Read bassa 1 SHƐGWUMA SHI HIIŊ 3 Bible Online

1 SHƐGWUMA SHI HIIŊ 3 - bassa bible

1 SHƐGWUMA SHI HIIŊ 3

¹Go Sụlụmụn ndanɛ Faro agwuma Ijipti iyi cɛnɛ, ibɛ po bee zeni yɛu Faro. Bee shiri bu tugwo nu ụshɛpwụ ata Devid, iwɛ maa hwuwo umwono ubwa, tu Umwono wa AGWANGWAMA keeni uba na rungwutwonu Jɛrusalɛm tuma hwɛɛ.

²Atwa ta ta la tugwo arụpɛ ne tikpekwu, iwɛnɛ te e te me shi la Umwono wa AGWANGWAMA.

³Go Sụlụmụn lubi AGWANGWAMA, baa 'wa kaa gana na bishi bwa ge Devid peni bu la unu, ama tuba ba ta arụpɛ, boo hwoŋzhingo iturɛre ne tikpekwu.

⁴Ta aka oko ci, agwuma zhe Gibion maa ta ụrụpɛ apata, iwɛnɛ ti yaa shɛ maa apata bikpekwu na zeci uhwuri ma tụ tụ vwɛ hwɛɛ namɛ, iwɛnɛ baa shana baa ta arụpɛ tuhwoŋzhingo akpakwụ akpakwụ nu utukwu-ụrụpɛ ata.

⁵Ni Gibion ata, ibɛ AGWANGWAMA bananɛ bụ caakwụ nụ ụwalabụ, tu boo woto malabụ nụ ụjita. Bɛɛ hiɛŋ bụ, N lụpɛ iyi nɛ aba jala maa Ma bụ pana.

⁶Go Sụlụmụn jishijɛ bụ, bɛɛ hiɛŋ, Bu lubi la yɛu-ugondu bu ge Devid na shɛ bishi mi tebiye, iwɛnɛ ti bee zhe la tahaŋnụ nu umbe bu na tɛcara, baa shɛ kaa bụtụ bi tiririri, ahaŋsa ubwa kaa du namɛ oko na bụ. Ebu lubi bu kaa du tebiye, ibɛ po ebi peni bu yɛu maa gɛga ni idwɛtwɛ tugwama tu bwa hwayɛ ga.

⁷Oo AGWANGWAMA na shɛ Agwatana mi, Gabụ bɛ njɛ maa ga tugwama te bishi mi ge Devid ti n temi okwo tu Ngaa ta shɛ yɛu nɛ ta gwumwa. Ngee te mepi shi gana na maa mu no dulo ni iyi tɛnda te teni cɛŋ.

⁸Gamba yɛu gɛ bu ugondu na kaa n namɛ na ashashɛ atwa na ebi teri, e gembi kaa ufwugwo ee hwuleji tɛrɛta.

⁹Iwɛ ecilo ata m peni kaa ti'inta maa Mo eshicigo gana na maa ma ala atwa ga bụ tu'untangana, maa du ma mapa ta a manganga tuswoswoswo ti iyi ibiye ni iyi iwɛ. Gaaba kwuŋ eri ba untangana atwa ga bụ i ci gana ga ufwugwoo?

¹⁰Amɛ Agwangwama lemi iwɛnɛ go Sụlụmụn lụpɛ bụ ijɛ.

¹¹Ibɛ po Agwatana hiɛŋ bụ, Iwɛnɛ ti yaa shɛ inɛ gɛ abụ lụpɛ, abụ lụpɛ shɛ urugbo tiya, kwo kaa maa shɛ bɛzhɛgba kwo kaa maa atwa i'ime bu 'wi, ama bụ lụpɛ gana na maa no eshicigo tuswoswoswo ti iyi nɛ teni cɛŋ.

¹²N zhɛ ma bụ pana iyi nɛ abụ lụpɛ. N zhɛ ma bụ pana ti'inta keeni iyi ti'eshicigo. I ta zasa bụtụ na namwawaŋ la na intwa, kwo kaa bụtụ na tɛ zhɛ ba nama na tɛ zhɛ ba inta gana bụ kwukwuŋ.

¹³N zhɛ kaa du ma bụ pana ti iyi nɛ abụ n lụpɛ shɛ; ibɛ shɛ tɛzhɛgba keeni ụjɛrụma. I zha shɛ ya 'yaga ya agwuma na tɛ zhɛ a sha gana bụ kwukwuŋ uuwa bu to 'wo.

¹⁴Yaa shɛ aba hwuga-unu shikpogo shi mi, abu untanganɛ kaa andwa mi keeni onu-tupana mi gana bishi bu ge Devid, nazhɛ Ngɛɛ zhɛ ma kaana uraiŋ bụ ụnjɛswa.

¹⁵Go Sụlụmụn zhinjɛ malabụ, yaa shɛ ụwalabụ boo wotogono. Bee gwuri nu Jɛrusalɛm, bee shikeni nu umbe Ikpɛtɛ ɛtɛ Unu-tutwa ya AGWANGWAMA, boo to apata ụrụpɛ tuhwoŋzhingo keeni arụpɛ amɛ-olom.[6] Nazhɛ baa yɛ iyimɛyɛ unyasa na anjɛ-ugondu ubwa hwɛɛ.

¹⁶Jitoo ko awɛle oko eyebi zhajɛ ee shikekeni na agba agwuma go Sụlụmụn.

¹⁷Bu na bu ko hiɛŋ, Iyɛri mi, umwono uko etu zweni ne biyikwo ga, baa namba du kaa ti Ngee meci yɛu mi ye eyi ni ihwɛ ɛtɛ.

¹⁸Yaa namɛ Jitɛ itɛtu, ibɛ bee meci du yɛu ibwɛ ye eyi. Eteyebi kaa kiri tu zweni nu umwono ata, i zasa binya bụtụ iti keeni ya o.

¹⁹Ibɛ biyikwo ga leyiteni yɛu ibwɛ tu boo woto malabụ nụ ụjita, ibɛ po yɛu ibwɛ 'wi.

²⁰Baa zhajɛ nụ ụjita tudwonu to Omo woto malabụ, bee shepi yɛu mi, bee shiri na agba ubwa, bee n shileni tuba ru'wo ri inɛ ibwɛ na agba mi.

²¹Aka na ti iyi heri, Ngɛɛ zhinjɛ maa Ma pana yɛu mi iyimɛyɛ nu uvwungwa go, tobwolo yɛu uwo! Ngee yeleji iŋ tebiye, Ngaa kwụbɛ maa shɛ yɛu mi Ngee meci na o.

²²Ama biyikwo ata bi yebi hiɛŋ, Awo! Inee mi nɛ ta hwungwa; ama inɛɛ bu tɛ i 'wi. Biyikwo ebe bi hiiŋ lacɛ, bɛɛ hiɛŋ, Awo! Inee mi tɛ ta hwungwa, inɛɛ bu nɛ i 'wi. Gana aa nda ashamanjɛ na agba agwuma ta.

²³Nazhɛ agwuma hiɛŋ, Bụtụ ata gɛ hiɛŋ, Yɛu mi nɛ ya hwungwa, ama inɛ ɛtɛ ibɛ shɛ inɛ bụtụ ye, bụtụ ye du hiɛŋ, Inee mi ye ta hwungwa, inɛ ibwɛ nɛ i 'wi.

²⁴Nazhɛ agwuma hiɛŋ, M panɛ ma utokwobi. Aa panɛ ga agwuma utokwobi.

²⁵Agwuma hiɛŋ, Jaja ma yɛu ɛtɛ ya hwungwa na ashashɛ, maa bụtụ bụtụ ba shapa ashashɛ geri bwa.

²⁶Ama bino bi yɛu ɛtɛ ta hwungwa hiɛŋ agwuma, Pana bu ma yɛu ɛtɛ ta hwungwa, ta kwụna iŋ ma o! Iwɛnɛ tu boo lubo yɛu ɛtɛ ibwɛ tebiye. Ama biyikwo ata bi yebi hiɛŋ, Jaja iŋ ma na ashashɛ, tu gabụ, tu Gamba, za bụtụ yɛɛ zhɛ ya sha inɛ ibwɛ o!

²⁷Nazhɛ agwuma jeji ụshɛrɛya ata, bɛɛ hiɛŋ, Pana ma biyikwo ata bi hiiŋ yɛu ɛtɛ ta hwungwa, ta kwụna iŋ ma o! Ubwa shɛ bino bi ibɛ gom.

²⁸Aka na ta atwa Isrɛl hwɛɛ hwụjɛ gana na agwuma jeji ụshɛrɛya ata, aa mụnɛ bụ ụjɛrụma, iwɛnɛ ta a kwụbɛ caakwụ maa Agwatana ubwa peni bu ti'inta ta ata maa bu na jaja ụshɛrɛya ne tiririri.