Read bassa 2 SAMUƐL UYEBI 2 Bible Online

2 SAMUƐL UYEBI 2 - bassa bible

2 SAMUƐL UYEBI 2

¹Na aba inɛ gɛ ge Devid heŋteni AGWANGWAMA, bɛɛ hiɛŋ, Ma zha suu nụ ụshɛpwụ uko na amɛ ashɛpwụ Juda? AGWANGWAMA jishijɛ bụ, bɛɛ hiɛŋ, Iiŋ, zhaga. Ge Devid heŋteni bu, bɛɛ hiɛŋ, Una naa Ngɛɛ zhɛ ma zhaa? Agwangwama hiɛŋ bụ, Zhaga Hibron.

²Ge Devid zhe ga apata te eyikwo ubwa eyebi: ga Ahinoam, na baa zanɛ ni Jɛzrɛl, keeni Abigail ata shɛ bululo Nabal bụtụ ata bu Kamɛl.

³Ge Devid suji du atwa na namɛ pu bwa hwɛɛ, ta atwa na atwa ata 'yajɛ na amwamwa aba, aa jɛjɛ na ashɛpwụ na rungwutwonu Hibron.

⁴Nazhɛ atwa Juda zhajɛ ee dudugeni Devid manɛbɛ maa a njɛ bụ agwuma Juda. Aka na te e mbishi Devid maa bwonu atwa Jabɛsh-giliad ni ru'wo ru Soul,

⁵Baa tumwanɛ atumwa ni Jabɛsh-giliad, bɛɛ hiɛŋ aŋ, Ga AGWANGWAMA ihi peni-uwebiye, iwɛnɛ ehi mepeni agwuma hiŋ go Soul iwɛ ehi ni bu.

⁶Ga AGWANGWAMA ihi mepeni iwɛ na tɛcara tu bwa! N zhɛ du kaa ma hi nda uwebiye iwɛnɛ ta ahiɛ njɛ ijɛ.

⁷Iwɛ ecilo ata, mama 'imɛ ma maa hi 'yaga ikɛnyi, iwɛnɛ agwuma hiŋ go Soul uwo, atwa Juda kaa n dudugwonuo manɛbɛ maa Ma sha agwuma aba.

⁸Ga Abnɛ yɛu Nɛ na shɛ uberezhe we jeshi Soul, shepi Ish-boshɛt nu Mahanaim,

⁹baa njɛ bụ agwuma ni Giliad keeni agwuma Ashu[3] keeni Jɛzrɛl keeni agwuma Ifrem keeni agwuma Bɛnjamin ta agwuma atwa Isrɛl hwɛɛ.

¹⁰Ge Ish-boshɛt yɛu ɛtɛ Soul namɛ shiywa buhanda te e meci bu nazhɛ bee kwuni tugwama ti Isrɛl tiya. Baa yɛ tugwama ta ata shiywa shi yebi, ama atwa ụlamụ Juda tuba 'wa Devid.

¹¹Ge Devid yɛ tugwama tu Juda ni Hibron shiywa shi cenje ni ipiɛnɛ icihiŋ.

¹²Ga Abnɛ yɛu Nɛ keeni atwa ugondu Ish-boshɛt yɛu Soul beni ni Mahanaim ee zhe Gibion.

¹³Go Joab na ɛɛ hiɛŋ bino bwa gɛ Zɛruwia,[4] keeni atwa ugondu Devid beni aa twa nu ukwokwo meni mu ko ni Gibion. Aa gɛgajɛ, atwa ye jɛjɛ hileniye atwa na jɛjɛ hileni na.

¹⁴Ga Abnɛ hiɛŋ Joab, Ge esemberi ga ishajɛ maa atwa ifelu ta kwụba. Go Joab jishijɛ bụ, bɛɛ hiɛŋ, I zhɛmɛ, gɛ ishijɛ ga.

¹⁵Aa mama rɛtanụ, atwa Bɛnjamin a na namɛ geri Ish-boshɛt yɛu Soul namɛ atwa umpwa-na-ba-eyebi, miaụŋ-mu-ugondu Devid mu namɛ atwa umpwa-na-ba-eyebi.

¹⁶Aa mama imanụ ohiuhiu, oo momo sopogonu otokwobi ni i'ɛŋbi, gabata aa 'waŋ na cɛnjɛ hwɛɛ aba ee 'wi zhiaaŋ. Ibɛ po oo po apata izeci ni Gibion maa, Helkat-hazurim.[5]

¹⁷Ujasa ata vwi eshe jita ata tebiye, miaụŋ-mu-ugondu Devid kaa mu lasụ Abnɛ keeni atwa Isrɛl.

¹⁸Miaụŋ-me-eyi mu Zɛruwia mụ tatụ kaa mu namba apata: go Joab, na Abishai keeni Asahɛl. Ga Asahɛl kaa 'yebi usumwa tebiye gana ugwɛɛgwɛ.

¹⁹Ga Asahɛl urigeni Abnɛ ririri, bụ vwụrɛ shɛ okwo nu u'ala ubiye kwo kaa nu u'ala ugwulwo ti bee urigeni bu o.

²⁰Ga Abnɛ mbiyanɛ ekwunyi, bɛɛ hiɛŋ bụ, Asahɛl, gabụ ree? Ga Asahɛl jishijɛ bụ, bɛɛ hiɛŋ, Iiŋ, Gamba kaa.

²¹Ga Abnɛ hiɛŋ bụ, Vwula geri bu u'ala ubiye bu kwo kaa geri bu u'ala ugwulwo bu maa 'imɛ usemberi uko maa leshiji ufwa ubwa ujasa, maa n genji tu'wa! Ama ga Asahɛl vwụrɛ shɛ maa ganga bụ tu'urugono.

²²Ga Abnɛ hiaaŋnanɛ Asahɛl, N genji tu'urugono! Iwembe po abu ma n nda iji maa Ma bu swalụpana na cɛnjɛɛ? Gana naa tuba Ngɛɛ zhɛ ma ala maa Ma twa hwayɛ eshe ni yɛu-bino bu go Joabuu?

²³Ama ga Asahɛl lacɛ bụ tuganga, nazhɛ ga Abnɛ karɛ isɛnu ibwɛ mabaaba, yee sepi Asahɛl na amɛ yee pushe na aba; bee leyi apata bee 'wi gu nu urubwo ata. Atwa elele na kaa ci urubwo ata ga Asahɛl 'wi bee shiri, o shikono apata zhiiŋ.

²⁴Ama go Joab na Abishai urigeni Abnɛ, aka na tu uwaŋna zhɛ utwonuo, ee ci bikpekwu bu ko na ɛɛ hiɛŋ izeci ibwɛ, Ama, na namɛ geri bu uwaŋna-banụ bi Gia nu uhwaŋna ụshɛka Gibion.

²⁵Nazhɛ atwa ụlamụ Bɛnjamin ụlwatagwụ no ofwo Abnɛ, ee shikeni urubwo uko ni ikpɛngwu-tutwa ni ihiŋhiŋ bikpekwu ata.

²⁶Ga Abnɛ suyanɛ Joab, bɛɛ hiɛŋ bụ, Unyizo-nom suu ɛti zhɛ tu na mama kwụnanụ no otokwobi nu ujasa? Bi mepi shi suu maa ukwunanga ibɛ zhɛ wa wụmangwụ hwuŋ? Aka na kwuŋ ɛbi zhɛ bɛ hiɛŋ atwa bụ maa ge genji miaụŋ-mo-bino ma aba tu'urugonoo?

²⁷Go Joab jishijɛ bụ, bɛɛ hiɛŋ, N to Agwatana na shɛ buumwa maa yaa shɛ abu ga jɛmɛ shɛ iwɛ gɛ, atwa mi gɛ zhɛ mo hi urugono ahiɛba miaụŋ-mo-bino tu uuwa gi iyi yo holo beyi.

²⁸Nazhɛ go Joab njɛ okowuya maa ga atwa ubwa genji ya atwa Isrɛl tu'urugono; nazhɛ ee genji ya uwuru.

²⁹Ga Abnɛ na atwa ubwa tenenji Araba jita ata; uuwa ee keshi Urefu Jodan, ti iyi heri ee kwuneneni tahaŋnụ uuwa uwaŋna shikeci nazhɛ ee ci Mahanaim.

³⁰Tu go Joab genji Abnɛ tu'urugono, bee gwure, aka na tu boo sotulonu atwa ubwa hwɛɛ, nazhɛ boo to ugbe maa miaụŋ-mu-ugondu Devid umpwa-na-muba-mi-cinjishi mu zasaba o, atwa ata kaa namɛ swooŋ na Asahɛl.

³¹Ama miaụŋ-mu-ugondu Devid tuba mu kwụnɛ atwa ụlamụ Bɛnjamin a na ga shɛ atwa Abnɛ kpakwụ-ni-dipi-tɛtu-ne-eshe-umpwa (360).

³²Nazhɛ go Joab na atwa ubwa shepi ru'wo ru Asahɛl ee ni ru nu u'uye bishi bwa na namɛ ni Bɛtlɛhɛm. Nazhɛ ee hwuri tahaŋnụ ta aba na amɛ ụjita ata, ibɛ iyi heleni aŋ ni Hibron.