Read bassa 2 SAMUƐL UYEBI 19 Bible Online

2 SAMUƐL UYEBI 19 - bassa bible

2 SAMUƐL UYEBI 19

¹Ee mbishi Joab, ɛɛ hiɛŋ, agwuma a twa ba u'wo, baa ta-ụkwụla iwɛ Absalom.

²Ibɛ po tụlasụ tụ ụjita ata tɛ jɛshɛrɛjɛ ya ụkwụla-tuta no ofwo ejeshi Devid hwɛɛ, iwɛnɛ ta a hwụjɛ maa agwuma a ta ba ụkwụla iwɛ yɛu ibwɛ.

³Ibɛ po ejeshi ata teni ya nụ ụshɛpwụ swɛɛ swɛɛ gana ejeshi na ezuye shɛ tu ujasa lasụ aŋ.

⁴Agwuma urigeni eshe ubwa baa ugaga gboo, bɛɛ hiɛŋ, Ɛ-yɛu mi ga Absalom! Ɛ-yɛu mi ga Absalom! Ɛ-yɛu mi!

⁵Go Joab teni nu umwono wa agwuma, bɛɛ hiɛŋ bụ, Bi peni hwayɛ ga atwa bụ, a na bicinji uhiuhiu bu, to ohiuhiu miaụŋ mụ bụ me eyi, to ohiuhiu miaụŋ mụ bụ mo o, to ohiuhiu eyikwo bu keeni ohiuhiu eyikwo bu magɛgashɛ ezuye.

⁶Bo lubo atwa na mo bu imo, obo imo tuba atwa na mo bu lubo. N kwụbɛ iŋ hwayɛ ga no ofwo bu kpataa maa, iwɛ eberezhe bu ujasa, ti iwɛ ejeshi bu, ubu tatụlanụ sụ o. N eshiciji hwayɛ ga kpataa maa, yaa ga shɛ atuba tu 'wi hwɛɛ tu, maa tuba ga Absalom nama, amɛ bụ gɛ zhɛ o lomo yebe.

⁷Ishijɛ hwuwayɛ go maa beni jɛmɛ n-ndumwa mu na mi zhɛ ma hiɛcɛnga atwa bụ u'waba. Shibwonu M bu teji izeci ya AGWANGWAMA maa i zasa bụtụ okwo bu ko na zhɛ ba nama na bụ nụ ụjita go tutu uvwungwa o. Inɛ ɛtɛ kaa zhɛ ma bu wumanganụ uhwuri iyi iwɛ ye elele nɛ ya shana mo bu vwutongono te kwuni na cɛnɛnɛ tụ bụ uuwa i ci aka ga.

⁸Nazhɛ agwuma ishijɛ bee beni, baa jɛjɛ no odubo ni iyi ya ajɛjɛ ubwa. Aka na te e mbishi atwa ata hwɛɛ ɛɛ hiɛŋ, agwuma ye jɛjɛ no odubo ụshɛpwụ. Nazhɛ atwa ata zhajɛ hwɛɛ aba oo sotulonu no ofwo ubwa. Ti yaa namɛ fwalaa nazhɛ atwa Isrɛl hwɛɛ gezheji, bụtụ bụtụ ji ni ihwɛ ibwɛ.

⁹Nazhɛ atwa na shɛ alamụ Isrɛl hwɛ hwɛɛ kwuni uwuru abaaba, ɛɛ hiɛŋ, agwuma Devid iti bicinji na atwa i'ime tu, bee ti leshiji ni i'ɛlɛ ya Afilistia, bee gezhigeni ya tuba Absalom bee beni na cɛnjɛ tu ga.

¹⁰Ga Absalom ebe eti ge dudugeni manɛbɛ maa sha agwuma, bu uwo ya nu ujasa. Iwembe po tuba yaa zasa bụtụ be elele na yiganɛ maa ge gwuricinje agwuma Devidii?

¹¹Aka na tu n-ndumwa ma ata atwa Isrɛl kpaaŋ dumanjɛ mi ci agwuma Devid, baa tumwanɛ ata Zadok na Abiata a na shɛ onongbo maa ge zhe e heŋteni n-nyarɛ mu Juda maa, Iwɛmbe po i shɛ maa ahiɛba hiɛ shɛ umɛwɛɛ nu gana na i shɛ maa e gwuricinje agwuma ni ihwɛ ibwɛɛ?

¹²Ahiɛba ebe hiɛ shɛ miaụŋ-mo-bino mi, na tu'waba ti mi, ne mehieŋ mi mi. Iwembe po i shɛ maa ahiɛba hi lɛ yɛ ekwunyi ne tugwuricinje ti mii?

¹³Ge Devid hiɛŋ Amasa, Shɛ atuba na bụ suu tɛ shɛ tu'waba tu ko keeni mehieŋ mu ko? Te kwuni hwuwayɛ go, gabụ Ngaa njɛ uberezhe we jeshi mi tụlụkpashɛ tu Joab. Yaa shɛ Ngaa njɛ shɛ gana ata, asha ga Agwatana n kwụnɛ!

¹⁴Ibɛ po shihaŋsa sha atwa Juda hwɛɛ shi togwu gana bụtụ bu ko, ee leni n-ndumwa mu bwa. Ibɛ po aa tumwanɛ utumwa maa ge e mbishi agwuma maa, ge gwure, ta miaụŋ mu bwa mu ugondu hwɛɛ.

¹⁵Gana na ta agwuma mwo ujiyo, atwa Juda tɛjɛ bu uhwaŋna tutu Gilgal maa e keshicinji bu nu Urefu Jodan.

¹⁶Na aka ata gbaa ge Shimei yɛu Gira ata shɛ bụtụ bu Bɛnjamin na banɛ nu Bahurim njɛ izɛlɛgwu, bee zhe kakayɛ baa zhagajɛ na atwa Juda bee teji agwuma Devid uhwaŋna.

¹⁷Baa 'waŋnɛ atwa na banɛ nụ ụlamụ Bɛnjamin atwa akpakwụ-a-ta (1,000). Ge Ziba na shɛ yɛu-ugondu ihwɛ ya agwuma soul zhajɛ du na miaụŋ mu bwa me eyi umpwa-na-muba-mu-ta keeni miaụŋ-mu-ugondu ubwa atwa woshi, aa njɛ kakayɛ ee ci Jodan na agba agwuma.

¹⁸Ee keshi Urefu ata no ofwo na iri shi maa ɛ kɛshicinjɛ atwa ihwɛ ya agwuma, maa a njɛ du iyi elele nɛ zhɛ yo lomicingo agwuma amɛ. Ge Shimei yɛu Gira keshi Jodan tobwolo agwuma te keshi shi o, bee leyi na agba agwuma,

¹⁹bɛɛ hiɛŋ agwuma, Agwuma Tumaka! N gengeni iwɛwɛ mi nɛ Ngaa bɛ njɛ la jita ata abụ banɛ nu Jɛrusalɛm, te teyinje iŋ kwukwuŋ ya.

²⁰Iwɛnɛ po M mepi maa Gamba yɛu gɛ bu ugondu M bɛ njɛ iwɛwɛ, iwɛbɛ po Ngaa shɛ bụtụ bi hiiŋ na banɛ nụ ụlamụ Josɛf hwɛ hwɛɛ maa Mɛ bi tɛjɛ uhwaŋna hwayɛ ga, gabụ agwuma-ihwɛ mi na shɛ agwuma.

²¹Ga Abishai yɛu Zɛruwia jishijɛ, bɛɛ hiɛŋ, Ga kwụnɛ Shimei, iwɛnɛ tu baa twagajɛ la bụtụ na AGWANGWAMA dudugeni manɛbɛ maa sha agwuma.

²²Ama agwuma jishijɛ bụ, bɛɛ hiɛŋ, Imbe shɛ inee mi ne hiŋ ahiɛba miaụŋ mu Zɛruwia maa hiɛ shɛ atwa i'ime mi hwayɛ gaa? E te eri a kwụna bụtụ bi Isrɛl be elele hwayɛ ga waa hŋ? M mepi shi suu maa Gamba n shɛ agwuma ni Isrɛl hwayɛ ga?

²³Nazhɛ agwuma hiɛŋ shimei, M bi shileni-unu maa a zha shɛ ma bụ kwụna o.

²⁴Gɛ Mɛfiboshɛt na shɛ bụjalụ Soul, zwi bee teji agwuma uhwaŋna. Bu fwoci shi okwo ɛvwɛvwɛjɛ ubwa o, bu nangwacanjɛ shɛ kaa okwo tizholu tu bwa o, bi nyashɛnjɛ shɛ okwo tugwuno tu bwa o, te kwuni la taa nụ ụjita na ta agwuma beni nu Jɛrusalɛm uuwa i ci aka na bee gwure lapiya o.

²⁵Aka na ti gɛ Mɛfiboshɛt banɛ nu Jɛrusalɛm[38] baa twa na agwuma, agwuma heŋteni bu, bɛɛ hiɛŋ, Ɛ-Mɛfiboshɛt, Iwembe po abụ zhagajɛ shɛ ne mii?

²⁶Gɛ Mɛfiboshɛt jishijɛ bụ, bɛɛ hiɛŋ, Agwuma tumaka! Bi mepi du maa N shɛ ugwurukwu. Ibɛ po Ngɛɛ hiɛŋ yɛu mi ugondu ge Ziba maa ga patana ufuridi na aba izhinyɛci iwɛ maa Ma suka iŋ ma bụ 'wa maa ti zhagaga, bee n helekeci ya.

²⁷Ama bu bu dwetwegeni ụzagwụ iwe mi gabụ agwuma-ihwɛ mi, gabụ kaa bu n shanɛ gana butumwa ba Agwatana ba azuba. Iwɛ ecilo ata nda iyi elele nɛ ibi teneni cɛŋ ne eshe bu.

²⁸Agwuma-ihwɛ mi, i lanɛ yebe maa kwụnɛ atwa umwamwa ihwɛ bishi mi hwɛɛ, ama gabụ na kaa bi te me peni ohwolu waa maa Ma sha bụtụ bu ko na atwa na a kalanga u'ala na bụ ni ikwede ike ni iyimɛyɛ tiya. Uwebiye imbe Ngee te teni cɛŋ maa Ma bụ lụpa gabụ agwuma-ihwɛ mi maa n ndanɛɛ?

²⁹Agwuma jishijɛ bụ, bɛɛ hiɛŋ, Imbe du abụ ta 'yajɛ tụdụma sasanaa? N dumwa, Ngɛɛ hiɛŋ, Dwotwogonu ma cɛnjɛ tu Soul ahiɛba na Ziba.

³⁰Gɛ Mɛfiboshɛt jishijɛ agwuma, bɛɛ hiɛŋ, Ga ge Ziba suji tu maa 'yaga hwɛɛ bwooko. Ama gana na ebi jiye lapiya gabụ agwuma-ihwɛ mi, inɛ ɛtɛ i n gwumwa ya.

³¹Ga Bazilai ata shɛ Bigiliad, banɛ du nu Rogɛlim baa zhajɛ maa she agwuma maa e keshi Jodan.

³²Ga Bazilai ata kaa injɛ ya tebiye, bu namɛ shiywa dupu-nu-talacɛ te e meci bu (80). Bɛ shɛ du kaa bɛzhɛgba tebiye, ibɛ po bee peni agwuma iyimɛyɛ na aka na ta agwuma namɛ la nu Mahanaim.

³³Agwuma hiɛŋ Bazilai, Hwure ti zhagaga ti zhe Jɛrusalɛm, maa Ma bụ untangana apata.

³⁴Ama ga Bazilai jishijɛ agwuma, bɛɛ hiɛŋ, shiywa shɛ mba bwa Ngɛɛ tɛ zhɛ ma ya uraiŋ harɛ maa Ma bu 'wa nu Jɛrusalɛm gabụ agwumaa?

³⁵N namwawaŋ shiywa dupu-nu-talacɛ te e m meci, N te eri suu ma mapa tuswoswoswo ti iyi iwɛ ni iyi ibiye wa? Gamba na N shɛ yɛu-ugondu bu, N te eri suu ma hwuga ụlatụ iyi nɛ Ama ya keeni iyi nɛ Ama swa? N te eri suu ma hwuga rụhwụŋ ra azunga etwenyi na a na eyikwo? Iyɛri mi, iwembe po Ngɛɛ tɛ zhɛ ma bu kaana ya i'wɛŋnɛ tijama ti mii?

³⁶N lanɛ shɛ ya maa n njɛ uwebiye i ci gana ata ugombo. Iwɛ inɛ ɛtɛ N zhɛ me bi she kwakwa cwɛŋ maa Ma kasha Jodan ga nazhɛ Me gwure.

³⁷Iyɛri mi, Ma bụ tabwa maa n leneni maa Mo gwulo mo 'wo no ofwo na u'uye bishi mi no bino mi namɛ. Ama yɛu mi ga Kimham na, Agwuma Tumaka! Shapa bụ maa bu na bu ndana ugondu, na nda bu tebiye gana na teni cɛŋ ne eshe bu.

³⁸Agwuma jishijɛ bụ, bɛɛ hiɛŋ, N zhɛ ma shapa Kimham maa zhagaga ne mi, maa Ma nda bụ tebiye gana na aba jala. Iyi elele nɛ kaa aba jala maa Ma bu ndana, N zhɛ ma bu ndana iŋ.

³⁹Gana na ta atwa ata keshi Jodan ata, agwuma du keshi hwɛɛ aba, Nazhɛ agwuma ruwanɛ Bazilai (baa njɛ bu ongbo), bee peni bu uwebiye. Nazhɛ ga Bazilai hwuri ujiyo ni ihwɛ ibwɛ.

⁴⁰Aka na ta agwuma keshi hwɛɛ, ibɛ atwa Juda hwɛɛ keeni ashashɛ atwa Isrɛl oko zhagajɛ na agwuma, boo to tuhwulo bee zhe Gilgal. Ga Kimham kaa du zhagajɛ nu bwa.

⁴¹Nazhɛ atwa Isrɛl zhegeni agwuma hwɛɛ aba, ɛɛ hiɛŋ bụ, Agwuma Tumaka! Iwembe po miaụŋ-mo-bino tu a na shɛ atwa Juda ubu zunji swɛɛ, ee bi keshicinji Jodan, ta atwa umwamwa bụ keeni anjɛ-ugondu bu hwɛɛɛ?

⁴²Ibɛ po atwa Juda hwɛɛ jishijɛ atwa Isrɛl, ɛɛ hiɛŋ, Tɛ njɛ iŋ iwɛnɛ ta agwuma shɛ bụtụ tu. Iwembe po yaa hi gwumanɛɛ? I zasa iyimɛyɛ bee ti senji, i zasa kaa upwaŋ we elele bee ti peni o.

⁴³Ama atwa Isrɛl jishijɛ atwa Juda, ɛɛ hiɛŋ, okwo agwuma shɛ bụtụ hiŋ, ti 'yajɛ tuba urobwo wa agwuma kpalụ umpwa eti hi hwuri. Iwembe po ahiɛ tu ngbaracɛ cwɛɛŋ? Shɛ atuba suu tu kwuni iwɛ agwuma tugwuricinje tụdụma hiiŋ ne hiŋ? Ama n-ndumwa ma atwa Juda mi 'yajɛ ikɛnyi tebiye ni iwɛ ɛtɛ uhwuri atwa Isrɛl.