Read bassa 2 SAMUƐL UYEBI 23 Bible Online

2 SAMUƐL UYEBI 23 - bassa bible

2 SAMUƐL UYEBI 23

¹N-ndumwa mu umɛwɛɛ mu na ge Devid yɛu Jɛsi dumanjɛ, n-ndumwa ma bụtụ na Agwatana gembicinji te zeci, ubwa shɛ bụtụ ata Agwatana Jekob dudugeni manɛbɛ maa ya tugwama, bụzụnjɛ ata azunga ubwa latụmanɛ atwa Isrɛl.[48]

²Mpiala ma AGWANGWAMA ma duma iwɛ tedure ne mi, n-ndumwa mu bwa kaa mu namɛ nu unu mu.

³Agwatana Isrɛl dumanɛ iwɛ; ubwa ata na shɛ uparatayɛ wa atwa Isrɛl, m mbishi iwɛ, bɛɛ hiɛŋ, Agwuma elele na a untangana ofwo ne tiririri, na ba untangana ofwo ni inyɛsɛ ya Agwatana tụsụma,

⁴ubwa zhɛ ba sha gana uhioko-uhwaŋna na wa ta ti iyi ye suje nu uvwungwa, ubwa zhɛ ba sha gana uwaŋna na wa ta nu uvwungwa na tụla tu na tu zasa udomu, ubwa zhɛ ba sha gana eshilo na a nda maa ambɛ unshɛ na cɛnjɛ.

⁵Iiŋ, shɛ gana ata suu ihwɛ mi zhɛ yo shikono ririri na Agwatana? Iwɛnɛ po bu twawa-unu unyizo-nom ne mi, unu-tutwa na eri shi wa bwadụ kwukwuŋ, bi shiri-unu na zha shɛ wo sheyingo. Shɛ iyi nɛ suu Ama jala ta hwɛɛ? Ibɛ kaa zhɛ ya sha tɛzhɛmana ti mi, Agwatana kaa zhɛ ma n ndana iŋ tilɛɛ.

⁶Ama atwa elele na zasa Agwatana,[49] a shɛ gana esepi na aa 'wɛŋ; i zasa bụtụ eri bo sugo aŋ ni i'ɛlɛ o.

⁷Semi bụtụ na meme umpenji na ashɛmbɛrɛ keeni isɛnu nɛ ee cimbeni nu utata, ubwa kiri zhɛ no tumongono aŋ, ɛ zhɛ kaa o hwoŋzhingo aŋ kwunduu.

⁸Nzeci me ejeshi a na beni urishi na amɛ atwa na ge Devid 'yajɛ na: bụtụ bi hiiŋ shɛ go Joshɛb-ashɛbɛt, ata shɛ Butakɛmon, ubwa shɛ buhwuri-bu-umbe ba atwa ata atatụ.[50] ibwɛ baa njɛ ujasa na atwa akpakwụ-eneshi (800), baa kwụnɛ aŋ kaa na aka ata oko.

⁹Bụtụ na 'wa bụ na ashashɛ atwa ata atatụ i shɛ gɛ Ɛleaza yɛu Dodo bụjalụ Ahohi. Bu namɛ la ne Devid nu ụjita ata ee mbiseji Afilistia a na sotulonu iwɛ ujasa n-ndumwa, ibɛ po atwa Isrɛl zeji-unu ee gwuri.

¹⁰Ama bi shikeni tuba dimi baa kwụnɛ Afilistia uuwa i ci aka na u'ala ubwa 'imɛtanɛ ya utokwobi wee eri shi wa bwacɛgwa uŋ. AGWANGWAMA kaa lasagwụ aŋ tụlasụ tụ 'wụtụ jita ata. Na aba na tu woo hwuwowu, nazhɛ atwa Isrɛl gwure no ofwo Ɛleaza maa e hwuceci i'wɛŋnɛ ujasa nu n'wo ma atwa ata aa kwụnɛ.

¹¹Bụtụ bu urishi bu tatụ i shɛ ga Shama yɛu Egei ata shɛ Buhara. Na aka na Afilistia sotulonu ni Lehi, ne ehilo ata izhigwenyi barɛ. Ibɛ atwa Isrɛl gezhigeni Afilistia.

¹²Ama ga Shama shikeni dimi ni itimɛ ɛtɛ, baa twa ifelu, baa kwụnɛ Afilistia. AGWANGWAMA kaa lasagwụ aŋ tụlasụ tụ 'wụtụ jita ata.

¹³Na aka bɛ ɛhɛnɛnɛyɛ, ibɛ atwa atatụ beni na atwa talacɛ a na shɛ ehiu atwa vwɛ, ee zwi no ofwo na ge Devid namɛ nụ ụpangwụ Adulam. Na aka ata ufwugwo we ejeshi Afilistia tuba jwe ugba wa aba nu Ulomu Rɛfaim.

¹⁴Na aka ata ge Devid tuba namɛ ni ishɛmɛ ɛtɛ 'yajɛ ikepi, ejeshi Afilistia oko tuba namɛ ni Bɛtlɛhɛm.

¹⁵Aka na ti i'uyɛ iri Devid, bɛɛ hiɛŋ, Bụtụ bu ko kiri ga ma salanɛ meni nu u'ibwa meni ata dongonu odubo tutuno ti Bɛtlɛhɛm N ngaa swa!

¹⁶Ibɛ po ejeshi ebe urishi atatụ zhe ee teni na ashashɛ ugba wa Afilistia pwaa, aa salanɛ Devid meni nu u'ibwa ata namɛ to dongonu odubo ata Bɛtlɛhɛm, aa shapɛ mụ ee gwure pi Devid. Ama ge Devid swe shi mu o, baa 'wanjɛ mụ AGWANGWAMA na cɛnjɛ.

¹⁷Bɛɛ hiɛŋ, Oo AGWANGWAMA, N eri shi ma swa meni mu ga kwukwuŋ! Iwɛnɛ po mɛ shɛ gana bụtụ na ba swa mehieŋ ma atwa ata njeri ohiuhiu aba no tu'wo! Ibɛ po baa lacɛ mụ tuswa. Iyi nɛ ejeshi ata atatụ a na beni urishi nu ukpahiŋ njɛ ta.

¹⁸Ga Abishai yɛu-bino Joab yɛu Zɛruwia, ubwa shɛ uhiu wa atwa ata talacɛ.[51] Ni isɛnu ibwɛ baa njɛ ujasa na atwa kpakwụ-ni-dipi-yebi (300) baa kwụnɛ aŋ kaa. Ibɛ po baa shɛ ya bụtụ bu urishi na ashashɛ atwa atatụ.

¹⁹Ubwa hwuri atwa vwɛ nu urishi na ashashɛ atwa ata talacɛ, ibɛ po baa shɛ ya uberezhe wa aba. Ama bi ci shi tuba atwa ata atatụ nu urishi tubana o.

²⁰Gɛ Bɛnaiya yɛu Jehoiyada na banɛ ni Kabiziɛl, shɛ bijeshi bi nya na beni urishi nu ujasa. Bɛ njɛ teleyi tu ufwugwo harɛ baa kwụnɛ Amoab eyebi a na 'yajɛ du ukpahiŋ nu ujasa tɛnda tebiye. Gụnụ ụjita ata uko uko bee zwi nu ushapa uko, bɛɛ kwunɛ bizeci nụ ụjita na tulomu ti ticwii[52] tu namɛ tebiye.

²¹Baa Kwụnananɛ du bụtụ bi Ijipti bu ko na gembi tebiye na kaa 'waŋnɛ du isɛnu ibwɛ. Gɛ Bɛnaiya kaa kepengeni bu ne bidingbengbere bu bwa, bee leshiji isɛnu ni i'ɛlɛ bụtụ ata bi Ijipti baa kwụnɛ bụ ni ibɛ.

²²Teleyi tu na gɛ Bɛnaiya yɛu Jehoiyada njɛ ta. Ibɛ po izeci ibwɛ beni urishi gana inɛ ya atwa ata talacɛ a na 'yajɛ ukpahiŋ.

²³Bi beni urishi na ashashɛ atwa ata talacɛ, ama bi beni shi tuba urishi gana atwa ata atatụ o. Ibɛ po ge Devid njɛ bụ uhiu wa atwa na a ngbaraka bụ.

²⁴Nzeci maa anya atwa na ashashɛ atwa ata talacɛ na ɛɛ zhɛ a imanjɛ epe: Ga Asahɛl yɛu-bino Joab, nɛ Ɛlihanan yɛu Dodo na banɛ ni Bɛtlɛhɛm,

²⁵na Shama keeni Ɛlika a na banɛ nu Harod,

²⁶ne Hilɛz na banɛ ni Pɛlɛt, ne Ira yɛu Ikɛsh na banɛ ni Tɛkoa,

²⁷na Abiɛzɛ, na banɛ na Anatot, nɛ Mɛbunai na shɛ Buhushat,

²⁸na Zalmon na shɛ Bu'aho, ne Meharai na banɛ ni Nɛtofa,

²⁹ne Hilɛb yɛu Beana na banɛ ni Nɛtofa, ne Itai yɛu Ribai na banɛ ni Gibia nụ ụlamụ Bɛnjamin,

³⁰nɛ Bɛnaiya na banɛ ni Pirataon, ne Hidai na banɛ ni isese Geash,

³¹na Abialbon na shɛ Bu'abat, na Azmavɛt na banɛ nu Bahurim,

³²nɛ Ɛliaba na banɛ nu Shalbon, na miaụŋ-me-eyi mu Jashɛn, no Jonatan,

³³na Shama na shɛ Buhara, na Ahiam yɛu Shara na shɛ Buhara,

³⁴nɛ Ɛlifɛlɛt yɛu Ahasbai na banɛ ni Meaka, nɛ Ɛliam yɛu Ahitofɛl na banɛ ni Gailo,

³⁵nɛ Hɛzro na banɛ nu Kamɛl, ne Pearai na shɛ Bu'abi,

³⁶ne Igal yɛu Natan na banɛ nu Zoba, ne Benai na shɛ Bugad,

³⁷nɛ Zɛlɛk na shɛ Bu'amon, na Naharai na banɛ ni Bɛirot, na shɛ bu'waŋnɛ-bi-i'wɛŋnɛ ujasa Joab yɛu Zɛruwia,

³⁸ne Ira keeni Garɛb a na shɛ E'it,

³⁹no Uria na shɛ Bihit: hwɛɛ aba namɛ atwa talacɛ na atwa ecenje.