Read bassa 1 SHƐGWUMA SHI HIIŊ 1 Bible Online

1 SHƐGWUMA SHI HIIŊ 1 - bassa bible

1 SHƐGWUMA SHI HIIŊ 1

¹Aka ata agwuma ge Devid injɛ ya tebiye, okwo to o urugono bu tugwuno tu mpiala, mpiala kaa mu na sha bụ waa.

²Iwɛbɛ po miaụŋ mu bwa mu ugondu mi hiɛŋ bụ, Lono maa te bi ringenje yɛu-yo-o ike nɛ te mepi shi butubwenyi maa bu na nama na bụ maa bu na bu nɛnga; maa bu no woto du na bụ maa oholobwo ubwa na bụ pa.

³Ibɛ po ee rinji ga cɛnjɛ ti Isrɛl hwɛɛ iwɛ yɛu-yo-o nɛ pilanụ, aa kwụbɛ ga Abishag yɛu ya atwa Shunem, aa shapɛ bụ pa agwuma.

⁴Bɛ shɛ yɛu towo nɛ pilanụ tebiye, ubwa namɛ na agwuma maa bu na nɛnga bụ, ama agwuma togwu su nu bwa o.

⁵Ga Adonija, na ɛɛ hiɛŋ izeci bino bwa ga Hagit, mɛmɛ ishicinjɛ, bɛɛ hiɛŋ, N zhɛ ma sha agwuma. Baa imanganjɛ ihɛŋtu ujasa, na asụcɛ idɛkwɛ[1] keeni atwa dupu maa o no hwulono bu umbe nu usumwa.

⁶Bishi bwa ge Devid te vwuri shi bu la kwukwuŋ taa ni ticwɛŋ tu bwa, harɛ maa mbiso bu okwo ụjita uko maa, Iwembe po abɛ njɛ ijɛ kwuuŋ? Ga Adonija zhɛmɛ usemberi tebiye, ubwa 'wa Absalom na tumata.

⁷Ga Adonija njɛ ushaura no Joab ata ɛɛ hiɛŋ izeci bino bwa ga Zɛruwia keeni Abiata na shɛ bunongbo, ee leni unu ubwa ee mbiyeni bu ga.

⁸Ama ga Zadok na shɛ bunongbo du, na Bɛnaya yɛu Jɛhoyada, na Natan na shɛ bigesere, ne Shimei keeni Rei keeni atwa ticinji a na shɛ atwa agwuma Devid a na 'yajɛ ukpahiŋ lacɛ maa a 'wa Adonija.

⁹Ga Adonija to ụrụpɛ na agwụdụ, ni inɛ ye eyi keeni miaụŋ mi inɛ mu na mi nyemenji nu utayɛ uko na dongonu Ɛn-rogɛl. Baa suyaganɛ miaụŋ ma agwuma Devid mụ vwɛ hwɛɛ keeni atwa Juda hwɛɛ a na shɛ ehiu atwa shihwolu nu ugondu wa agwuma.

¹⁰Ama bu suyanɛ shɛ Natan na shɛ bigesere, ti gɛ Bɛnaya, ta atwa agwuma a na 'yajɛ ukpahiŋ, ti yɛu-bino bwa go Sụlụmụn o.

¹¹Ga Natan heŋteni Bashiba na shɛ bino Sụlụmụn, bɛɛ hiɛŋ, bụ, Bu ta hwụjɛ shɛ suu maa ga Adonija yɛu Hagit shɛwa ya agwuma nu uzawa tumapa ta agwuma Devid?

¹²N zhɛ ma bụ pana ahaŋsa gana na maa jinji uraiŋ bụ keeni una yɛu bu go Sụlụmụn du.

¹³Zhaga pa agwuma Devid, hiɛŋ bụ, agwuma Zaacɛ! Bi te me shileni shi la suu unu, ɛbi hiɛŋ, Yɛu bu go Sụlụmụn ubwa zhɛ ba ya tugwama, maa ubwa zhɛ ba gɛga ni idwɛtwɛ bụ na aba bụ? Asha iwɛmbe po tuba ga Adonija shɛ ya agwumaa?

¹⁴Ga Natan hiɛŋ bụ sasana, N zhɛ me teni nu umwono pa agwuma maa ma bu sha useyida nu n-ndumwa ma ata aba duma te ebi te shikeni aba njɛ n-ndumwa na agwuma Devid.

¹⁵Ga Bashiba zhe ni igɛsɛjɛ pa agwuma, agwuma kaa injɛ tebiye na aka ata, iwɛbɛ po ga Abishag yɛu ɛtɛ Shunem ba nɛnga bụ la.

¹⁶Ga Bashiba kwuzhi baa 'walụ agwuma, agwuma hiɛŋ bụ, Imbe aba jalaa?

¹⁷Ga Bashiba jishijɛ bụ, bɛɛ hiɛŋ, Iyɛri mi, bu n teji shi la suu AGWANGWAMA na shɛ Agwatana bụ, ɛbi hiɛŋ, Go Sụlụmụn yɛu mi ubwa zhɛ ba ya hwuŋ tugwama na aba mi, maa ubwa zhɛ ba gɛga hwuŋ ni idwɛtwɛ mi?

¹⁸Ama hwuwayɛ go ga Adonija yɛwa ya tugwama nu uzawa umapa bụ, gabụ agwuma mi ihwɛ na shɛ agwuma.

¹⁹Boo towo ụrụpɛ ni inɛ ye eyi keeni miaụŋ mi inɛ mu na mi nyemenji keeni agwụdụ, baa suywanua miaụŋ-me-eyi ma agwuma hwɛɛ keeni Abiata na shɛ bunongbo keeni Joab na shɛ uberezhe we ejeshi bu, ama bu suyanɛ shɛ kaa yɛu bu ugondu go Sụlụmụn o.

²⁰Agwuma Zaacɛ! Atwa Isrɛl hwɛɛ a bụ shɛlanɛ kaa maa mbishi aŋ bụtụ na zhɛ ba ya tugwama tu ga tụ bụ na aba bụ.

²¹Yaa shɛ abụ dumanɛ shɛ iwɛ ye elele, ebu 'wi hwuŋ ɛ zhɛ ma tu nda gana ajama atubana ni yɛu mi go Sụlụmụn.

²²Gana na tu ga Bashiba ta njɛ n-ndumwa ma ata na agwuma, ga Natan na shɛ bigesere pushe.

²³Ee mbishi agwuma, ɛɛ hiɛŋ, Ga Natan bigesere ye namɛ no tupohondo. Ga Natan teni bee kwuzhi, bee ubi eshe ubwa na cɛnjɛ na agba agwuma.

²⁴Ga Natan heŋteni agwuma, bɛɛ hiɛŋ, Tumaka! Bu dumwa la suu maa ga Adonija ubwa zhɛ ba sha agwuma na aba bụ maa ubwa zhɛ ba gɛga ni idwɛtwɛ bụ?

²⁵Harɛ ga Adonija zhogwo boo towo ụrụpɛ ni inɛ ye eyi ifwugwo keeni agwụdụ hwayɛ ga. Baa suyanɛ miaụŋ mụ bụ me eyi hwɛɛ, tu go Joab na shɛ uberezhe we ejeshi[2] bu keeni Abiata na shɛ bunongbo. A namba hwuwayɛ go aa ya, aa swa nu bwa, aa ugaga, ɛɛ hiɛŋ, Adonija, Zaacɛ Tumaka Ya urugbo!

²⁶Ama bu n suyanɛ shɛ Gamba yɛu-ugondu bu, tu ga Zadok na shɛ bunongbo, ti gɛ Bɛnaya yɛu Jɛhoyada, bu suyanɛ shɛ du Sụlụmụn o.

²⁷Agwuma Zaacɛ! Gabụ hŋ bɛ njɛ ijɛ, yaa zasa kaa maa bo mbiso miaụŋ-mu-ugondu bu bụtụ na zhɛ ba gɛga ni idwɛtwɛ bụ maa ya tugwama tụ bụ?

²⁸Nazhɛ agwuma ge Devid hiɛŋ, N suyananɛ ma Bashiba. Ga Bashiba teni, bee shikeni na agba agwuma.

²⁹Agwuma shiri-unu, bɛɛ hiɛŋ, N to Agwatana na shɛ buumwa na kaa n lesheji ni i'ɛlɛ ya atwa i'ime mi hwɛɛ,

³⁰N zhɛ ma nda gana na ti Ngee bi shileni la unu ne eshe AGWANGWAMA na shɛ Agwatana atwa Isrɛl, maa yɛu bu go Sụlụmụn ubwa zhɛ ba ya tugwama ti mi na aba mi, ubwa zhɛ ba gɛga ni idwɛtwɛ ɛtɛ mi.

³¹Ga Bashiba kwuzhi bee ubi eshe ubwa na cɛnjɛ na agba agwuma, bɛɛ hiɛŋ, Gɛ Iyɛri mi gabụ agwuma Devid, yɛ urugbo tutu unyizo-nom.

³²Nazhɛ agwuma Devid hiɛŋ, N suyananɛ ma Zadok na shɛ bunongbo, na Natan na shɛ bigesere keeni Bɛnaya yɛu Jɛhoyada. Aa suyanɛ aŋ ga, aa zhajɛ pa agwuma.

³³Agwuma hiɛŋ aŋ, Zhagaga ma na miaụŋ mi mi mu ugondu maa hi peteni Sụlụmụn na aba budakwa mi bi ikɛnyi mi, maa hi zhe Gihon nu bwa.

³⁴Ga Zadok bunongbo keeni Natan bigesere dudugeni bu manɛbɛ nu uhiuhiu maa sha agwuma Isrɛl. Nazhɛ hi hwuri ukakacɛ, hi hiɛŋ, Zaacɛ Tumaka agwuma Sụlụmụn, ya urugbo te ilegeji!

³⁵Nazhɛ hi 'wa bụ maa hi gwure nu bwa maa gɛga ni idwɛtwɛ mi, maa ya tugwama ti mi. Ubwa Ngee teri maa ya tugwama ti Isrɛl keeni ma tu tu Juda.

³⁶Gɛ Bɛnaya yɛu Jɛhoyada jishijɛ agwuma, bɛɛ hiɛŋ, Ami! Ga AGWANGWAMA na shɛ Agwatana agwuma-ihwɛ mi na shɛ agwuma njɛ maa i shɛ gana ata ga.

³⁷Ga Agwatana nama no Sụlụmụn maa gombicingo idwɛtwɛ tugwama tu bwa maa i hwuri idwɛtwɛ ya agwuma-ihwɛ mi ge Devid, gana na tu baa namɛ ni Iyɛri mi ge Devid na shɛ agwuma!

³⁸Ga Zadok bunongbo, na Natan bigesere, nɛ Bɛnaya yɛu Jɛhoyada, keeni atwa na banɛ ni Kɛrɛt, ta atwa na banɛ ni Pɛlɛt zhe ee peteni ga Sụlụmụn na budakwa ba agwuma Devid, ee zhe Gihon nu bwa.

³⁹Apata ga Zadok bunongbo vwɛ ahiuaŋ na manɛbɛ mu zweni nu umwono, bee dudugeni Sụlụmụn manɛbɛ nu uhiuhiu, nazhɛ ee hwuri ukakacɛ; nazhɛ atwa ata uganɛ hwɛɛ aba, ɛɛ hiɛŋ, Zaacɛ agwuma Sụlụmụn, ya urugbo te ilegeji!

⁴⁰Ibɛ po atwa ata 'wa bụ hwɛɛ aba, oo hwulo akpasana, aa nda unyasa duwa, harɛ rundu ra aba rɛ njɛ cɛnjɛ bulama.

⁴¹Aka na tu ga Adonija keeni atwa elele na namɛ nu bwa hwụjɛ iyi nɛ ya nda hwɛɛ, na aba na te e hwuwi iyimɛyɛ ɛtɛ tụlagwụ tiya, ta aka na tu go Joab hwụjɛ ukakacɛ, bɛɛ hiɛŋ, Imbe kwuŋ shɛ ecilo rundu ru go ru namɛ nụ ụshɛpwụ gaa?

⁴²Go Jonatan yɛu Abiata bunongbo pushe tu baa ta njɛ n-ndumwa ma ata. Ga Adonija hiɛŋ bụ, Teni, M mepi maa bụtụ bu tandụ abɛ shɛ, unabarɛ uko ubiye fweye abu 'waŋnɛ caakwụ.

⁴³Go Jonatan hiɛŋ bụ, Shɛ unabarɛ ubiye kwukwuŋ, agwuma-ihwɛ tu na shɛ agwuma Devid ubwa nduwa Sụlụmụn agwuma.

⁴⁴Agwuma du kaa tumwanua Zadok bunongbo, na Natan bigesere, ti gɛ Bɛnaya yɛu Jɛhoyada, ta atwa Kɛrɛt keeni atwa Pɛlɛt, oo pwotwonuo bu na budakwa ba agwuma.

⁴⁵Ga Zadok bunongbo keeni Natan bigesere dudugwonuo bu manɛbɛ ni Gihon. Ibɛ po ee beni apata aa bwada ya unyasa, ecilo ga upo rundu rɛ shɛnjɛ nụ ụshɛpwụ ga ta, harɛ ahia hwuga rụ.

⁴⁶Go Sụlụmụn kaa jɛjɛ ba ni idwɛtwɛ tugwama tu bwa.

⁴⁷Anjɛ-ugondu agwuma zhogwonuo du agwuma, ɛɛ hiɛŋ bụ, Ga Agwatana tu njɛ maa izeci Sụlụmụn beni urishi uhwuri inɛɛ bu: gɛ idwɛtwɛ ibwɛ du gembi uhwuri inɛɛ bu. Ibɛ po agwuma to bizhiri no ogodo ubwa.

⁴⁸Nazhɛ bɛɛ hiɛŋ, Shɛtana ma AGWANGWAMA na shɛ Agwatana atwa Isrɛl, na leni maa ma kwụba ta bụtụ bu ukpogwu mu munji ni idwɛtwɛ tugwama ne eshe mi.

⁴⁹Nazhɛ inyɛsɛ shɛ agaiŋ Adonija hwɛɛ, ɛɛ ishijɛ aa garatagwụ bụtụ bụtụ to geri bwa.

⁵⁰Ga Adonija njɛ inyɛsɛ Sụlụmụn, bee gezhiji baa 'imɛ mahiuaŋ mu utukwu-ụrụpɛ.[3]

⁵¹Ee mbishi Sụlụmụn, ɛɛ hiɛŋ, Ga Adonija ba nda ba inyɛsɛ bu. Ibɛ po bee zhe baa 'imɛ ba mahiuaŋ mu utukwu-ụrụpɛ, bɛɛ hiɛŋ, Ga agwuma ga Sụlụmụn n shileni-unu maa bi zha shɛ ma n kwụna nu utokwobi Gamba yɛu-ugondu ubwa o.

⁵²Go Sụlụmụn hiɛŋ, Yaa shɛ bee meme mbiseni maa bɛ shɛ bụtụ bɛ tɛcara, asha bihiŋzhe bu bwa okwo bu ko zha shɛ ba laya na cɛnjɛ o, ama yaa shɛ oo to iyi tugworozwo ugbe no olugwo ubwa, asha bi zhɛ bo 'wo.

⁵³Ibɛ po agwuma Sụlụmụn tumwanɛ atwa, ɛɛ swɛcijɛ bụ nu utukwu ata ụrụpɛ. Baa zhajɛ bee kwuzeni agwuma Sụlụmụn. Go Sụlụmụn hiɛŋ bụ, Zhaga gwulo ni ihwɛ bu.