Read bassa 2 SAMUƐL UYEBI 18 Bible Online

2 SAMUƐL UYEBI 18 - bassa bible

2 SAMUƐL UYEBI 18

¹Nazhɛ ge Devid sotulonu atwa elele na namɛ nu bwa, bee teri eberezhe na zhɛ a untangana atwa akpakwụ-a-ta a-ta (1,000) keeni eberezhe na zhɛ a untangana atwa dipi-yebi yebi (100).

²Boo dwotwogonu aŋ orubwo atatụ maa e zhe ujasa. Go Joab ubwa shɛ uberezhe udungbe uko, ga Abishai yɛu Zɛruwia ata shɛ yɛu-bino Joab, ubwa shɛ uberezhe udungbe uyebi, nazhɛ ge Itai bụtụ ata bi Git, ubwa shɛ uberezhe udungbe ụtatụ. Agwuma mbishi ejeshi ata ubwa, bɛɛ hiɛŋ, N zhɛ du ma zha ujasa ne hiŋ.

³Ɛɛ jishijɛ bụ, ɛɛ hiɛŋ, Ta kara maa zhe no tu o. Okwo ee tu urigeni hwayɛ, inee tu te shi aŋ o, okwo aa kwụnɛ hwayɛ kaa tudwonu tu tu ti yebi, inɛ ɛtɛ ta tatụlanụ sụ aŋ waa o. Ama ɛɛ hiɛŋ gabụ, bi ci atwa tu igbɛɛ-itɛ (10,000). I zhɛmɛ maa gɛga na amɛ ụshɛpwụ maa na tu tumwananɛ iyi ukekeshi nɛ zhɛ mo tu mbiyono.

⁴Nazhɛ agwuma jishijɛ aŋ, bɛɛ hiɛŋ, Gana elele dee ehi heŋshi maa ibɛ zhɛmɛ, asha gana ata du Ngɛɛ zhɛ ma nda. Ibɛ po agwuma shikeni nụ ụzalụ bu ko bo odubo ata ụshɛpwụ, ejeshi ata tuba keshici bu hwɛɛ aba edingbe ata dipi-yebi yebi, ne edingbe akpakwụ-a-ta a-ta.

⁵Ibɛ po agwuma tɛtaganɛ Joab, na Abishai keeni Itai unu, bɛɛ hiɛŋ, Nda maa hwayɛ Absalom pece iwɛ mi oo. Ejeshi ata hwɛɛ aba du kaa hwụjɛ ta agwuma a tɛtagana eberezhe ata unu maa ga njɛ Absalom pece.

⁶Aka na te ejeshi Devid beni ee zhe nu ugba ujasa, aa njɛ ujasa na atwa Isrɛl nu uwapa Ifrem.

⁷Ejeshi Devid lasụ atwa Isrɛl; atwa na ujasa yɛ jita ata hwuleji. Atwa na aa kwụnɛ jita ata a shɛ atwa igbɛɛ-umpwa (20,000).

⁸Ujasa ata mburusonu na cɛnjɛ ta ata hwɛɛ, atwa na 'wi nu uwapa ata jita ata e hwuri atwa na aa kwụnɛ no otokwobi.

⁹Ga Absalom twa na atwa Devid oko eshigiri tu baa suka budakwa bu bwa, ibɛ budakwa ata teni ekpekpeshi oko na barɛ apata. Ibɛ po uhiuhiu Absalom teni nu ushagada ụ'wụ'wụ ata uko, baa swacɛ ya apata rendee. Budakwa tuba duri nu ukaka ubwa boo to tuhwulo geri-be-eshe.

¹⁰Nazhɛ bụtụ bu ko tuba kwụbɛ bụ, bee zhe bee mbishi Joab, bɛɛ hiɛŋ, N Kwubɛ Absalom tu baa swacɛ ba nu ushagada ukpekpeshi uko!

¹¹Go Joab jishijɛ bụtụ ata, bɛɛ hiɛŋ, Imbe tɛ! Ubwa hŋ ɛbu kwubɛ gom? Iwembe po abụ kwụnɛ shɛ bụ apataa? N ngɛ zhɛ ma nda unyasa maa Ma bụ pana azụrụfa arinya umpwa keeni umazhɛya.

¹²Ama bụtụ ata jishijɛ bụ, bɛɛ hiɛŋ, Okwo ebi ge me peni azụrụfa arinya akpakwụ-a-ta, (1,000) N nga zha shɛ mo tumongono yebe yɛu ya agwuma o. Tu ga hwụjɛ hwɛɛ tu, ta agwuma ma bụ pana-unu, na Abishai keeni Itai, bɛɛ hiɛŋ, Ta nda ma hwayɛ usemberi ata ga Absalom iyi iwɛ iwe mi o.

¹³Ama yaa shɛ Ngaa nga hwụjɛ shɛ unu wa agwuma, Ngaa Kwụnɛ Absalom, agwuma gɛ zhɛ ba hwuga iŋ, iwɛnɛ ti iyi elele nɛ ya ndangana swakanɛ shɛ bụ. Okwo gabụ, bu ga zha shɛ ba ala maa n leshiji o.

¹⁴Go Joab hiɛŋ bụtụ ata, N zha shɛ ma nda ya aka mi ufwu na bu o. Bee shepi isɛnu nɛ 'yajɛ akatakpa atatụ, boo to Absalom na agba, tu ga Absalom ta swacɛ apata baa ta hwungwa nụ u'wụ'wụ ata ukpekpeshi.

¹⁵Nazhɛ asaza umpwa a na a 'waŋnana Joab i'wɛŋnɛ ibwɛ ujasa zhajɛ oo rungwutwonu Absalom, aa hwaŋzhɛnjɛ bụ tụkwụna.

¹⁶Go Joab njɛ okowuya, nazhɛ ejeshi genji ya atwa Isrɛl tu'urugono nu usumwa, iwɛnɛ tu go Joab lakanɛ aŋ ya.

¹⁷Ee shepi ru'wo ru Absalom ee keri ru nu ushapa uko ụ'wụtụ na namɛ nu uwapa ata, ee uregeni bu na atayɛ, oo to utukwu ụ'wụtụ nu bwa. Nazhɛ atwa Isrɛl gezhiji, bụtụ bụtụ ji ni ihwɛ ibwɛ.

¹⁸Aka na ga Absalom ta namɛ la, bee meme meni tuma tu ko tụ 'wụtụ nu Ulomu wa agwuma, bɛɛ hiɛŋ, N zasa yɛu maa e ne teyinje hwuŋ izeci mi tedure nu bwa o. Ibɛ po boo po tuma ta ata tu bwa izeci ibwɛ ikɛnyi ibwɛ maa, Tuma ta Absalom tutu taa hwayɛ.

¹⁹Ga Ahimaz yɛu Zadok hiɛŋ Joab, Lono maa mo gozhigo ma zha pa agwuma maa Me mbishe bu unabarɛ ga ubiye maa, AGWANGWAMA leshiji bu ni i'ɛlɛ ya atwa i'ime ibwɛ.

²⁰Go Joab hiɛŋ bụ, Awo, bu ta zha shɛ ba shapa unabarɛ ata ubiye hwayɛ ga o, semi ga shɛ nyajita, kede i shɛ hwayɛ ga o, iwɛnɛ ti yɛu ya agwuma te 'wi.

²¹Go Joab hiɛŋ bụtụ bu ko bu Kush,[37] Zhaga mbishe agwuma iyi nɛ abụ kwụbɛ. Nazhɛ bụtụ ata bu Kush kwuzeni Joab nazhɛ bee gezhiji bee hwuri.

²²Ga Ahimaz yɛu ɛtɛ Zadok hiɛŋ Joab sasana, N leneni maa ma 'wa Bukush ga nu usumwa maa mɛ jimɛ unabarɛ ga du. Ama go Joab hiɛŋ bụ, Ɛ-yɛu mi, Imbe kwuŋ po aba jala maa zhee? Bi zha shɛ kaa ba 'yaga ule we elele iwɛ ibɛ o.

²³Ga Ahimaz hiaaŋnanɛ Joab, okwo gana elele ti yaa shɛ, Ma jala maa mo gozhigo Ma zha de. Nazhɛ go Joab hiɛŋ bụ, Zhaga gozhigo. Ga Ahimaz gezhiji bee duri uhwaŋna udadarɛ, bee keshici Bukush ata.

²⁴Na aka ata ge Devid jɛjɛ tuba na ashashɛ odubo amɛ na a na tupohondo tụ ụshɛpwụ. Ibɛ bi'iywa bo odubo ata munji ni inekwu yo odubo ata ụshɛpwụ, bee shepi eshe baa kwụbɛ ta bụtụ bu ko be gezhije bwooko.

²⁵Bi'iywa ata kezhe bee zhe bee mbishi agwuma, agwuma hiɛn bụ, Yaa shɛ bwooko be ci, asha unabarɛ ubiye baa 'waŋnɛ. Bụtụ ata bo gwumwonu go tugwumwonu nu usumwa.

²⁶Bi'iywa ata bụ ụshɛpwụ kwụbɛ ta binya bụtụ be gezhije sasana bwooko, bee kezhe bee mbishi bi'iywa ata bo odubo, bɛɛ hiɛŋ bụ, Bụtụ bu ko ye sasana be gezhije bwooko! Agwuma jishijɛ, bɛɛ hiɛŋ, Unabarɛ ubiye du bụtụ ata 'waŋnananɛ.

²⁷Bi'iywa ata hiɛŋ, Bụtụ ga u hwure umbe nu usumwa sụbɛ Ahimaz yɛu Zadok. Agwuma jishijɛ bụ, bɛɛ hiɛŋ, Ga Ahimaz shɛ bụtụ bi biye, unabarɛ ubiye du feye baa 'waŋnɛ caakwụ.

²⁸Ga Ahimaz zhajɛ pa agwuma, bee leyi bee ubeni na cɛnjɛ na agba agwuma. Baa uganɛ, bɛɛ hiɛŋ agwuma, Iyi elele zhɛmɛ ya, agwuma tumaka! Shɛtana AGWANGWAMA na shɛ Agwatana bụ, iwɛnɛ baa njɛ ma lasụ atwa na ma bu sukakana ne tigezhe!

²⁹Agwuma heŋteni Ahimaz, bɛɛ hiɛn, Yɛu ɛtɛ tisemberi ga Absalom benegeni hŋ? Ga Ahimaz jishijɛ bụ, bɛɛ hiɛŋ, Iyɛri mi, aka na tu uhiu wa anjɛ-ugondu bu go Joab n tumwanɛ utumwa ga, Ngaa kwụbɛ tusukwutogwu tu 'wụtụ, ama M mepi shi kaa ijiji iyi nɛ yaa shɛ kpororo maa Ma duma iwɛ ibɛ o.

³⁰Agwuma hiɛŋ bụ, shikono peye, bee zhe ga bee shikeni apata.

³¹Ti yaa namɛ fwalaa Bukush ata pushe na agba agwuma, bɛɛ hiɛŋ, Agwuma Tumaka! M bu 'waŋnanɛ unabarɛ ubiye! AGWANGWAMA ubi leshiji hwayɛ ga nu ukpahiŋ wa atwa elele na gɛ ishijɛ maa abụ sukakanɛ!

³²Agwuma heŋteni Bukush ata, bɛɛ hiɛŋ, Yɛu ɛtɛ tisemberi ga Absalom benengeni hŋ? Bukush ata jishijɛ, bɛɛ hiɛŋ, Iyɛri mi, I ga ma kwụlanɛ yebe maa ga i shanɛ atwa i'ime ya agwuma-ihwɛ mi na shɛ agwuma keeni atwa elele na ishijɛ maa a bụ sukakanɛ ni iyi iwɛ, maa a shɛ du gana yɛu ɛtɛ tisemberi.

³³Amɛ-tụhaŋtụ shini amɛ agwuma. Bee munji nu umwono wa azuba na patanɛ ni ihiŋhiŋ yo odubo ụshɛpwụ ata, baa twa-u'wo. Baa ugaga, bɛɛ hiɛŋ, Oo ɛ-yɛu mi, ɛ-yɛu mi ga Absalom! Ɛ-yɛu mi ga Absalom! Yaa ga shɛ Gamba n 'wi tụlụkpashɛ tụ bụ, amɛ mi gɛ zhɛ o lomo, ɛ-yɛu mi! Ɛ-yɛu mi ga Absalom!