absalom heŋteni bu, bɛɛ hiɛŋ, A-bụngwụfwụ mi, ikwenyi bu ga Amnon suu weci na bụ? A-bụngwụfwụ mi sumongo, ikwenyi bu kaa baa shɛ. Ta nda isɛbwɛ o. Gabata ga Tama namɛ ni ihwɛ ikwenyi ibwɛ ga Absalom gana biyikwo na aa karɛ.

²¹Aka na ta agwuma Devid hwụjɛ iwɛ ɛtɛ hwɛɛ, amɛ ubwa hashɛganụ tebiye.

²²Iwɛ bɛ po ga Absalom to Amnon ni i'ime tebiye, bu dumanɛ shɛ iwɛ ye elele nu bwa o, ta mu na mi biye, ta mu na mụ wɛ, iwɛ bụngwụfwụ bwa ga Tama na baa njɛ iji.

²³Ta shiywa shi yebi mudu shi keshici ti ijɛ njɛ, ibɛ ahwajɛ tihiŋzhe ta agwụdụ Absalom namɛ ni Beal-hazo na gwumwonu na cɛnjɛ ti Ifrem. Ga Absalom suyaganɛ miaụŋ-me-eyi ma agwuma hwɛɛ maa a zhajɛ apata.

²⁴Ga Absalom zhe pa agwuma, bɛɛ hiɛŋ bụ, Tumaka, Hioko, Ma hwaga ba tihiŋzhe ta agwụdụ mi. Ma bụ tabwa maa gabụ agwuma keeni atwa bụ shihwolu hiɛ zhajɛ no ofwo mi na shɛ yɛu bu ugondu.

²⁵Agwuma jishijɛ bụ, bɛɛ hiɛŋ, Ɛ-yɛu mi, Ti zha shɛ ta zhajɛ hwɛɛ tu o, iwɛ aka na i'wɛŋnɛ tu zhɛ mo bu hwulogo hwayɛ. Ama ga Absalom uranjɛ bụ, ama bu lacɛ. Ibɛ po bee peni Absalom uwebiye, maa go hwulo.

²⁶Ga Absalom hiɛŋ bụ, Yaa shɛ gana ata, asha ma bụ tabwa maa gɛ yɛu-bino mi ga Amnon zhagaga no tu. Agwuma jishijɛ bụ, bɛ hiɛŋ, Iwembe po ga Amnon shɛ ba zhagaga ne hiiŋ?

²⁷Ti ga Absalom uranjɛ bụ uuwa i ci aka na agwuma leneni Amnon keeni miaụŋ mu bwa me eyi hwɛɛ maa a zhagaga na Absalom.[27]

²⁸Ga Absalom mbishi miaụŋ mu bwa mu ugondu, bɛɛ hiɛŋ, Shɛlaga ma, aka elele na ga Amnon swe hwayɛ mayaga mee iri bu tebiye, yaa shɛ Ngɛɛ hi hiɛŋ hwayɛ, kwụna ma Amnon, kwụna bu ma ga, ta nda ma inyɛsɛ o. Shɛ Gamba suu n hi hiɛŋ. Mama 'imɛ ma maa hi shanɛ ikɛnyi.

²⁹Gabata miaụŋ-mu-ugondu Absalom mɛ njɛ ga Amnon gana na tu ga Absalom ge peni aŋ unu. Gunu ata miaụŋ-me-eyi ma agwuma hwɛɛ mi ishijɛ, bụtụ bụtụ munji budakwa bwa ee gezhiji.

³⁰Aka na tɛ ɛ tɛ zhɛ nu uhwaŋna, ibɛ unabarɛ ci agwuma, ɛɛ hiɛŋ bụ, Bwonu oo ga Absalom kwụnɛ miaụŋ mụ bụ hwɛɛ, i zasa inɛ ye elele benengeni o!

³¹Agwuma ishijɛ bee dwetweji tugwuno tu bwa, bee leyi na cɛnjɛ bee shiri iwɛ amɛ-tụhaŋtụ na baa nda. Gobwonu du miaụŋ mu bwa mu ugondu mu na mu ga namba apata nu bwa mu dwetweji tugwuno ta aba iwɛ amɛ-tụhaŋtụ.

³²Ama go Jonadab yɛu Shimɛa na shɛ buhongwu Devid, hiɛŋ bụ, Iyɛri mi, a kwụnɛ shɛ miaụŋ mụ bụ me eyi hwɛɛ o. Ga Amnon kiri 'wi. Ijɛ namɛ na ahaŋsa Absalom te kwuni taa nụ ụjita ata la ga Amnon njɛ bụngwụfwụ bwa ga Tama iji bee weci nu bwa.

³³Gabụ iyɛri mi na shɛ agwuma, ta tɛtana unabarɛ ata rishe maa a kwụnɛ miaụŋ mụ bụ me eyi hwɛɛ o, semi ga Amnon kiri aa kwụnɛ.

³⁴Na aka ata ibɛ ga Absalom gezhiji. Ibɛ yɛu ike tisemberi nɛ ya ngbaraka apata, shepi eshe baa mbiyanɛ, baa kwụbɛ ta atwa ofwugwo e zwe ishɛmɛ nu uhwaŋna geri bu Horonaim.[28]

³⁵Go Jonadab hiɛŋ agwuma, Kwụba, miaụŋ mụ bụ muba me ci apata, gana na tu Gamba na n shɛ yɛu bu ugondu go bu mbiswo. Gana ata ga kaa yaa shɛ gom.

³⁶Gunu ata ti bee hwuwi n-ndumwa ma ata tụdụma, miaụŋ ma agwuma mu pushe, mee tileni nu u'wo gboo, ibɛ du agwuma na miaụŋ mu bwa mu ugondu hwɛɛ mi tileni nu u'wo gboo.

³⁷Ama ga Absalom tuba gezhiji bee zhe pu Talmai yɛu-ye-eyi Amihud, na shɛ agwuma Gɛshu, baa namɛ apata shiywa shɛ tatụ.[29]

³⁸Ama ge Devid to-ụkwụla yɛu ibwɛ ga Amnon te ilegeji.

³⁹Na aba na ta a ingatanjɛ agwuma Devid iwɛ tu'wo ti yɛu ibwɛ ga Amnon, yaa zuga ahaŋsa ubwa maa bana zha no ofwo yɛu ibwɛ ga Absalom maa kwubɛ bụ.