Read bassa 1 SHƐGWUMA SHI HIIŊ 4 Bible Online

1 SHƐGWUMA SHI HIIŊ 4 - bassa bible

1 SHƐGWUMA SHI HIIŊ 4

¹Go Sụlụmụn ubwa shɛ agwuma atwa Isrɛl hwɛɛ.

²Atwa na baa njɛ ehiu anjɛ-ugondu ubwa na: Ga Azaria yɛu Zadok, ubwa shɛ bunongbo;

³gɛ Ɛlihorɛf keeni Ahija miaụŋ mi Shisha, aba shɛ e'nyeci nu umwono ụshɛrɛya; gɛ Jɛhoshafat yɛu Ahilud, ubwa shɛ bi'nyeci bi iyi elele nɛ ya ndangana;

⁴gɛ Bɛnaya yɛu Jɛhoyada, ubwa shɛ uberezhe we ejeshi, ga Zadok keeni Abiata, aba shɛ onongbo.

⁵Ga Azaria yɛu Natan, ubwa shɛ uhiu we egwomina, ga Zabud yɛu Natan, ubwa shɛ bunongbo keeni bipeni ba agwuma ahaŋsa bi ticinji.

⁶Ga Ahisha, ubwa shɛ iyɛri ya atwa na a nda ugondu nu ukpogwu wa agwuma; ga Adoniram yɛu Abda, ubwa shɛ iyɛri ya atwa na a nda ugondu ukpahiŋ.

⁷Go Sụlụmụn teri egwomina umpwa-na-ba-eyebi a na boo dwotwogonu aŋ maa a untangana cɛnjɛ cɛnjɛ umpwa-na-tuba-ti-yebi, aba du zhɛ na palaganɛ shɛgwuma keeni atwa ihwɛ ibwɛ iyimɛyɛ. Upiana uko ụ shɛ una bụtụ bu ko na amɛ uywa mudu.

⁸Nzeci ma atwa ata umpwa-na-ba-eyebi a na untanganɛ cɛnjɛ cɛnjɛ na: gɛ Bɛn-hu ubwa shɛ ugwomina cɛnjɛ ti Ifrem tu na tu patanɛ ni ishɛmɛ.

⁹Gɛ Bɛn-dɛkɛ, ubwa shɛ ugwomina nu Makaz, nu Shalbim, ni Bɛt-shɛmɛsh keeni Ɛlonibɛt-hanan.

¹⁰Gɛ Bɛn-hisɛd, ubwa shɛ ugwomina cɛnjɛ tu Arubot, nu Soko keeni cɛnjɛ ti Hɛfa hwɛɛ.

¹¹Gɛ Bɛn-abinadab, ubwa shɛ ugwomina Do ata patanɛ na azuba. Ubwa du zeni Tafat yɛu Sụlụmụn.

¹²Ga Bana yɛu Ahilud, ubwa shɛ ugwomina Tajak, ti Migido keeni Bɛt-shian, tu ụpadụ na namɛ geri bu Zaretan tuzuba tu Jɛzrɛl hwɛɛ, te kwuni ni Bɛt-shian tutu i ci Abɛl-mɛhola, tutu i ci ụpadụ uyebi Jokimiam.

¹³Gɛ Bɛn-gɛbɛ, ubwa shɛ ugwomina Ramot na namɛ ni Giliad, tutu ụshɛpwụ Jai yɛu Manasɛ ata namɛ ni Giliad keeni cɛnjɛ tu Agob ta ata tu namɛ nu Bashan. Bi 'yajɛ ashɛpwụ a'wụtụ a'wụtụ dupu-ne-eshe-umpwa, anaa na oo rungwutwonu nu uba. Nɛ ɛtumburɛ aa njɛ akpa aba.

¹⁴Ga Ahinadab yɛu Ido, Ubwa shɛ ugwomina Mahanaim.

¹⁵Ga Ahimaz, ubwa shɛ ugwomina Naftali. Ubwa du zeni Basemata yɛu Sụlụmụn.

¹⁶Ge Beana yɛu Hushai, ubwa shɛ ugwomina Ashɛ keeni ashɛpwụ Bialot.

¹⁷Gɛ Jɛhoshafat yɛu Parua, ubwa shɛ ugwomina ni Isaka.

¹⁸Ge Shimei yɛu Ɛla, ubwa shɛ ugwomina ni Bɛnjamin.

¹⁹Ge Gebɛ yɛu Uri, ubwa shɛ ugwomina cɛnjɛ ti Giliad, apata la ge Sihon shɛ agwuma A'amon keeni agwuma Og bụtụ ata bu Bashan. Bụtụ bu ko namba na shɛ uhiu wa atwa ga umpwa-na-ba-eyebi hwɛɛ na cɛnjɛ tu Juda.

²⁰Ufwugwo wa atwa Juda keeni atwa Isrɛl ụ shɛ gana ahwayɛ itekwu. A ya, aa swa, aa namɛ na amɛ-olom.

²¹Cɛnjɛ-ta-tugwama tu Sụlụmụn ti imɛ edenji elele na namɛ te kwune nu Urefu Yufretis uuwa i ci cɛnjɛ ta Afilistia tutu tugwungwu ta atwa Ijipti. Ubwa aa tụpa ụdalụ, baa untanganɛ aŋ tutu tu'wo tu bwa.

²²Iyi-heri elele aa panɛ aŋ inɛmɛ nɛ shini nkwuronu dipi-yebi-nu-talacɛ, (130) no ohiu nkwuronu kpakwụ-nu-dupu-ne-eshe-umpwa-na-ba-eyebi (262).

²³Inɛ ibwɛ nɛ aa biga ni ihwɛ, nɛ nyemenji namɛ umpwa, inɛɛ nɛ aa 'waŋna aa bana urungo na ambɛ namɛ woshi, keeni agwụdụ dipi-yebi (100). Inɛ ɛtɛ namɛ swooŋ na shɛnabara, ni ilibɛ, na shɛkazaruba, na shayụgwụ keeni iyi inyɛ gɛnɛ ɛtɛ.

²⁴Iwɛnɛ po ubwa untanganɛ cɛnjɛ ta ata tu namɛ nu uwaŋna-banụ Urefu Yufretis, te kwune ni Tifsa uuwa i ci Gaza. Baa 'yajɛ kaa amɛ-olom na atwa na rungwutwonu bu geri ata hwɛɛ.

²⁵Aka na go Sụlụmụn yɛ tugwama, atwa Juda keeni atwa Isrɛl, te kwune nu Dan tutu i ci Bɛ-shiba a zasa inyɛsɛ ye elele o. Bụtụ bụtụ 'yajɛ ehilo ubwa afwafwa, keeni a na owowo.

²⁶Go Sụlụmụn mo nsumo igbɛɛ-woshi (40,000) iwɛ idɛkwɛ ibwɛ nɛ yo kokwulo ihɛŋtu ibwɛ ujasa keeni shimwono sha asụcɛ idɛkwɛ ɛtɛ igbɛɛ-icihiŋ (12,000).

²⁷Atwa na baa njɛ egwomina cɛnjɛ tu bwa, aba a 'waŋnanɛ bụ iyimɛyɛ ibwɛ, ti inɛ ya atwa elele na a ya iyimɛyɛ na agwuma hwɛɛ. Bụtụ bụtụ 'yajɛ upiana ubwa na baa 'waŋnɛ inɛ ibwɛ. A panɛ aŋ iyi elele, i zasa iyi elele nɛ 'nyananɛ aŋ o.

²⁸Egwomina ata aba du a 'waŋnɛ ushikapa keeni arɛya no ofwo elele na aa jala maa idɛkwɛ ɛtɛ ujasa na ya keeni iwɛ idɛkwɛ inyɛ du.

²⁹Agwatana kaa peni Sụlụmụn ti'inta keeni iyi ti'eshicigo i'wɛtwɛ, ti iyi-tumapa nɛ hwuleji tụdụma.

³⁰Ti'inta tu Sụlụmụn tu hwuri ti'inta ta atwa geri bu uwaŋna-banụ keeni atwa Ijipti hwɛɛ.

³¹Bɛ incɛ bee hwuri bụtụ be elele, ti ge Etan bụtụ ata bi Ezra, ti ge Heman, tu ga Kalkol hwɛɛ, tu ga Dada a na shɛ miaụŋ mu Mahol. Ibɛ po urishi ubwa mburusonu na ashashɛ edenji elele na rungwutwonu bu.

³²Bi sheji eshi ugbaa-na-akpakwụ-a-ta (3,000), baa njɛ shɛzunga kpakwụ-na-shɛba-shɛ-ta (205).

³³Baa jɛmɛ iwɛ i'wɛ'wɛ yo osobu nɛ namɛ ni Lebanon, to tu'unto tu na tɛ unshɛ nụ ụdatụ hwɛɛ. Baa jɛmɛ du iwɛ isundɛ ehilo, ta shanụnụ, ti iyi nɛ yo hombilo hwɛɛ, ti ijɛnɛ nɛ zweni ne meni.

³⁴Shɛgwuma shi unyizo ga hwɛɛ shɛ hwụjɛ unabarɛ Sụlụumụn, ibɛ po aa tumwanganɛ atwa aba iwɛ maa a hwụjɛ iwɛ ti'inta tu bwa.