Read bassa 2 SAMUƐL UYEBI 7 Bible Online

2 SAMUƐL UYEBI 7 - bassa bible

2 SAMUƐL UYEBI 7

¹Ta agwuma Devid jɛjɛ ya ni ihwɛ ibwɛ, ta AGWANGWAMA peni bu ụhinjanụ ti bee benengeni atwa i'ime ibwɛ ye elele a na hogogonu bu.

²Ibɛ po agwuma Devid hiɛŋ bigesere ga Natan, kwụba de ti Ngee shiyeni ya nu umwono na oo mo no osobu, Ikpɛtɛ ya Agwatana tuba shi ya nu udulo.

³Ga Natan hiɛŋ bụ, Nda gana elele na namɛ na amɛ bụ, iwɛnɛ ta AGWANGWAMA namɛ na bụ.

⁴Nazhɛ AGWANGWAMA mbishi Natan n-ndumwa gu nụ ụrụmɛ ata, bɛɛ hiɛŋ bụ,

⁵Zhaga mbiso yɛu mi ugondu ge Devid maa, AGWANGWAMA hiɛŋ, Shɛ gabụ bi zhɛ bu ma mana umwono maa Ma nama o.

⁶Taa ti Ngɛɛ bɛcinjɛ la miaụŋ mi isrɛl ni Ijipti tutu i ci hwayɛ ga, N te shiyeni shi kwukwuŋ nu umwono, semi nu udulo Ama nama na aba no ofwo elele na Omo rungo na aba.

⁷Ofwo elele na Omo dulogo na atwa Isrɛl hwɛɛ, N ta dumanɛ shɛ iwɛ ne ehiu[14] ụlamụ we elele a na Ngee peni-unu maa a ngbaraka atwa mi Isrɛl, maa Mɛ hiɛŋ aŋ, Iwembe po ehi m meni shi umwono no osobuu?

⁸Iyi nɛ ɛbi zhɛ bo mbiso yɛu mi ugondu ge Devid na, hiɛŋ bụ, Gamba AGWANGWAMA na Hwuri Kpaaŋ, N hiɛŋ, M bu bɛcinjɛ nu u'iywa wa agwụdụ, Ngaa bɛ njɛ uhiu wa atwa mi Isrɛl.

⁹Ngaa namɛ kaa na bụ no ofwo elele na ebi zhegeji hwɛɛ, Ngaa bụ lasagwụ kaa du atwa i'ime bu hwɛɛ. N tɛ zhɛ kaa Ma nda maa izeci bu i shɛ izeci i'wɛtwɛ gana nzeci ma atwa ata a'wụtụ a'wụtụ a na namɛ na cɛnjɛ tu unyizo ga.

¹⁰N zhɛ ma talaga atwa mi Isrɛl ofwo na maa a nama, ofwo ikɛnyi aba na ɛɛ zhɛ a nama maa kede a na zuga aŋ ya o, maa kede atwa abwagara na sukakana aŋ ya kwukwuŋ gana na aa nda aŋ la o.

¹¹Te kwuni taa na aka na Ngee teleji atwa mi Isrɛl a'yagajɛ, N zhɛ kaa ma bu lashaga na atwa i'ime bu elele. Shɛ inɛ ɛtɛ kiri o, Gamba AGWANGWAMA mo bu mbiso kpataa maa N zhɛ mo bu shikicingono du ihwɛ.

¹²Aka na ta aka bu ci ebu 'wi, ee bi ni ne eshi bu, N zhɛ ma tala bụtụ bu ko na amɛ miaụŋ mụ bụ me eyi maa ya tugwama. N zhɛ kaa mo shikicingono bu cɛnjɛ-ta-tugwama tu bwa.

¹³Bụtụ ata, ubwa zhɛ ma mana umwono, N zhɛ kaa du Mo shikicingo idwɛtwɛ tugwama tu bwa unyizo-nom.

¹⁴N zhɛ ma sha bishi bwa, bɛɛ zhɛ du ba sha yɛu mi. Yaa shɛ baa njɛ iwɛwɛ, N zhɛ mo vwulo bu gana na emeci o vwulo miaụŋ nu udugwu.

¹⁵Ama N zha shɛ kaa ma pashɛnga tulubo ti mi ti tikpeke no olugwo ubwa kwukwuŋ, gana na Ngee peshinji tu no olugwo Soul na Ngee unzhi nu umbe bu o.

¹⁶Ti ihwɛ bu, ta cɛnjɛ-ta-tugwama tụ bụ ti zhɛ ta bu namana unyizo-nom. Idwɛtwɛ tugwama tụ bụ zhɛ yo shikono unyizo-nom.

¹⁷Ga Natan kaa du mbishi Devid iyi elele nɛ Agwatana kepishingeni bu gana na to ozobu ata shɛ hwɛɛ.

¹⁸Nazhɛ agwuma ge Devid teni nu umwono, baa jɛjɛ na agba AGWANGWAMA, bɛɛ hiɛŋ, Oo AGWANGWAMA Mokondo, gaaba Ngaa shɛ kwo kaa umwamwa mu, harɛ maa n sugeni ijɛ hwɛɛɛ?

¹⁹Oo AGWANGWAMA Mokondo, inɛ gɛ kaa du ta shɛ waa iyi ticwɛŋ ne eshe bu, harɛ ebi te me shileni kaa waa unu iwɛ ajalalo mi na tee ci ne ekwunyi mi. Oo AGWANGWAMA na shɛ Agwatana, gana ata kaa aba nda na bụtụ aka elele, maa bụtụ kwụbɛ![15]

²⁰Oo AGWANGWAMA Mokondo, Imbe kwuuŋ Ngee te eri mɛ bi hiɛɛŋ? Bu m mwopwo Gamba yɛu bu ugondu.

²¹Bɛ njɛ ijɛ i'wɛtwɛ 'wɛtwɛ hwɛɛ iwɛ unu na ebi shiri la keeni gana na ti yaa bu kwụlanɛ, ibɛ po du abɛ njɛ maa Ma mapa Gamba ga yɛu bu ugondu.

²²Oo AGWANGWAMA Mokondo, Gabụ bi gembi, bu zasa kaa usara o. Agwatana anya kaa zasaba a na shɛ gana bụ, nu gana na atụ hwụjɛ na acɛbɛ tu ikɛnyi tu hwɛɛ o.

²³I zasa udenji na ta namba na cɛnjɛ tu unyizo ga u ta shɛ gana atwa bụ Isrɛl, anaa na ɛbi lɛshijɛ na tijama maa njɛ aŋ atwa bu o. Iyi i'wɛtwɛ keeni arụhwajɛ na abụ ndanjɛ iwɛ aba, mburusonu urishi izeci bu nu unyizo hwɛ hwɛɛ. Gabụ bu unzenji atwa bụ a na ɛbi bɛcinjɛ ni Ijipti anya edenji, tatuwa ta aba maa tuba a shɛ atwa bụ kiri.

²⁴Gabụ bi meme shikicingeni atwa bụ Isrɛl maa a shɛ atwa bụ ɛkɛnyi bu unyizo-nom. Oo AGWANGWAMA, gabụ kaa bɛ shɛ Agwatana aba.

²⁵Oo AGWANGWAMA na shɛ Agwatana, ụrɛcɛnga unu ata ebi shiri la iwɛ mi na shɛ yɛu bu ugondu keeni iwɛ ihwɛ mi unyizo-nom, nda iŋ nu gana na ta abɛ jɛmɛ la.

²⁶Nazhɛ urishi izeci bu zhɛ wa kaana ugombo unyizo-nom. Ibɛ atwa zhɛ ɛ hiɛŋ, AGWANGWAMA na Hwuri Kpaaŋ ubwa shɛ Agwatana atwa Isrɛl. Nazhɛ ɛbi zhɛ bo shikicingo ihwɛ mi Gamba yɛu bu ugondu ge Devid nu umbe bu.

²⁷Oo AGWANGWAMA na Hwuri Kpaaŋ, Gabụ bɛ shɛ Agwatana atwa Isrɛl. Gabụ bu n kopishingwonuo ijɛ kpaaŋ, Gamba yɛu bu ugondu, ɛbi hiɛŋ, Bi zhɛ bu ma ndana ihwɛ. Iwɛbɛ po Ngee inshi ohwulu Ama nda adua ga no ofwo bu.

²⁸Oo AGWANGWAMA Mokondo, Gabụ bɛ shɛ Agwatana, n-ndumwa mụ bụ kaa mɛ shɛ iwɛ-tɛkana. Gabụ kaa bi n shileni-unu iwɛ ijɛ ibiye kpaaŋ.

²⁹Ma bụ lụpa maa ibu kwụlanɛ maa peni ihwɛ yɛu gɛ bu ugondu uwebiye, iwɛ maa i na ta tuhwulo ne eshe bu tutu unyizo-nom. Oo Gabụ AGWANGWAMA na shɛ Agwatana, gabụ kaa bi shilwo la unu ga, uwebiye bu kaa zhɛ na ta tuhwulo ni ihwɛ yɛu gɛ bu ugondu tutu unyizo-nom.