Read bassa 1 SHƐGWUMA SHI HIIŊ 15 Bible Online

1 SHƐGWUMA SHI HIIŊ 15 - bassa bible

1 SHƐGWUMA SHI HIIŊ 15

¹Ti gɛ Jɛroboam yɛu Nebat yɛ tugwama ti Isrɛl, yaa namɛ shiywa umpwa-na-shɛba-shɛ-tụndatụ, nazhɛ ga Abijam yɛ du tugwama tu Juda.

²Ga Abijam ata yɛ tugwama nu Jɛrusalɛm shiywa shɛ tatụ. Ɛ hiɛŋ izeci bino bwa ge Meaka yɛu Abishalom Uhwaŋna unya na aa 'nyata ta Absalom ta. (Kwụba du na buwala bu 10).

³Bɛ njɛ iwɛwɛ gana na bishi bwa ndanjɛ la hwɛɛ. Ahaŋsa ubwa patanɛ shɛ AGWANGWAMA rishe hwɛ hwɛɛ gana ugwunukwoshi ubwa ge Devid o.

⁴Ama iwɛ ụjɛrụma Devid, ibɛ po AGWANGWAMA na shɛ Agwatana ubwa peni bu yɛu-ye-eyi maa ya tugwama tu bwa, ti bee 'wi nu Jɛrusalɛm keeni maa ala untangana Jɛrusalɛm lapiya.

⁵Ge Devid njɛ la iyi nɛ teneni AGWANGWAMA cɛŋ na tunama tu bwa, bu lacɛ shɛ unu we elele na AGWANGWAMA peni bu o, semi iyi nɛ baa njɛ la Uria Bihit ata kiri.

⁶Ujasa na namanɛ la ata Rehoboam abana Jɛroboam to tuhwulo tutu tu'wo ta Abijam.

⁷Iyi elele nɛ ta vwɛ ni iyi nɛ ga Abijam ndanjɛ hwɛɛ, e 'nyeci shi iŋ suu nu utakada Shɛrụkwụkwụ shɛ shɛgwuma shi Juda? Ujasa namanɛ atwa umwamwa Abijam na atwa umwamwa Jɛroboam.

⁸Ga Abijam 'wi gana eshi ubwa, ee ni bu nụ ụshɛpwụ ata wa agwuma Devid. Nazhɛ yɛu ibwɛ ga Asa yɛ tugwama no ohwolu ubwa.

⁹Ti ge Jɛroboam yɛ tugwama ti Isrɛl, yaa namɛ shiywa woshi, nazhɛ ga Asa yɛ tugwama tu Juda.

¹⁰Bɛ yɛ tugwama nu Jɛrusalɛm shiywa buhanda-nu-boo-ko. Ɛ hiɛŋ izeci bino bwa ge Meaka yɛu Abishalom.

¹¹Ga Asa njɛ iyi nɛ teneni AGWANGWAMA cɛŋ gana ugwunukwoshi ubwa ge Devid.

¹²Bee unzhi awale ata eyi aa tụpa utashɛ, ta a na o o a na ga namɛ na cɛnjɛ ta ata nu nsumo ma ata aa ga zhɛba tuwa ta aba. Bee mushenji du tuwa ta ata bishi bwa go mo la hwɛɛ.

¹³Bee becinji ukaka ubwa ge Meaka maa kede sha ya e'uji agwuma o. Iwɛnɛ po ukaka ata ubwa mo tuwa ta ata tu tupwaŋ, ɛɛ hiɛŋ Ashɛra. Ga Asa bwereteji tuwa ta ata, bee hwoŋzhinji tu nu Ulomu Kidron.

¹⁴Ama bu hwuŋzhi shi otukwu-ụrụpɛ ata ee mengeni nu nshama o. Ama okwo ti yaa shɛ gana ata, ahaŋsa Asa kaa namɛ no ofwo AGWANGWAMA hwɛɛ uuwa i ci tu'wo tu bwa.

¹⁵Bee suji azhɛnarɛya keeni azụrụfa keeni iyi-uhwugwa inyɛ swoswoswo nɛ bishi bwa, tu bwa ni ikɛnyi ibwɛ, shileni la AGWANGWAMA unu maa bi zhɛ ba pana bụ, bee zweni iŋ ga nu Umwono ata wa AGWANGWAMA.

¹⁶Aka elele ujasa wa namana Asa na shɛ agwuma Juda ne Beasha na shɛ agwuma Isrɛl.

¹⁷Ge Beasha agwuma Isrɛl tefuleji atwa Juda nu ujasa, bee zhe boo mo Rama maa kede bụtụ bu Juda be elele teni kwo kaa banɛ ya no tugwungwu tu Asa agwuma Juda kwukwuŋ.

¹⁸Nazhɛ ga Asa agwuma Juda suji azhɛnarɛya keeni azụrụfa elele na ga ta vwɛ nu umwono uduciya ata namɛ nu Umwono wa Agwatana keeni a na umwono wa agwuma, bee utegeni yɛu ibwɛ ugondu ike. Nazhɛ agwuma ata ga Asa suji aŋ bee peni Bɛn-hadad agwuma Siria yɛu Tabrimon na shɛ bụjalụ Hɛzion na namɛ nu Damaskos, bɛɛ hiɛŋ bụ,

¹⁹Mizha tu twa-unu na bụ, gana na eshi tu twa la unu. M bi peni azhɛnarɛya na azụrụfa ga upwaŋ, zhaga bwada unu bu tutwa na agwuma Isrɛl ge Beasha iwɛ maa bacɛnga ejeshi ubwa na cɛnjɛ ti mi.

²⁰Gɛ Bɛn-hadad leni iwɛ nɛ agwuma Juda ga Asa hiɛŋ bụ. Baa tumwanɛ ga eberezhe ejeshi ubwa maa e tefuleji ashɛpwụ Isrɛl. Ee leshiji Ijon, nu Dan, nu Abɛl-bɛt-meaka keeni cɛnjɛ ti Kinɛrot hwɛɛ ta cɛnjɛ tu Naftali.

²¹Aka na ti ge Beasha agwuma Isrɛl hwụjɛ iwɛ ɛtɛ, bee genji ya Rama tuma, boo kwu ya ni Tiza.

²²Nazhɛ agwuma Juda ga Asa enenji nu Juda hwɛɛ, bɛɛ hiɛŋ, 'Wananjɛ ma atayɛ keeni i'wɛ'wɛ ɛtɛ ge Beasha ga kapa yebe ụshɛpwụ ata Rama, bɛɛ hiɛŋ, kede bụtụ be elele vwɛ o. I'wɛŋnɛ ɛtɛ ibɛ ga Asa suji ya boo mo ụshɛpwụ ata ɛɛ hiɛŋ Giba na cɛnjɛ ti Bɛnjamin keeni ụshɛpwụ ata ɛɛ hiɛŋ Mizpa.

²³Iyi inyɛ elele nɛ ga Asa ndanjɛ keeni ukpahiŋ ubwa keeni ashɛpwụ na bee mengeni hwɛɛ, i 'nyeci shi suu nu utakada Shɛrụkwụkwụ shɛ shɛgwuma shi Juda. Ama ụngwụ uko 'imɛ bụ nɛ ɛvwɛvwɛjɛ na aka ti'inga tu bwa.

²⁴Ga Asa 'wi gana eshi ubwa, ee ni bu nụ ụshɛpwụ wa agwuma Devid, nazhɛ yɛu ibwɛ ge Jehoshafat yɛ tugwama no ohwolu ubwa.

²⁵Tu ga Asa yɛ tugwama nu Juda, yaa namɛ shiywa shi yebi, nazhɛ ga Nadab yɛu Jɛroboam yɛ tugwama ni Isrɛl, shiywa shi yebi.

²⁶Bɛ njɛ AGWANGWAMA iwɛwɛ gana na te bishi bwa njɛ la du. Baa njɛ maa ga atwa Isrɛl njɛ du iwɛwɛ.

²⁷Ge Beasha yɛu Ahija bụtụ bụ ụlamụ Isaka sukakanɛ bụ. Ge Beasha kwụnɛ bụ ni Gibɛton na shɛ ụshɛpwụ wa Afilistia na aka na ti ga Nadab keeni atwa Isrɛl hwɛɛ hweri Gibɛton.

²⁸Tu ga Asa yɛ tugwama tu Juda, yaa namɛ shiywa shɛ tatụ, nazhɛ ge Beasha kwụnɛ Nadab, ibɛ po ge Beasha tuba yɛ tugwama no ohwolu ubwa.

²⁹Gunu na tu baa yɛ tugwama ta ata hwɛɛ, baa kwụnɛ atwa ihwɛ Jɛroboam hwɛɛ. Bu weŋpeni shi okwo bụtụ be elele ni ihwɛ Jɛroboam kwukwuŋ, nu gana na ta AGWANGWAMA dumwa la nu unu bigesere na shɛ ga Ahija bụtụ ata bi Shilon.

³⁰Iwɛ iwɛwɛ nɛ gɛ Jɛroboam njɛ keeni iwɛ inɛɛ nɛ bee zeriji atwa Isrɛl tɛnda du, ti iwɛ amɛ na bee heshigeni AGWANGWAMA na shɛ Agwatana Isrɛl, ibɛ po ijɛ kpaaŋ jiteni aŋ.

³¹Iyi nɛ ta vwɛ, ni iyi elele nɛ ga Nadab ndanjɛ hwɛɛ, i 'nyeci shi suu nu utakada Shɛrụkwụkwụ shɛ shɛgwuma shi Isrɛl?

³²Ujasa wa bilana la ata Asa na shɛ agwuma Juda abana Beasha na shɛ agwuma Isrɛl aka elele tutu tu'wo ta aba.

³³Tu ga Asa yɛ tugwama tu Juda, yaa namɛ shiywa shɛ tatụ, nazhɛ ge Beasha yɛu Ahija yɛ tugwama ti Isrɛl keeni ma tu tu Tiza. Bɛ yɛ tugwama ta ata shiywa woshi-na-shɛba-shi-neshi.

³⁴Bɛ njɛ du AGWANGWAMA iwɛwɛ gana Jɛroboam, bee zeriji du miaụŋ mi Isrɛl ni iwɛwɛ tɛnda.