Read bassa 2 SAMUƐL UYEBI 22 Bible Online

2 SAMUƐL UYEBI 22 - bassa bible

2 SAMUƐL UYEBI 22

¹Aka na ta AGWANGWAMA lesheji Devid ni i'ɛlɛ ya atwa i'ime ibwɛ ye elele hwɛɛ keeni i'ɛlɛ Soul, nazhɛ baa zunganganɛ AGWANGWAMA azunga ga.

²Bɛɛ hiɛŋ, AGWANGWAMA ubwa shɛ ijilɛni mi, ne bikepi mi keeni bileleji mi.

³Agwatana mi, gabụ bɛ shɛ ofwo mi tuswaka, no ofwo bu Omo bino. Gabụ bu ma n jilanɛ gana abula ujasa; gabụ bu ma n lashaga maa Ma nama lapiya. Gabụ kaa bɛ shɛ Bibicinji mi; Gabụ bu ma n jilanɛ, bu mo m bicingo ni iyi ya abwagara.

⁴N keri AGWANGWAMA ụhiɛŋshɛ, bee m bicinji no olugwo atwa i'ime mi. Ubwa lanɛ na ashɛtwa!

⁵Adanga tu'wo n rungwutwonu hwɛɛ mu; uwururu meni na ma nda bụtụ ufwu n zweni inyɛsɛ.

⁶E'uye mo n horukono ohwulu hwɛ hwɛɛ mu, E'uye kaa m biteni modugwulo

⁷N keri AGWANGWAMA ụhiɛŋshɛ ne tiriri ti mi, Ngaa suyanɛ Agwatana mi maa mo m mbiyono. Bu namɛ taa nu umwono ubwa baa hwụjɛ rụhwụŋ ri mi, n'ungwa mi mi kaa mi teni acɛbɛ ubwa.

⁸Ibɛ po unyizo zhingotu waa njɛ bulama; okoshilo tụla zhingotu aa zhɛgɛda, iwɛnɛ ta Agwatana a nda isɛbwɛ.

⁹Nshikwo ma banɛ ni inyɛnu ibwɛ, bụratụ bu ulwa na bo hwoŋzhingo iyi kwunduu ba banɛ nu unu ubwa, no olugwo ubwa kaa akanga ulwa na o gorogo a banɛ.

¹⁰Bu bajɛ tụla bee kezhe, odomu cilwo kaa namɛ tuta tɛ ɛvwɛvwɛjɛ ubwa.

¹¹Ubwa sụcɛ iyi-uumwa ya apiambɛ baa hiɛrɛ; baa patanɛ na apiambɛ mpiala mu uvwugo boo rungo.

¹²Bu meme urigeni tishi, cilwo tu na meni mi shini tu rungwutwonu bu.

¹³Akanga ulwa na o gorogo a banɛ nu uhioko-uhwaŋna ụ tụraawụụ na wa ta nu umbe ubwa.

¹⁴AGWANGWAMA keri uto na tụla, ibɛ po rụhwụŋ ra Bụtụ ata na Hwuri kpaaŋ, ra lashajɛ uŋ.

¹⁵Bi keri a'inla ubwa bee gereteji atwa i'ime ibwɛ; ibɛ po tiberere tɛ ɛbɛrɛ tu bweji aŋ nu usumwa tugozhigo.

¹⁶Icicɛ itekwu shiri ya caakwụ, okoshilo unyizo kaa banɛ nu ukpogwu na aka na ta AGWANGWAMA tezhigeni atwa i'ime ibwɛ, na rụhwụŋ ru bwa ru tugbada gbada ru na ru banɛ ni ihwungwɛ inyɛnu ibwɛ.

¹⁷Bee zucinje i'ɛlɛ ibwɛ tu baa namɛ taa na azuba baa n untanganɛ, bɛɛ m mbɛ, bɛɛ m bɛcinjɛ ne meni ma ata mi ileji duwa.

¹⁸Ubwa n leshiji ni i'ɛlɛ ya atwa i'ime mi a na 'yajɛ ukpahiŋ duwa, bee n leshiji du ni i'ɛlɛ ya atwa na n to ni i'ime, iwɛnɛ ta a 'yajɛ ukpahiŋ ee n hwuri.

¹⁹Aka na tu Ngaa namɛ na Abara-ne-ebe, nazhɛ ee n kepengeni, ama AGWANGWAMA tuba n shikicinji dimi.

²⁰Ubwa m bɛcinjɛ, bee n shiri no ohwolu tukpotoo; iwɛnɛ ta amɛ ubwa lemi ne mi.

²¹AGWANGWAMA, ubwa n cɛpɛ titeni ti mi te teni cɛŋ ne tiririri ti mi, bee m peni-uwebiye, iwɛnɛ ti i'ɛlɛ mi namɛ shɛshɛshɛ.

²²N untanganɛ ihwɛŋnɛ ya AGWANGWAMA, N njɛ shɛ kaa tugworozwo maa Ma ganga Agwatana mi o.

²³Mo shiyono andwa ubwa elele eshe, N lacɛ shɛ kaa onu ubwa tụpana o.

²⁴Ubwa mepi maa N zasa unu-tusapa o, Ngaa mama untangana kaa maa kede mu na nda iwɛwɛ o.

²⁵Iwɛbɛ po AGWANGWAMA ma n tụpa titeni ti mi iwɛ tiririri ti mi, iwɛnɛ tu Ngaa namɛ shɛshɛshɛ ne eshe ubwa.

²⁶Oo AGWANGWAMA, gabụ bɛ shɛ bụtụ bɛ tɛcara no ofwo atwa na ubu shanɛ atwa tɛcara, bu zasa kaa unu-tusapa pa atwa na zasa unu-tusapa o.

²⁷Gabụ bu namanɛ atwa na namɛ rụmbɛɛ, rụmbɛɛ du, abu namanɛ atwa na zasa cara gana maa bu zasa du cara o.

²⁸Gabụ bo bicingo atwa na meme zucinje, ama bu ngbaracɛ tuba atwa na momo mungicingo maa zucinje aŋ.

²⁹Oo AGWANGWAMA, gabụ bɛ shɛ uhioko-uhwaŋna mu, Gabụ kaa bo unzo tishi ti mi hwɛɛ.

³⁰Gabụ bu ma m pana ukpahiŋ maa Ma sukakana atwa i'ime mi, tedure na Agwatana mi kaa Ngee eri ma dwa ungapa ni ihiŋhiŋ uba.

³¹Uhwaŋna wa Agwatana ga kaa u ulwa kpaaŋ, onu-tishilogo AGWANGWAMA kaa a shɛ iwɛ-tɛkana. Ubwa shɛ abula ujasa atwa elele na a datana bụ.

³²Gaaba ta shɛ Agwatana namɛ swooŋ na AGWANGWAMAA? Gaaba ta 'yajɛ ukpahiŋ namɛ swooŋ na Agwatanaa?

³³Agwatana ga, ubwa shɛ bileleji mi na 'yajɛ ukpahiŋ, baa njɛ maa ga uhwaŋna mu nama lapiya.

³⁴Ubwa njɛ maa gɛ ivwunɛ mi shikono dimi gana unabara, bee n shikicinji lapiya ni ihiŋhiŋ nshama.

³⁵Ubwa mbisegeni i'ɛlɛ mi ujasa tɛnda, iwɛ maa aragbamụ mi eri okwo uta na aa njɛ nu utumburɛ tumba.

³⁶Oo AGWANGWAMA, gabụ bu m peni abula ujasa ubino bu, gabụ kaa bu m mbiyeni upo Ngaa shɛ bụtụ bụ 'wụtụ duwa[44]

³⁷Gabụ bu ndanɛ ahaŋpalụ mi ohwolu na gembi, iwɛbɛ po Ngee sherimeni shi kwukwuŋ.

³⁸N urigeni atwa i'ime mi nu usumwa, Ngee iricinji aŋ, N gwuri shi kaa maa ma ganga aŋ uuwa i ci aka na aa njɛ ufwu kpaaŋ.

³⁹M po aŋ na cɛnjɛ, e eri shi ɛ ishijɛ ya; N fwụndacɛ aŋ, ee weteji ya tuta tɛ ɛvwɛvwɛjɛ mi.

⁴⁰Gabụ kaa bu m peni ukpahiŋ iwɛ ujasa, maa Ma ala atwa i'ime mi tụlasatagwụ.

⁴¹Gabụ kaa bɛ njɛ maa ga atwa i'ime mi e n gezhigeni, Ngee iricinji kaa atwa na n to ni i'ime.

⁴²A mbiyangana iwɛ bụtụ na zhɛ bo mbiyono aŋ, ama i zasa kaa bụtụ be elele bicinji aŋ o. Aa suyanɛ AGWANGWAMA, bi leni shi aŋ o.

⁴³N nishi aŋ rukwu rukwu aa shɛ ya gana upwupwutu, Ngee rikeci aŋ gana udwodwo na namɛ ni ihwɛŋnɛ ya amɛ ụshɛpwụ.

⁴⁴Gabụ bu n lesheji ni i'ɛlɛ ya atwa mi a na ma n kapangana,[45] abụ n untanganɛ maa Ma sha agwuma anya edenji; atwa na Ngee te mepi shi la kwukwuŋ aba shɛ ya miaụŋ-mu-ugondu mu.

⁴⁵Agaiŋ mo n kwuzono, gunu na ta a hwụjɛ rụhwụŋ ri mi, aa hwuga du unu mu.

⁴⁶Agaiŋ ata zasa ya ohwulu tishito, a bananjɛ ni ijilɛni ya aba aa zhɛgɛdaga.[46]

⁴⁷AGWANGWAMA shɛ buumwa! Zhemonjino ma uparatayɛ ata mu! Go ugombo ụ'wụtụ ụ shɛ una wa Agwatana na kaa shɛ uparatayɛ na mo m bicingo!

⁴⁸Agwatana, ubwa ba nda itɛpwɛ mi; bee tileni anya edenji nu ukaka mu.

⁴⁹Ubwa n tufwurinji na atwa i'ime mi, Gabụ kaa bu n gembicinji maa Mo hwulo atwa i'ime mi, Gabụ kaa bu ma n lashaga na atwa abwagara.

⁵⁰Iwɛ ecilo ga ibɛ po Ngɛɛ zhɛ Ma bụ shɛtana na ashashɛ anya edenji; maa Ma bụ zungangana azunga ashɛtwa.

⁵¹Ubwa ba lasagwụ agwuma ubwa tụlasụ tụ 'wụtụ;[47] boo lubo kaa bụtụ ata bee dudugeni manɛbɛ maa sha agwuma tulubo ti tikpeke. Ubwa shɛ ge Devid keeni ajalalo ubwa unyizo-nom.