Read bassa 1 SHƐGWUMA SHI HIIŊ 7 Bible Online

1 SHƐGWUMA SHI HIIŊ 7 - bassa bible

1 SHƐGWUMA SHI HIIŊ 7

¹Go Sụlụmụn mo umwono ubwa, shiywa umpwa-na-shɛba-shɛ-tatụ nazhɛ bee hwuwi uŋ tuma hwɛɛ.

²Ɛ hiɛŋ izeci umwono ata wa amɛ uko maa, Uwapa Lebanon, ụnjɛswa ubwa ụ shɛ avwuna kpakwụ, (200) uholo ubwa ụ shɛ avwuna dipi-yebi, (100) nazhɛ uzoto ubwa ụ shɛ imbele i'ɛlɛ talacɛ (30). Baa shɛrɛ atukpa ezhibi osobu shɛwala shi neshi, bee petengeni abatanɛ osobu tusata tu tatụ. Ikete ubwa du shɛ ogbogolo osobu.

³Ufwugwo ibɛ shɛ buhanda-ni-bɛ-tɛ (45). Buwala be elele 'yajɛ atukpa umpwa-na-ba a-ta (15). Ni i'wɛ'wɛ yo osobu oo to ukogo ubwa gana ikete.

⁴Apadụ adatụ umwono ata eyebi 'yajɛ agbahwụ na shamanɛ iwɛlɛ itɛtu, oo momo pononu eshe.

⁵Shidubo shɛ bwa, ta agbahwụ ubwa hwɛɛ 'yagajɛ ogongo eneshi. Agbahwụ adatụ upada ye namɛ shiriri na a na upada uyebi.

⁶Umwono unya uko namba na oo mo na atukpa. ụnjɛswa ubwa ụ shɛ avwuna dipi-yebi (100), uholo ubwa ụ shɛ avwuna dupu-ne-eshe-umpwa (60). U 'yajɛ angba na atukpa untanganɛ ukogo wa aba.

⁷Bu mo du umwono iwɛ idwɛtwɛ ibwɛ, nu bwa baa duma ụshɛrɛya. Ɛ hiɛŋ izeci ubwa, Umwono ụshɛrɛya. Bee sweni uŋ ogbogolo osobu te kwune na cɛnjɛ tutu i ci ikete ubwa.

⁸Umwono na bɛɛ zhɛ na nama ụ shɛ gana ata uko uko na ma shɛ shɛ vwɛ, u namɛ na aba umwono ata ụshɛrɛya. Bu meni du yɛu Faro na shɛ biyikwo bwa umwono gana ata uko uko.

⁹Na atayɛ na zhɛmanjɛ tebiye oo mo shimwono sha ata, tu ukpogwu ata ụ'wụtụ, te kwuni nu ukoshilo ubwa uuwa i ci ihiŋhiŋ. E shebi aŋ na ashɛmbɛrɛ bishebi, aa lụbɛ aŋ, ta amɛ ta aba.

¹⁰Na atayɛ na gembenji a na zhɛmanjɛ du aba ee shiri ukoshilo umwono ata. Ụnjɛswa wo ono oko a shɛ avwuna woshi (20) onoo oko shɛ avwuna umpwa-na-ba-ecihiŋ (16).

¹¹E petengeni atayɛ ebiye a na ee shebi te teni cɛŋ keeni ezhibi osobu na azuba ubwa.

¹²E seci ukpogwu ata ụ'wụtụ tusata tụ tatụ na atayɛ ata ee shebi, tusata tu ko tɛ shɛ ne ezhibi osobu. Gana ata du aa njɛ nu umwono ata wa agwuma keeni umwono ata wa amɛ keeni odubo umwono ata wa AGWANGWAMA.

¹³Agwuma Sụlụmụn tumwanɛ atumwa maa a suyananɛ bụ bụtụ ata bu Taya ɛɛ hiɛŋ ge Hiram.[8]

¹⁴Ge Hiram ata shɛ yɛu bululo bu ko na shɛ ụlamụ Naftali. Bishi bwa shɛ bụtụ bu Taya. Ge Hiram ba nda ugondu nɛ ɛtumburɛ, bɛ shɛ bugwoni nu ugondu wɛ ɛtumburɛ tɛnda, bɛ incɛ, ahaŋsa kaa du ci bu nu ugondu ata wɛ ɛtumburɛ. Baa shaananɛ bugwoni ni iyi tuswoswoswo tɛndangana nɛ ɛtumburɛ. Ge Hiram zhajɛ ụhiɛŋshɛ wa agwuma Sụlụmụn, baa njɛ ugondu we elele na agwuma eni bu hwɛɛ.

¹⁵Ge Hiram njɛ atukpa ɛtumburɛ eyebi no odubo umwono ata wa Agwatana. Uzoto wa aba ụ shɛ imbele i'ɛlɛ umpwa-ni-bɛ-tindɛtu, (18) unyomo wa aba ụ shɛ ụnjɛswa uhwohwo wa avwuna eneshi (4) na eri wo rungwutwonu aŋ.

¹⁶Baa ndanɛ atukpa ata ɛtumburɛ okwukwusu nkwodo, bee peteni ni ihiŋhiŋ aba hwɛɛ. Uzoto ukwukwusu ata uko ụ shɛ imbele i'ɛlɛ itɛ. Gobwonu du uholo ubwa ụ shɛ, imbele i'ɛlɛ itɛ.

¹⁷Boo to shɛgba nu ukogo ata bee peteni na atukpa ata, una una 'yajɛ shɛgba shɛ bwa shi cenje.

¹⁸Gobwonu du baa njɛ atukpa iwɛlɛ iyebi boo rungwutwonu tuhwolu ta ata, maa urugono ukwukwusu ata patanɛ na azuba apomɛgranati. Gobwonu du baa ndaananɛ iwɛ ukwukwusu ata uyebi.

¹⁹Okwukwusu ata baa njɛ bee peteni na azuba atukpa ata sụbɛ modwodwo mo odurungwu. Uzoto wa aba ụ shɛ imbele i'ɛlɛ ineshi.

²⁰E peteni okwukwusu ata na atukpa ata, keeni na azuba okwukwusu ata namɛ na bụ'aŋbụ bo tuhwolu ta ata tutu rungwutwonu. Apomɛgranati rungwutwonu ogongo ata, una una shɛ tusata ti yebi, una una kaa namɛ kpakwụ (200).

²¹Bee shikecenji atukpa ata ɛtumburɛ no odubo umwono ata wa Agwatana. Boo po a na ata shikeni tuta izeci maa, Jakin. Boo po a na ata shikeni tuzuba izeci maa, Boaz.

²²Baa njɛ okwukwusu tusumbo tu na tụ sụbɛ modwodwo mo odurungwu, bee peteni ni ihiŋhiŋ atukpa ata. Gana baa kwunanjɛ ugondu wa atukpa ata ta.

²³Nazhɛ baa njɛ okwokwo nɛ ɛtumburɛ, me'ilwo ma aba mɛ shɛ imbele i'ɛlɛ umpwa, uholo unu wa aba ụ shɛ imbele i'ɛlɛ itɛ, ụnjɛswa uhwohwo na rungwutwonu acɛbɛ aba ụ shɛ imbele i'ɛlɛ talacɛ.

²⁴E ndepengeni shikoko shɛ ɛtumburɛ tuta ti izhɛmi yo okwokwo ata, shɛ shɛ iwɛlɛ iyebi, shɛ swanɛ no okwokwo ata mɛrɛ, shɛ shɛ imbele i'ɛlɛ umpwa. Bee ndepengeni aŋ te teni cɛŋ no ohwolu elele.

²⁵E peteni okwokwo ata na aba inɛ umpwa-ni-bɛyebi, nɛ oo mo nɛ ɛtumburɛ. Etwenyi inɛ ɛtɛ twatwagwụ na anya. Inɛ ɛtɛ itɛtu ngbaracɛ tuzuba, itɛtu ngbaracɛ uwaŋna-twonuo, itɛtu ngbaracɛ tuta, nazhɛ itɛtu ngbaracɛ uwaŋna-banụ yoo momo pononu uvwi hwɛɛ ibɛ, nazhɛ okwokwo ata patanɛ ya na ashashɛ aba.

²⁶Me'inswo mo okwokwo ata mu hwuri me'inswo mo okwokwo elele i ci kpalụ tatụ. Acɛbɛ aba sụbɛ unu Ukwopi, a shɛ ụsụbwa tụbwadụ to modwodwo mo odurungwu. Okwokwo ata a ya meni mu nhilwo ugbaa-uko (2,000).

²⁷Baa njɛ du ihɛŋtu i tukokwulo umpwa nɛ ɛtumburɛ, ụnjɛswa ibɛ ụ shɛ imbele i'ɛlɛ ineshi, uholo ibɛ ụ shɛ imbele i'ɛlɛ ineshi, uzoto ibɛ ụ shɛ imbele i'ɛlɛ itɛtu.

²⁸Gana aa njɛ akatakpa aba na: a 'yajɛ, n'nlo, n'nlo ma aba mu patanɛ na shɛkpada sha aba.

²⁹Baa njɛ ụsụbwa izeci, baa njɛ ụsụbwa inɛ ye eyi, keeni iyi-uumwa ɛtɛ 'yajɛ apiambɛ, bee peteni na azuba n'nlo ma ata mu patanɛ na shɛkpada sha ata. Boo mo n'nlo ma ata tuta keeni na azuba izeci ɛtɛ keeni inɛ ɛtɛ.

³⁰Ụhaŋtụ ata we elele 'yajɛ ikɛgbɛ yɛ ɛtumburɛ ineshi keeni shokwuto shɛ ɛtumburɛ. Ụhaŋtụ ata we elele 'yajɛ esugwulumi ɛtumburɛ eneshi a na bee shikecenji, bee cimbengeni maa a jilanɛ ikɛgbɛ ɛtɛ ineshi. Gana ata du bee shikecenji tuzuba ti ibɛ. A njɛ iŋ tisemberi no modwodwo mu na mu barashagwụ.

³¹ụnjɛswa wa ashɛmbɛrɛ oko tikiri kiri na shikeni na azuba ihɛŋtu ɛtɛ ụ shɛ ombolo u'ala oko, nazhɛ ee zwi tuta, ombolo u'ala oko na ashashɛ. A njɛ aŋ ogongo, a njɛ shɛ aŋ kwururu o.

³²Ikɛgbɛ ɛtɛ ineshi namɛ tuta, shokwuto shi ikɛgbɛ ɛtɛ shi to na ashɛmbɛrɛ ata shikekeni. Uzoto bukagba ata bu ko ụ shɛ imbele i'ɛlɛ iyebi na ashashɛ.

³³Ikɛgbɛ ibɛ i shɛ gana ikɛgbɛ ihɛŋtu ujasa. Shokwuto shi ibɛ, tu ugba ibɛ, te ewiri ibɛ, tu uhobu ibɛ hwɛɛ i shɛ ɛtumburɛ.

³⁴Atukpa eneshi namɛ tuta ti ihɛŋtu ɛtɛ a na untanganɛ iŋ, oo togwu atukpa ata aa shɛ ya iyi ike ni ihɛŋtu ɛtɛ.

³⁵I 'yajɛ ụshɛmbɛrɛ uko u tukwururu na rungwutwonu ụhaŋtụ we elele. Uholo ubwa ụ shɛ ashashɛ ombolo u'ala uko, o togwu uŋ nu ụshɛmbɛrɛ ihɛŋtu ɛtɛ, yaa shɛ ya iyi ike.

³⁶A njɛ atukpa ata keeni a na ata aa njɛ ihɛŋtu gom tisemberi no ofwoto iyi-uumwa ɛtɛ 'yajɛ apiambɛ, keeni izeci keeni ishiwɛ. Ofwo elele na ohwolu namɛ ba mana iŋ n'nlo ma ata hwɛɛ tutu rungwutwonu.

³⁷Gana baa njɛ ihɛŋtu ɛtɛ tɛ. I namɛ iyiri uko hwɛɛ ibɛ. Tugombo ibɛ, tu uholo ibɛ nangwụ hwɛɛ.

³⁸Nazhɛ baa njɛ agbamgbam ɛtumburɛ umpwa. Ụhaŋtụ we elele 'yajɛ ugbamgbam uko, una we elele eri wa ya meni mu nhilwo buhanda. Uholo una uko ụ shɛ imbele i'ɛlɛ ineshi.

³⁹Bee tileni ihɛŋtu ɛtɛ, itɛ namɛ tuta tu umwono ata, bee tileni itɛ tuzuba tu umwono ata. Bee shiri okwokwo ata tuta tu umɛwɛɛ, to dongonu geri bu uwaŋna-banụ bu umwono ata.

⁴⁰Boo mo du sasana nkwasha, tu n-ngowo, ta agbamgbam. Gana ge Hiram kwunanjɛ ugondu we elele na agwuma Sụlụmụn eni bu hwɛɛ iwɛ Umwono ata wa AGWANGWAMA ta.

⁴¹Atukpa eyebi shikekeni keeni okwukwusu ata aa njɛ gana nkwodo patanganɛ na azuba atukpa ata. Agbahwụ tụpatakwụ patakwụ eyebi a shɛ iwɛ maa a njɛ okwukwusu ata nkwodo tisemberi na azuba atukpa ata.

⁴²Apomɛgranati[9] ata akpakwụ eyebi, (400) aa njɛ iwɛlɛ iyebi a shɛ iwɛ agbahwụ ata tupatakwụ patakwụ eyebi, una una ụ shɛ maa a njɛ okwukwusu ata nkwodo ee peteni na azuba atukpa ata tisemberi tutu rungwutwonu.

⁴³Akatakpa ata umpwa, namɛ na agbamgbam ata umpwa.

⁴⁴Okwokwo ata oko keeni inɛ ɛtɛ umpwa-ni-bɛ-iyebi namɛ tuta ta aba.

⁴⁵Ge Hiram ndanɛ agwuma Sụlụmụn nkwasha, tu n-ngowo, ta agbamgbam iyi tizhizhongo hwɛɛ iwɛ Umwono ata wa AGWANGWAMA. Nɛ ɛtumburɛ na namɛ rụmbɛɛ kaa baa njɛ iŋ hwɛɛ.

⁴⁶Nu udadarɛ Jodan, na namɛ na ashashɛ Sukot nu Zaretan, apata agwuma njɛ ijɛ hwɛɛ na cɛnjɛ-ti-i'wɛŋnɛ.

⁴⁷Go Sụlụmụn menji shi ugombo ijɛ ɛtɛ kpaaŋ o, iwɛnɛ ti yee gembi ufwugwo duwa. E menji shi ya ufwugwo wɛ ɛtumburɛ na aa njɛ i'wɛŋnɛ ɛtɛ o.

⁴⁸Go Sụlụmụn njɛ i'wɛŋnɛ elele nɛ namɛ nu Umwono ata wa AGWANGWAMA, tu utukwu-ụrụpɛ ata wa azhɛnarɛya, tu uteburu ata wa azhɛnarɛya iwɛ akara agba [AGWANGWAMA] tupatangana,

⁴⁹te eteburu-asụtụla tupatangana umpwa a na aa njɛ na azhɛnarɛya tụrụmbɛɛ, a na namɛ no ohwolu ata Tijilo na Hwuri hwɛɛ. A ta namɛ nu u'ala ubiye, a ta namɛ nu u'ala ugwulwo, to modwodwo, ta asụtụla, ta shɛpashɛ,

⁵⁰te ekwepi, ta shilumekeshi sha asụtụla, ta agbamgbam ata gembenji, ta agbamgbam ata gwụmwatangwụ iwɛ iturɛre tuzwono, ta apalụ ata iwɛ ulwa tutala, ti iyi ukpa umwono wa Agwatana na hwuri Ofwo vwɛ ne Tijilo Hwɛɛ tukapa keeni akpa shimwono shu ukpogwu. Na azhɛnarɛya na namɛ rụmbɛɛ aa njɛ i'wɛŋnɛ ɛtɛ hwɛɛ.

⁵¹Aka na ta agwuma Sụlụmụn hwuwi ugondu umwono ata wa AGWANGWAMA tɛnda hwɛɛ, nazhɛ bee suje iyi elele nɛ bishi bwa ge Devid tileneni la Agwatana, bee zweni iŋ no shimwono sha ata shi i'wɛŋnɛ, ta azụrụfa, ta azhɛnarɛya keeni iyi-uhwugwa ukekeshi nɛ vwɛ hwɛɛ.